“வரவிருக்கும் இடைத்தேர்தலில் கூட்டணி கட்சியான அதிமுக வேட்பாளர்கள் நிச்சயமாக வெற்றிபெற வேண்டும். அதற்காக பா.ஜ.க-வில் உள்ள அனைத்து தொண்டர்களும் முழு முனைப்புடன் களப்பணியாற்றி அவர்களை வெற்றிபெற வைப்போம்” என்று பாஜக மாநிலத் தலைவர் நயினார் நாகேந்திரன் தெரிவித்துள்ளார்.
தமிழகத்தில் நடைபெறவுள்ள இடைத்தேர்தல் குறித்து பாஜக மாநில தலைமை அலுவலகத்தில் முக்கிய ஆலோசனைக் கூட்டம் நடைபெற்றது. இதன் பின்னர் செய்தியாளர்களைச் சந்தித்த பாஜக மாநிலத் தலைவர் நயினார் நாகேந்திரன், கூட்டணியின் வெற்றி குறித்து விரிவாகப் பேசினார்.
முழு மூச்சாக களமிறங்கும் பாஜக தொண்டர்கள்
அப்போது அவர் கூறுகையில், “இந்த இடைத்தேர்தல் கூட்டணிக்கு மிகவும் முக்கியத்துவம் வாய்ந்தது. இதில் அதிமுக சார்பில் போட்டியிடும் வேட்பாளர்களின் வெற்றி உறுதி செய்யப்பட வேண்டும். இதற்காக பாரதிய ஜனதா கட்சியின் மாநில, மாவட்ட, ஒன்றிய மற்றும் கிளை அளவிலான அனைத்து நிர்வாகிகளும், தொண்டர்களும் முழு முனைப்புடன் தீவிர களப்பணியில் ஈடுபடுவார்கள். அதிமுக வேட்பாளர்களின் வெற்றியை உறுதி செய்யும் வகையில் பாஜகவின் அனைத்துப் பிரிவுகளும் முழு வீச்சில் செயல்படும்” என்று உறுதியளித்தார்.