பகுஜன் சமாஜ் கட்சியின் (BSP) முன்னாள் மாநிலத் தலைவர் கே. ஆர்ம்ஸ்ட்ராங் படுகொலை செய்யப்பட்ட வழக்கை மத்திய புலனாய்வு அமைப்பான சி.பி.ஐ (CBI) விசாரிக்கத் தமிழ்நாடு அரசு முழு சம்மதம் தெரிவித்துள்ளது.
இந்த வழக்கை சி.பி.ஐ-க்கு மாற்றி சென்னை உயர் நீதிமன்றம் பிறப்பித்த உத்தரவை எதிர்த்து, உச்ச நீதிமன்றத்தில் தாக்கல் செய்திருந்த மேல்முறையீட்டு மனுவைத் திரும்பப் பெறுவதாகத் (Withdraw) தமிழ்நாடு அரசு இன்று உச்ச நீதிமன்றத்தில் அதிரடியாக இடையீட்டு மனு தாக்கல் செய்துள்ளது.
வழக்குப் பின்னணியும் உயர் நீதிமன்ற உத்தரவும்
கடந்த 2024-ஆம் ஆண்டு ஜூலை 5-ஆம் தேதி சென்னை பெரம்பூரில் உள்ள அவரது இல்லத்தின் அருகே ஆர்ம்ஸ்ட்ராங் ஆயுதக் கும்பலால் கொடூரமாக வெட்டிக் கொலை செய்யப்பட்டார். இந்த வழக்கை விசாரித்த சென்னை மாநகரக் காவல் துறை, விரிவான குற்றப்பத்திரிகையைத் தாக்கல் செய்தது. இருப்பினும், இந்த விசாரணையில் திருப்தி இல்லை என்றும், பின்னணியில் உள்ள அரசியல் சதிகாரர்களைக் கண்டறிய வழக்கை சி.பி.ஐ-க்கு மாற்ற வேண்டும் என்றும் ஆர்ம்ஸ்ட்ராங்கின் குடும்பத்தினர் சென்னை உயர் நீதிமன்றத்தில் மனு தாக்கல் செய்தனர். வழக்கை விசாரித்த உயர் நீதிமன்றம், மாநில காவல் துறையின் குற்றப்பத்திரிகையை ரத்து செய்து, விசாரணையை சி.பி.ஐ-க்கு மாற்றி உத்தரவிட்டது.
உச்ச நீதிமன்றத்தில் மேல்முறையீடு செய்திருந்த தமிழக அரசு
சென்னை உயர் நீதிமன்றத்தின் இந்த உத்தரவை எதிர்த்து, தமிழ்நாடு அரசு உடனடியாக உச்ச நீதிமன்றத்தில் மேல்முறையீடு செய்தது. மாநில காவல் துறை திறம்பட விசாரித்து 7,000 பக்கங்களுக்கும் மேலான விரிவான குற்றப்பத்திரிகையைத் தாக்கல் செய்துள்ளதாக அரசு வாதிட்டது. மனுவை விசாரித்த உச்ச நீதிமன்றம், உயர் நீதிமன்றத்தின் உத்தரவுக்குக் கடந்த சில மாதங்களுக்கு முன்பு இடைக்காலத் தடை விதித்திருந்தது. இதனால் வழக்கு விசாரணை தற்காலிகமாக மீண்டும் மாநில காவல் துறையின் வசமே நீடித்து வந்தது.
திடீர் திருப்பம்: மனுவை வாபஸ் பெறுகிறது தமிழக அரசு!
இன்று உச்ச நீதிமன்றத்தில் இந்த வழக்கு மீண்டும் விசாரணைக்கு வந்த சூழலில், ஆளும் தவெக அரசு தனது முந்தைய நிலைப்பாட்டிலிருந்து முற்றிலும் பின்வாங்கியுள்ளது. “ஆர்ம்ஸ்ட்ராங் கொலை வழக்கை சி.பி.ஐ அமைப்பே விசாரிக்கட்டும். வழக்கை சி.பி.ஐ-க்கு மாற்றியதற்கு எதிராகத் தாக்கல் செய்யப்பட்ட மேல்முறையீட்டு மனுவை நாங்கள் வாபஸ் பெறுகிறோம்” என்று தமிழ்நாடு அரசு சார்பில் உச்ச நீதிமன்றத்தில் அதிகாரப்பூர்வமாக இடையீட்டு மனு தாக்கல் செய்யப்பட்டுள்ளது.
அரசியல் வட்டாரத்தில் பரபரப்பு
பாதிக்கப்பட்ட குடும்பத்தினரின் கோரிக்கைக்கு மதிப்பளித்தும், இந்த படுகொலையின் உண்மைப் பின்னணி முழுமையாக வெளிவர வேண்டும் என்ற நோக்கத்திலும் அரசு இந்த முடிவை எடுத்துள்ளதாகக் கோட்டை வட்டாரங்கள் தெரிவிக்கின்றன. அரசின் இந்த திடீர் முடிவைத் தொடர்ந்து, ஆர்ம்ஸ்ட்ராங் கொலை வழக்கு அதிகாரப்பூர்வமாக சி.பி.ஐ வசம் ஒப்படைக்கப்பட உள்ளது. இது தமிழக அரசியல் மற்றும் காவல் துறை வட்டாரங்களில் பெரும் பரபரப்பை ஏற்படுத்தியுள்ளது.