இலங்கை அரசமைப்பு மாற்றத்தில் இந்தியா தலையிட வேண்டும் – திருமாவளவன் வலியுறுத்தல்

ஈழ தமிழர்களுக்கான தாயகத்தை அங்கீகரித்து, அவர்களுக்கு தன்னாட்சி அதிகாரத்தை வழங்கும் வகையில் அரசியல் அரசமைப்பு மாற்றப்பட வேண்டும் என்ற கோரிக்கைகளை இந்திய அரசு வலியுறுத்த வேண்டும் என விடுதலைச் சிறுத்தைகள் கட்சி தலைவர் வலியுறுத்தியுள்ளாா்.

சென்னை அருகே ஆவடியில் விடுதலைச் சிறுத்தைகள் கட்சியின் சார்பில் மாவீரர் நாள் பொதுக்கூட்டம் நடைபெற்றது. இதில், அக்கட்சியின் தலைவர் திருமாவளவன் கலந்துகொண்டு, ஈழ விடுதலைக் களத்தில் உயிர்நீத்த போராளிகளுக்கு மாலை அணிவித்து, மலர் தூவி மரியாதை செலுத்தினார்.

பின்னர் செய்தியாளர்களைச் சந்தித்த திருமாவளவன் கூறுகையில், புதிதாக இலங்கையில் அமைந்துள்ள அனுர குமார திசாநாயக்க தலைமையிலான அரசு, புதிய அரசமைப்பு சட்டத்தை இயற்றுவதற்கு முயற்சித்து வருவதாக தகவல் வருகியுள்ளது. இந்த சூழலில் மத்திய அரசு, தலையிட்டு, புதிதாக அமைய உள்ள இலங்கை அரசியல் அமைப்பு சட்டத்தில் கூட்டாட்சி முறையை உறுதி செய்ய வேண்டும். ஈழ தமிழர்களுக்கான தாயகத்தை அங்கீகரித்து, அவர்களுக்கு தன்னாட்சி அதிகாரத்தை வழங்கும் வகையில், அரசமைப்பு சட்டத்தை மாற்றி எழுதுவதற்கு இந்திய அரசு உறுதுணையாக இருக்க வேண்டும் என ஈழ தமிழர்கள் எதிர்பார்க்கிறார்கள். அதை வி.சி.க., ஒரு வேண்டுகோளாக முன் வைக்கிறோம். தமிழக அரசு இந்திய அரசுக்கு அழுத்தம் தர வேண்டும் என திருமாவளவன் வலியுறுத்தியுள்ளாா்.

செங்கோட்டையன் எந்த பின்னணியில் த.வெ.க., வில் இணைந்தார் என எனக்கு தெரியாது. ஆனால், தமிழக அரசியலில் நடக்கும் ஒவ்வொரு நகர்விலும் பா.ஜ.க, வின் கைகள் உள்ளன. அதை யாரும் மறுக்க முடியாது. அ.தி.மு.க., வின் குழப்பான நிலைக்கு, விமர்சிக்கப்படும் நிலைக்கு, பா.ஜ.க,வும் ஒரு காரணம் என அ.தி.மு.க., வினர் உணர்வார்கள் என நான் நம்புகிறேன் என்று அவர் கூறினாா்.

தமிழகத்தை குறி வைத்து பா.ஜ.க,உள்ளிட்ட சன் பரிவார்கள், அரசியல் நகர்வுகளை மேற்கொண்டு வருகிறார்கள். இந்த சூழலில் தமிழக மக்கள் விழிப்பாக இருக்க வேண்டும் என்பதுதான் எனது வேண்டுகோள் என்றாா்.

தனித்துவத்துடன் இயங்குகிறது என்ற நம்பிக்கையை பெற்றால் தான் த.வெ.க., மீது மக்கள் நம்பிக்கை பெறுவார்கள். பா.ஜ.க,வோடு இணக்கமாக இருக்கிறார் என்ற தோற்றம் உருவானால், அது த.வெ.க.,விற்கு எந்த அளவுக்கு சாதகமான சூழல் உருவாகும் என எனக்கு தெரியவில்லை. தமிழக மக்களை பொறுத்தவரை அதை எதிராக தான் பார்ப்பார்கள்.

இந்தியாவில் எந்த மாநிலத்திலும் இல்லாத ஒரு அரசியல், பா.ஜ.க., வுடன் உறவு வைத்து கொள்வதை சீர்தூக்கி பார்க்கும் அணுகுமுறை, அது மக்களுக்கு எதிரானது என கருதுகிற ஒரு பார்வை, தமிழக மக்களிடம் மேலோங்கி இருக்கிறது. அந்த வகையில், பா.ஜ.க, வுடன் த.வெ.க., இணக்கம் காட்டினால், அது எத்தகைய தாக்கத்தை ஏற்படுத்தும் என்பதை அவர்கள் தான் சீராய்வு செய்து பார்க்க வேண்டும்.

விஜய் மீது எனக்கு நல்ல மதிப்பு உண்டு. அவர் அரசியலுக்கு வந்ததை முதன் முதலில் வரவேற்றவன் நான். அவர் தனித்துவமாக இயங்க வேண்டும் என்பது எனது ஆசை. இப்போது நடக்கும் நிகழ்வுகளை எல்லாம் பார்க்கும் போது, அவ்வாறு விஜய் இயங்கவில்லையோ என்ற சந்தேகம் எனக்கு எழுகிறது. எனக்கு மட்டுமல்ல, பொதுமக்களிடையே இந்த சந்தேகம் எழுகிறது. நல்லது கெட்டது அவர் தான் தீர்மானிக்க வேண்டும். என்னை பொறுத்தவரை பா.ஜ.க, வுடன் அவர் காட்டுகிற இணக்கம், அணுகுமுறை அவருக்கு பயன் தராது என விசிக தலைவர் தொல்.திருமாவன் தெரிவித்துள்ளாா்.

2026-ல் தமிழக வெற்றிக்கழகம் வெற்றி பெற பாடுபடுவேன் – செங்கோட்டையன் பேட்டி