கேரளாவில் பேருந்து பயணத்தின்போது பெண்ணிடம் பாலியல் சீண்டலில் ஈடுபட்டதாக சமூக வலைதளங்களில் வீடியோ பரவிய நிலையில், குற்றம் சாட்டப்பட்ட 42 வயது மதிக்கத்தக்க நபர் மர்மமான முறையில் உயிரை மாய்த்துக் கொண்டதால் பரபரப்பு ஏற்பட்டுள்ளது.
கேரளாவில் பேருந்து பயணத்தின்போது தன்னிடம் ஒருவர் தவறாக நடந்துகொண்டதாக அப்பெண் பகிர்ந்த வீடியோ சமூக வலைதளங்களில் பரவியது. இதற்கிடையே குற்றம் சாட்டப்பட்ட நபா் தவறு செய்யவில்லை என பலரும் கருத்து தெரிவித்து வருகின்றனர். இந்த வீடியோ வைரலான பிறகு தீபக் கடுமையான மன அழுத்தத்தில் இருந்ததாக குடும்ப உறுப்பினர்கள் கூறுகின்றனர். அவமானப்படுத்தப்பட்ட உணர்வால் அவர் முற்றிலும் மன உளைச்சலுக்கு ஆளானதாக அவர்கள் கூறினர். குடும்பத்தினர் அவரை சமாதானப்படுத்த முயன்ற போதிலும், ஞாயிற்றுக்கிழமை காலை அவரது அறையில் அவர் இறந்து கிடந்தார்.
நீண்ட நேரமாகியும் கதவைத் திறக்காததால், உள்ளே சென்று பார்த்தபோது தீபக் இறந்து கிடந்தார். இந்த சம்பவத்திற்கு காரணம் சமூக ஊடகங்களில் வைரலான வீடியோ தான் என்று தீபக்கின் குடும்பத்தினரும் நெருங்கிய நண்பர்களும் குற்றம் சாட்டுகின்றனர். “முழு உண்மை தெரியாமல் வீடியோக்களை வெளியிட்டதால் ஒருவரின் உயிர் பறிபோனது. இப்படி யாருடைய வாழ்க்கையிலும் விளையாடாதீர்கள்” என்று அவர்கள் வருத்தம் தெரிவித்தனர்.
அந்த வைரல் காணொளி தன் மீதான நற்பெயருக்குக் களங்கத்தையும் இணையவழித் துன்புறுத்தலையும் ஏற்படுத்தியதாகவும், அதை அவரால் சமாளிக்க முடியவில்லை என்றும் உறவினர்கள் குற்றம் சாட்டினர். அவர் தனது வாழ்நாள் முழுவதும் சர்ச்சைகளிலிருந்து விலகியே இருந்தவர் என்றும் அவர்கள் விவரித்தனர்.
சம்பந்தப்பட்ட பிரிவுகளின் கீழ் காவல்துறையினர் இயற்கைக்கு மாறான மரணம் என வழக்குப் பதிவு செய்துள்ளனர். சமூக ஊடகத் துன்புறுத்தலின் தாக்கம் உட்பட, இந்தச் சம்பவத்திற்கு வழிவகுத்த சூழ்நிலைகளை ஆராய விரிவான விசாரணை நடைபெற்று வருவதாகவும் அவர்கள் தெரிவித்துள்ளனர்.
விசாரணைகள் உரிய சட்ட நடைமுறைகளைப் பின்பற்ற வேண்டும் என்றும், இணையவழித் துஷ்பிரயோகம் கடுமையான விளைவுகளை ஏற்படுத்தக்கூடும் என்றும் வலியுறுத்திய அதிகாரிகள், சமூக ஊடகங்களில் நிதானத்துடனும் பொறுப்புடனும் நடந்துகொள்ளுமாறு கேட்டுக்கொண்டனர். இதற்கிடையில், சமூக ஊடகங்களில் பல நெட்டிசன்கள் தீபக்கை ஆதரித்து வருகின்றனர்.
பேருந்தில் இருந்த அதிக கூட்ட நெரிசல் காரணமாக அவர் தற்செயலாக ஒருவரைத் தாக்கியிருக்கலாம் என்றும், அது வேண்டுமென்றே செய்யப்படவில்லை என்றும் சிலர் கருதுகின்றனர். இருப்பினும், இந்தக் கூற்றுக்களை ஷிம்ஜிதா மறுத்துள்ளார். இந்த வீடியோவை பார்த்த பிறகுதான் தான் எடுத்ததாகவும், அவர் வேண்டுமென்றே அநாகரீகமாக நடந்து கொண்டதாகவும் அவர் தெளிவுபடுத்தினார். அந்த நபர் தற்கொலை செய்து கொள்வார் என்று தான் எதிர்பார்க்கவில்லை என்றும் அவர் கூறினார்.