சைதை TNUHDB வீடுகள் ஒதுக்கீட்டில் சாதிய பாகுபாடு இருப்பது வேதனை அளிக்கிறது என விசிக எம்.எல்.ஏ. எஸ்எஸ்.பாலாஜி தெரிவித்துள்ளாா்.
சென்னை சைதாப்பேட்டையில் உள்ள தமிழ்நாடு நகர்ப்புற வாழ்விட மேம்பாட்டு வாரியம் (TNUHDB) சார்பில் கட்டப்பட்ட புதிய குடியிருப்புகள் ஒதுக்கீட்டில் சாதிய பாகுபாடு கடைப்பிடிக்கப்பட்டதாக எழுந்துள்ள குற்றச்சாட்டு அரசியல் வட்டாரங்களில் விவாதத்தை ஏற்படுத்தியுள்ளது. இந்த விவகாரம் தொடர்பாக கருத்து தெரிவித்துள்ள விடுதலை சிறுத்தைகள் கட்சி எம்.எல்.ஏ எஸ்.எஸ். பாலாஜி, வீடுகள் ஒதுக்கீட்டில் சாதி அடிப்படையிலான பிரிவினை பின்பற்றப்பட்டதாக கூறப்படும் தகவல்கள் மிகுந்த வேதனை அளிப்பதாக தெரிவித்துள்ளார். அனைத்து திட்டப்பகுதி வீடுகளின் ஒதுக்கீடும் முழுமையான வெளிப்படைத்தன்மையுடனும் நேர்மையுடனும் நடைபெற வேண்டும் என்றும், வீடுகள் நியாயமான முறையில் ஒதுக்கப்படுவதை தமிழ்நாடு அரசு உறுதி செய்ய வேண்டும் என்றும் அவர் வலியுறுத்தியுள்ளார்.
சைதாப்பேட்டையில் கட்டப்பட்டுள்ள புதிய அடுக்குமாடி குடியிருப்புகள் ஒதுக்கீட்டில், தலித் மக்கள் மற்றும் பிற்படுத்தப்பட்ட சமூகத்தினருக்கு தனித்தனியாக வீடுகள் பிரித்து வழங்கப்பட்டதாக பொதுமக்கள் மற்றும் சில அரசியல் தலைவர்கள் குற்றச்சாட்டுகளை முன்வைத்துள்ளனர். மேலும், இந்த ஒதுக்கீட்டில் தவெக எம்.எல்.ஏ அருள் பிரகாசம் தலையீடு செய்ததாகவும் குற்றம்சாட்டப்பட்டுள்ளது. இதையடுத்து, குடியிருப்புகள் ஒதுக்கீட்டை பொது குலுக்கல் (லாட்டரி) முறையில் நடத்த வேண்டும் என்ற கோரிக்கையும் பல தரப்பிலிருந்து எழுந்துள்ளது.
இந்நிலையில், இந்த குற்றச்சாட்டுகளை தமிழ்நாடு நகர்ப்புற வாழ்விட மேம்பாட்டு வாரியம் திட்டவட்டமாக மறுத்துள்ளது. மொத்தம் 426 குடியிருப்புகளும் குலுக்கல் முறையில்தான் ஒதுக்கப்பட்டதாகவும், ஒவ்வொரு கட்டிடப் பிரிவிலும் அனைத்து சமூகத்தினரும் சமமாக இடம்பெறும் வகையில் வீடுகள் வழங்கப்பட்டுள்ளதாகவும் வாரியம் விளக்கம் அளித்துள்ளது. சைதாப்பேட்டை வீடுகள் ஒதுக்கீடு தொடர்பான இந்த சர்ச்சை அரசியல் மற்றும் சமூக வட்டாரங்களில் கவனத்தை ஈர்த்துள்ள நிலையில், ஒதுக்கீட்டு நடைமுறைகள் குறித்து வெளிப்படையான ஆய்வு மேற்கொள்ள வேண்டும் என்ற கோரிக்கையும் வலுத்து வருகிறது.