பழனி கோவில் நிலமுறைகேடு விவகாரத்தில் தவறு செய்தவர்கள் அனைவரும் கைது செய்யப்படுவார்கள் என்றும், தவெக எம்.எல்.ஏ-க்களை வளைக்க திமுக பல கோடி ரூபாய் பணத்துடன் குதிரை பேரத்தில் ஈடுபட்டு வருகிறது என்றும் அமைச்சர் சி.டி.ஆர். நிர்மல்குமார் அவர்கள் மதுரையில் செய்தியாளர்களிடம் அதிரடியான குற்றச்சாட்டுகளை முன்வைத்துள்ளார். மதுரையில் இன்று நிருபர்களைச் சந்தித்த அமைச்சர் நிர்மல்குமார் அவர்கள் கூறியதாவது:
பழனி கோவில் நில மோசடி: 100 விழுக்காடு நடவடிக்கை!
“பழனி கோவில் நில மோசடி வழக்கின் விசாரணை தற்பொழுது தீவிரமாக விரிவுபடுத்தப்பட்டு வருகிறது. இந்த விவகாரத்தில் தொடர்புடைய, பின்னணியில் இருக்கும் அனைவரும் தப்ப முடியாது; அவர்கள் அனைவரும் கண்டிப்பாகக் கைது செய்யப்பட வேண்டும். இதேபோல இன்னும் பல இடங்களில் மோசடியான பத்திரப்பதிவுகள் நடைபெற்றுள்ளது வெளிச்சத்திற்கு வந்துள்ளது. பாதிக்கப்பட்ட பொதுமக்கள் மற்றும் நில உரிமையாளர்கள் அனைவரும் அச்சமின்றி முன்வந்து இதுகுறித்து தங்களது புகார்களை அளிக்க வேண்டும். பழநி கோவில் நிலமுறைகேடு விவகாரத்தில் தற்போதைய தமிழக அரசு 100 சதவீதம் கடுமையான சட்டப்பூர்வ நடவடிக்கைகளை எடுக்கும்.”
தவெக அரசு துரித நடவடிக்கை!
“ஆன்மீக மற்றும் பொது மக்களின் சொத்துக்கள் சூறையாடப்படுவதைத் தடுப்பதில் இந்த அரசு உறுதியாக உள்ளது. இந்த நிலமுறைகேடு விவகாரம் கவனத்திற்கு வந்த உடனே, தமிழக வெற்றி கழக (தவெக) அரசு மிகத் துரிதமாகச் செயல்பட்டு முதற்கட்ட நடவடிக்கைகளை முடுக்கிவிட்டுள்ளது.”
எம்.எல்.ஏ-க்களை விலைக்கு வாங்க திமுக பேரம்: பல கோடி ரூபாய் சிக்கியது!
“மறுபுறம், தமிழக வெற்றி கழகத்தைச் சேர்ந்த சட்டமன்ற உறுப்பினர்களை (MLAs) விலைக்கு வாங்கி, ஆட்சதியைக் கவிழ்க்க நினைக்கும் திமுகவின் குறுக்குவழி நடவடிக்கைகள் நேற்று வரை தொடர்ந்து நீடித்துக் கொண்டிருக்கிறது. தவெக எம்.எல்.ஏ-க்களை வாங்குவதற்காக திமுக தரப்பில் பதுக்கி வைக்கப்பட்டிருந்த பல கோடி ரூபாய் பணம் தற்பொழுது பிடிபட்டுள்ளது. இதுமட்டுமன்றி, இன்னும் பல இடங்களில் இந்த குதிரை பேரத்திற்கான பணம் ரகசியமாகப் பதுக்கி வைக்கப்பட்டுள்ளது.”
திருச்சி சிவா மத்திய அமைச்சரா?
செய்தியாளர்கள் எழுப்பிய கேள்வி ஒன்றிற்குப் பதிலளித்த அமைச்சர், “திமுகவின் திருச்சி சிவா அவர்கள் மத்திய அமைச்சராவார் என்று அரசியல் வட்டாரங்களில் செய்திகள் பரப்பப்பட்டு வருகின்றன. அவர் எந்த தகுதியின் அடிப்படையில் அல்லது எந்த பின்னணியில் மத்திய அமைச்சராவார் என்று கூறுகிறார்கள் என்றே தெரியவில்லை; அதில் எந்த முகாந்திரமும் இல்லை,” என்று சாடினார்.