தேரே இஷ்க் மெய்ன் படக்குழு முக்கிய அறிவிப்பை வெளியிட்டுள்ளது.
தமிழ் சினிமாவில் தவிர்க்க முடியாத நடிகராக வலம் வரும் தனுஷ் பாலிவுட்டிலும் களமிறங்கி ஏராளமான ரசிகர்களை சேகரித்து வைத்துள்ளார். அந்த வகையில் இவர் ஏற்கனவே ராஞ்சனா, அத்ரங்கி ரே ஆகிய படங்களில் நடித்திருந்தார். அதன் பின்னர் தேரே இஷ்க் மெய்ன் எனும் திரைப்படத்திலும் நடித்திருக்கிறார். இந்த படத்தை ஆனந்த் எல். ராய் இயக்க கலர் எல்லோ ப்ரொடக்ஷன்ஸ் நிறுவனம் படத்தை தயாரித்துள்ளது. ஏ.ஆர். ரகுமான் இதற்கு இசையமைத்திருக்கிறார். தனுஷ் மற்றும் க்ரித்தி சனோன் ஆகியோரின் நடிப்பில் உணர்வுபூர்வமான காதல் கதையில் உருவாகியுள்ள இப்படம் நேற்று (நவம்பர் 28) முதல் திரையரங்குகளில் திரையிடப்பட்டுள்ளது. 
தனுஷ் மற்றும் க்ரித்தி சனோன் ஆகிய இருவரும் இந்த படத்தில் சிறந்த நடிப்பை வெளிப்படுத்தி அனைவரையும் ஆச்சரியப்படுத்தியுள்ளனர். சில ரசிகர்கள் இந்த படத்திற்கு கலவையான விமர்சனங்களை கொடுத்து வந்தாலும் சில ரசிகர்கள் இந்த படத்தை கொண்டாடி வருகின்றனர். அந்த வகையில் உலகம் முழுவதும் தமிழ், தெலுங்கு, இந்தி ஆகிய மொழிகளில் வெளியான இப்படம் இந்தி மொழியில் மட்டும், வெளியான முதல் நாளில் ரூ.15.06 கோடிக்கும் அதிகமாக வசூல் செய்திருப்பதாக இந்த படத்தின் தயாரிப்பு நிறுவனம் போஸ்டர் ஒன்றை வெளியிட்டு அதிகாரப்பூர்வமாக அறிவித்துள்ளது. 
இந்த தகவல் தனுஷ் ரசிகர்களுக்கு இன்ப அதிர்ச்சியை தந்துள்ளது. மேலும் கோலிவுட்டில் பிஸியாக நடித்து வரும் தனுஷ், தற்போது பாலிவுட் பாக்ஸ் ஆபிஸையும் கலக்கி வருகிறார் என்று ரசிகர்கள் பலரும் கமெண்ட் செய்து வருகின்றனர்.