தனுஷின் D55 திரைப்படம் கைமாறி உள்ளதாக தகவல் வெளியாகியிருக்கிறது.
தனுஷ் நடிப்பில் இன்று (நவம்பர் 28) ‘தேரே இஷ்க் மெய்ன்’ எனும் திரைப்படம் வெளியாகி உள்ளது. இது தவிர தனுஷ், ‘போர் தொழில்’ படத்தின் இயக்குனர் விக்னேஷ் ராஜா இயக்கத்தில் தனது 54வது திரைப்படத்தில் நடித்து வருகிறார். அதேசமயம் மாரி செல்வராஜ் இயக்கத்தில் புதிய படம் ஒன்றிலும் நடிப்பதற்கு கமிட்டாகியுள்ளார். இதற்கிடையில் இவர், ‘அமரன்’ படத்தின் இயக்குனர் ராஜ்குமார் பெரியசாமி இயக்கத்தில் தற்காலிகமாக ‘D55’ என்று தலைப்பு வைக்கப்பட்டுள்ள புதிய படத்தில் நடிப்பதாகவும் இந்த படத்தை கோபுரம் ஃபிலிம்ஸ் நிறுவனத்தின் சார்பில் அன்புச் செழியன் தயாரிக்க இருப்பதாகவும் ஏற்கனவே அறிவிக்கப்பட்டது. அதே சமயம் இந்த படத்தின் பூஜையும் சிறப்பாக நடந்து முடிந்தது. அதைத்தொடர்ந்து இந்த படத்தில் நடிகை சாய் பல்லவி, தனுஷ் உடன் இணைந்து நடிக்கப் போவதாக தகவல் வெளியானது. 
மேலும் இந்த படத்தின் படப்பிடிப்பு இன்னும் சில நாட்களில் தொடங்கும் என எதிர்பார்க்கப்படுகிறது. இந்நிலையில் தற்போது இப்படம் தொடர்பாக புதிய தகவல் ஒன்று கிடைத்துள்ளது. அதன்படி பட்ஜெட் பிரச்சனை காரணமாக மதுரை அன்பு இந்த படத்திலிருந்து விலகி விட்டதாகவும், அவருக்கு பதிலாக இப்படத்தை கமல்ஹாசனின் ராஜ்கமல் பிலிம்ஸ் இன்டர்நேஷனல் நிறுவனம் தயாரிப்பதாகவும் கூறப்படுகிறது. அதாவது இந்த படமானது கிட்டத்தட்ட ரூ.135 கோடி பட்ஜெட்டில் உருவாக இருக்கிறதாம். அடுத்தது இந்த படத்தின் டிஜிட்டல் உரிமையை நெட்பிளிக்ஸ் நிறுவனம் ரூ.50 கோடிக்கு கைப்பற்றியுள்ளதாம். மேலும் இந்த படத்தை படக்குழு 2026 ஜூலை மாதம் தனுஷின் பிறந்தநாளை முன்னிட்டு திரைக்கு கொண்டுவர திட்டமிட்டு வருவதாகவும் சினிமா வட்டாரங்களில் பேசப்படுகிறது.