தென்பெண்ணை ஆறு நீர் பங்கீட்டு விவகாரம் தொடர்பான வழக்கு உச்சநீதிமன்றத்தில் நீதிபதி விக்ரம் நாத் தலைமையிலான அமர்வில் இன்று விசாரணைக்கு வந்தது. தென்பெண்ணை ஆறு தொடர்பாகப் புதிய தீர்ப்பாயம் அமைப்பதில் உள்ள நடைமுறைகள் குறித்து மத்திய அரசு தாக்கல் செய்த விளக்க மனு மீது இந்த விசாரணை நடைபெற்றது.
மத்திய அரசு வாதிட்டது என்ன?
விசாரணையின் போது மத்திய அரசின் தலைமை வழக்கறிஞர் ஆஜராகி வாதிடுகையில், ஏற்கனவே நடைமுறையில் இருக்கக்கூடிய நதிநீர் தீர்ப்பாயத்திடமே தென்பெண்ணை ஆறு விவகாரத்தையும் ஒப்படைக்கலாம் எனக் குறிப்பிட்டார்.
புதிதாக ஒரு தீர்ப்பாயத்தை அமைக்கும் பட்சத்தில், அதற்கான கட்டமைப்பு மற்றும் நடைமுறைகளை உருவாக்க அதிகக் காலதாமதம் ஏற்படும் என்பதால், தற்போதுள்ள அமைப்பையே பயன்படுத்திக் கொள்வது சாத்தியமானது எனத் தெரிவித்தார்.
தமிழ்நாடு அரசின் கடுமையான எதிர்ப்பு
மத்திய அரசின் இந்தக் கருத்துக்குத் தமிழ்நாடு அரசு தரப்பில் கடும் எதிர்ப்பு தெரிவிக்கப்பட்டது. தமிழ்நாடு அரசு வழக்கறிஞர் முன்வைத்த முக்கிய வாதங்கள்:
தனித் தீர்ப்பாயமே தீர்வு: தென்பெண்ணையாறு நீர் பங்கீடு விவகாரத்தில் நிரந்தர தீர்வு கிடைக்க வேண்டுமெனில், அதற்குத் தனியான புதிய தீர்ப்பாயம் அமைக்கப்படுவது மட்டுமே சரியான தீர்வாக இருக்கும்.
நடைமுறைச் சிக்கல்கள்: ஏற்கனவே உள்ள தீர்ப்பாயங்களில் தலைவர்கள் மற்றும் உறுப்பினர்களை நியமிப்பதில் பல சிக்கல்கள் நிலவி வருகின்றன.
காலதாமதத்தைத் தவிர்க்க நடவடிக்கை: எனவே, தென்பெண்ணை ஆற்றுக்கென நிரந்தரத் தனித் தீர்ப்பாயத்தை விரைவாக அமைப்பதே இரு மாநிலங்களின் நீர் உரிமைகளைப் பாதுகாக்கும்.
உச்சநீதிமன்ற உத்தரவு
இரு தரப்பு வாதங்களையும் கேட்ட நீதிபதி விக்ரம் நாத் தலைமையிலான அமர்வு, தென்பெண்ணை ஆறு விவகாரத்தை ஏற்கனவே உள்ள தீர்ப்பாயத்திற்கு மாற்றுவது தொடர்பான மத்திய அரசின் மனுவுக்கு, தமிழ்நாடு மற்றும் கர்நாடக மாநில அரசுகள் 2 வார காலத்தில் விரிவான பதில் மனுத் தாக்கல் செய்ய வேண்டும் என உத்தரவிட்டு, வழக்கின் விசாரணையை ஒத்திவைத்தது.