திருவண்ணாமலை அண்ணாமலையார் கோயிலில் விரைவில் நடைபெறவிருக்கும் பிரசித்தி பெற்ற கார்த்திகை தீபத் திருவிழா வின் போது ஏற்படும் நெரிசலைத் தடுக்கவும், பக்தர்களுக்குத் தேவையான அடிப்படை வசதிகளை மேம்படுத்தவும் கோரி வழக்கறிஞர் ஒருவர் தாக்கல் செய்த மனுவை இன்று நீதிபதி பி.பி.பாலாஜி விசாரித்துள்ளார்.
திருவண்ணாமலை அண்ணாமலையார் கோயிலில் நடைபெறவுள்ள கார்த்திகை தீபத் திருவிழா தொடர்பாக, சென்னை உயர் நீதிமன்றத்தில் தாக்கல் செய்யப்பட்ட வழக்கில், பொதுமக்கள் பாதுகாப்பை உறுதி செய்ய அனைத்து விரிவான நடவடிக்கைகளும் மேற்கொள்ளப்பட்டுள்ளதாக மாவட்ட நிர்வாகம் உறுதி அளித்துள்ளது.
வழக்கறிஞர் யானை ராஜேந்திரன் தாக்கல் செய்த மனுவில், நெரிசலைத் தடுக்கவும், போதுமான அடிப்படை வசதிகளை ஏற்படுத்தவும் கோரப்பட்டது.
இது தொடர்பாக மாவட்ட நிர்வாகம் மற்றும் காவல்துறை முக்கிய நடவடிக்கைகள் எடுத்துள்ளனர். பொது மக்களின் பாதுகாப்பு நலன் கருதி காவல்துறை சுமார் 15,000 போலீசார் பணியில் அமர்த்தப்பட்டுள்ளனர்.
கிரிவலப் பாதையில் பக்தர்கள் துன்புறுத்தப்படுவதையும் பணம் பறிக்கப்படுவதையும் தடுக்க சிறப்பு குழுக்கள் நியமிக்கப்பட்டுள்ளன.மேலும் 20 துறைகளுடன் இணைந்து விரிவான பாதுகாப்பு மற்றும் மேலாண்மைத் திட்டம் வகுக்கப்பட்டுள்ளது.
போக்குவரத்து மற்றும் அடிப்படை வசதிகள் ஏற்பாடு செய்யப்பட்டுள்ளன.2,325 பேருந்துகள் நிறுத்த 24 தற்காலிக பேருந்து நிலையங்கள் அமைக்கப்பட்டுள்ளன. 130 கார் பார்க்கிங் வசதிகள் மூலம் 19,815 கார்கள் நிறுத்த ஏற்பாடு செய்யப்பட்டுள்ளது.பேருந்து மற்றும் கார் நிறுத்தங்களில் கழிவுநீர் மற்றும் குடிநீர் வசதிகள் செய்யப்பட்டுள்ளன. மற்றும் சிறப்பு போக்குவரத்து ஏற்பாடுகளும் செய்யப்பட்டுள்ளன.
தமிழக பக்தர்களுக்காக 4,764 சிறப்பு பேருந்துகள் , வெளி மாநில பக்தர்களுக்காக 520 பேருந்துகள்,16 சிறப்பு ரயில்கள் இயக்கப்படவுள்ளன.
கோயிலுக்குள் 303 கண்காணிப்பு கேமராக்கள் உட்பட மொத்தம் 1,060 கேமராக்கள் பொருத்தப்பட்டுள்ளன. தேவையான மருத்துவ வசதிகள் ஏற்படுத்தப்பட்டுள்ளன.
மாவட்ட ஆட்சியர் மற்றும் காவல்துறை தரப்பில் தாக்கல் செய்யப்பட்ட இந்த விரிவான அறிக்கைகளை ஏற்றுக் கொண்ட நீதிபதி பி.பி.பாலாஜி, அறிக்கையில் குறிப்பிடப்பட்டுள்ள நடவடிக்கைகளை கண்டிப்புடன் பின்பற்ற உத்தரவிட்டு வழக்கை முடித்து வைத்தார்.
ஜோலார்பேட்டை – கோயம்புத்தூர் ரயில் பாதையில் அதிவேகச் சோதனை ஓட்டம் வெற்றி