தமிழகத்தில் 2026 சட்டமன்றத் தேர்தல் களம் சூடுபிடித்துள்ள நிலையில், தமிழக வெற்றிக் கழகத்தின் அரசியல் நகர்வுகள், அதிமுகவின் உட்கட்சிப் பூசல்கள் மற்றும் தேர்தல் கூட்டணிகள் குறித்து மூத்த அரசியல் பத்திரிகையாளர் திரு. S.P. லட்சுமணன் அவர்கள் நமது ‘தமிழ்நிறம்’ ஊடகத்திற்குப் பிரத்யேக நேர்காணல் அளித்தார். அதில் அவர் பகிர்ந்துகொண்ட அரசியல் பகுப்பாய்வுகளின் முக்கியத் தொகுப்பு பின்வருமாறு:
எழுதிக்கொடுத்ததை வாசிப்பதைத் தாண்டி எதார்த்தமாகப் பேச வேண்டும்
தவெக தலைவர் விஜய் பொதுக்கூட்டங்களில் பேசி வரும் கருத்துகள் குறித்துப் பேசிய S.P. லட்சுமணன், “விஜய் தனது மேடைப் பேச்சுக்கான ஸ்கிரிப்ட்டை வாசிப்பதில் எந்தத் தவறும் இல்லை. ஆனால், செய்தியாளர்களைச் சந்திக்கும் போது எதார்த்தமாக குறைந்தபட்சம் இரண்டு வரிகளாவது பேசப் பழக வேண்டும். திருச்சி பொதுக்கூட்டத்தில் அவர் பேசிய விதம், அவருக்கு வாக்களித்தவர்கள் மத்தியிலேயே ஒருவித அதிருப்தியை ஏற்படுத்தியுள்ளது. ஒரு முதலமைச்சர் நாற்காலியை இலக்காகக் கொண்டு களம் காண்பவர் பொதுவெளியில் கண்ணியமான மற்றும் பக்குவப்பட்ட வார்த்தைகளைப் பயன்படுத்த வேண்டும். அதிகாரத் திமிரோ அல்லது தலைக்கணமோ தென்பட்டால் மக்கள் மிக விரைவில் நிராகரித்துவிடுவார்கள்” என்று சுட்டிக்காட்டினார்.
அதிமுகவின் பலவீனத்தால் வளரும் தவெக; தூய சக்தி என்ற தகுதி இழப்பு
திமுகவை ‘ஊழல் சக்தி’ என்று விமர்சித்த விஜய், தற்போது பிரதான எதிர்க்கட்சியான அதிமுகவிலிருந்து தொடர்ந்து நிர்வாகிகளையும், தொண்டர்களையும் தன் பக்கம் இழுத்து வருகிறார். “இதற்கு எடப்பாடி பழனிசாமியின் பலவீனமான தலைமைத்துவமே முக்கியக் காரணம்” என்று குறிப்பிட்ட லட்சுமணன், “வளரும் கட்சிக்கு ஆட்களைச் சேர்ப்பது அவசியம்தான் என்றாலும், இதன் மூலம் ‘நாங்கள் தூய சக்தி’ என்று தவெக கூறிக் கொள்ளும் தார்மீகத் தகுதியை இழந்துவிட்டது. அரசியலில் தூய்மை என்று எதுவுமில்லை; ‘வெட்கம்கெட்டதுதான் அரசியல்’ என்ற யதார்த்தத்தை விஜய் புரிந்து கொள்ள வேண்டும்” என்றார்.
15 தொகுதி இடைத்தேர்தலும் தவெக-வின் ரகசியத் திட்டமும்
தமிழகத்தில் 15 தொகுதிகளுக்கான இடைத்தேர்தல் நடத்துவதில் நீடித்துவரும் சட்டக் குழப்பங்கள் குறித்து விளக்கிய அவர், “தொழில்நுட்ப மற்றும் நீதிமன்றக் காரணங்களால் இது தற்காலிகமாக மட்டுமே நிறுத்தி வைக்கப்பட்டுள்ளது. வரும் ஜூலை 31-க்குள் தேர்தல் ஆணையம் தனது பதில் மனுவைத் தாக்கல் செய்ய உள்ள நிலையில், தவெக இந்த இடைத்தேர்தலில் ஓரளவு இடங்களை வென்று தன் பலத்தை நிரூபிக்க கணக்கு போடுகிறது. அதே நேரத்தில் திமுக, அதிமுக மற்றும் பாஜக ஆகிய கட்சிகளும் தங்களது எதிர் வியூகங்களைத் தீவிரமாக வகுத்து வருகின்றன” என்றார்.
திமுக – அதிமுக ‘கூட்டு’: டிடிவி தினகரனின் கருத்தை வழிமொழிந்த லட்சுமணன்
தொங்கு சட்டமன்றம் போன்ற இக்கட்டான சூழல் ஏற்பட்டால், தமிழக வரலாற்றில் முதன்முறையாக ஒரு தலித் சமூகத்தைச் சேர்ந்தவரை முதலமைச்சர் ஆக்குவதற்கு திமுகவும் அதிமுகவும் கைகோர்ப்பதில் எந்தத் தவறும் இல்லை என்ற டிடிவி தினகரனின் எதார்த்தமான அரசியல் கருத்தை S.P. லட்சுமணன் வழிமொழிந்தார். “35 சதவீத வாக்குகளைக் குறிவைத்து நகரும் விஜய்யை எதிர்கொள்ள இரு திராவிடக் கட்சிகளும் இணைந்து ஒரு முடிவெடுத்தால் அதில் ஆச்சரியப்பட ஒன்றுமில்லை. விஜய் அடிக்கடி திமுக-அதிமுகவை ‘கூட்டு களவாணி’ என விளிப்பது அவரது அரசியல் முதிர்ச்சியின்மையையே காட்டுகிறது” என்று விமர்சித்தார்.
செந்தில் பாலாஜி வழக்கு விவகாரமும் தவெக-வின் இரட்டை நிலையும்
முன்னாள் அமைச்சர் செந்தில் பாலாஜி மீதான வழக்கு விசாரணைகள் குறித்துப் பேசிய அவர், “செந்தில் பாலாஜி விவகாரத்தில் சட்ட ரீதியான விசாரணை நடக்கிறதா என்ற ஐயம் எழுகிறது. அரசியல் காழ்ப்புணர்ச்சியோடு அவர் குறிவைக்கப்படுகிறார் என்ற தோற்றமே வலுவாக உள்ளது. நேர்மையான மற்றும் தூய்மையான நிர்வாகத்தை வழங்குவேன் என்று முழங்கும் தவெக தலைவர் விஜய்யின் கொள்கை முழக்கங்களுக்கும், களத்தில் நிலவும் எதார்த்த சூழல்களுக்கும் இடையே பெரிய முரண்பாடு உள்ளது” எனத் தெரிவித்தார்.