“எனக்கு இது மறக்க முடியாத பயணம்” – ‘Sigma’ குறித்து உணர்ச்சிபூர்வமாக பேசிய இயக்குநர் ஜேசன் சஞ்சய்!

நடிகர் விஜய்யின் மகன் ஜேசன் சஞ்சய் இயக்குநராக அறிமுகமாகும் திரைப்படம் ‘Sigma’. சுந்தீப் கிஷன் கதாநாயகனாக நடிக்கும் இப்படத்தில் ஃபரியா அப்துல்லா, சம்பத் ராஜ், ராகு சுந்தரம் உள்ளிட்டோர் முக்கிய கதாபாத்திரங்களில் நடித்துள்ளனர். எஸ். தமன் இசையமைத்துள்ள இப்படம் தமிழ் மற்றும் தெலுங்கு மொழிகளில் உருவாகியுள்ளது.

‘Sigma’ திரைப்படம் உருவான விதம் குறித்து ஜேசன் சஞ்சய் ஏற்கனவே பல்வேறு தகவல்களை பகிர்ந்துள்ளார். கல்லூரிப் படிப்பை முடித்த பிறகு தனது இயக்குநர் கனவை குடும்பத்தினரிடம் பகிர்ந்து கொண்டு, சிறிய குழுவுடன் இணைந்து கதையை உருவாக்கும் பணியில் ஈடுபட்டதாக அவர் தெரிவித்துள்ளார். ஆரம்ப கட்டத்தில் தனியாக அலுவலகம் கூட இல்லாமல், தொடர்ந்து விவாதங்கள் நடத்தி கதையை மேம்படுத்தியதாகவும் கூறியுள்ளார்.

தனது முதல் திரைப்படத்தை இயக்கத் தொடங்கியபோது ஏற்பட்ட பதற்றத்தையும் ஜேசன் சஞ்சய் வெளிப்படையாக பகிர்ந்துள்ளார். முதல் நாள் முதல் காட்சியை படமாக்கும்போது மிகவும் பதற்றமாக இருந்ததாகவும், முதல் ‘டேக்’ முடிந்த பிறகு பணியில் முழுமையாக ஈடுபட்டுவிட்டதாகவும் அவர் கூறியுள்ளார்.

படப்பிடிப்பு முடிவடைந்த நாள் தனக்கு மிகவும் உணர்ச்சிகரமான தருணமாக இருந்ததாகவும் ஜேசன் தெரிவித்துள்ளார். திரைப்படத்தை நிறைவு செய்ததில் மிகுந்த திருப்தி இருந்தாலும், தினமும் தன்னுடன் பணியாற்றிய படக்குழுவினரை இனி அடிக்கடி சந்திக்க முடியாது என்ற எண்ணம் சோகத்தை ஏற்படுத்தியதாகவும் அவர் குறிப்பிட்டுள்ளார்.

மேலும், ‘Sigma’ உருவாக தனது மாமா சஞ்சீவ் அளித்த ஆதரவைப் பற்றியும் ஜேசன் சஞ்சய் உணர்ச்சிபூர்வமாக பேசியுள்ளார். கல்லூரிப் படிப்பை முடித்த பிறகு தனது திரைப்பட யோசனையை மாமாவிடம் கூறி, “என்னுடன் இருப்பீர்களா?” என்று கேட்டபோது, எந்த தயக்கமும் இல்லாமல் அவர் ஆதரவளித்ததாக ஜேசன் தெரிவித்துள்ளார். இதனால் சஞ்சீவ் மீது தனக்கு மிகுந்த நம்பிக்கை ஏற்பட்டதாகவும் கூறியுள்ளார்.

‘Sigma’ திரைப்படம் ஜேசன் சஞ்சயின் திரையுலகப் பயணத்தில் முக்கியமான தொடக்கமாக அமைந்துள்ளது. குடும்பத்தின் பின்னணி குறித்த கவனத்தைத் தாண்டி, தனது படைப்பின் மூலம் தனக்கென ஒரு அடையாளத்தை உருவாக்க வேண்டும் என்பதே தனது நோக்கம் எனவும் அவர் தெரிவித்துள்ளார். படம் வெளியாகி சில நிமிடங்களுக்குப் பிறகு ரசிகர்கள் தன்னை தனது குடும்பத்தின் பின்னணியைக் கொண்டு அல்லாமல், இயக்குநர் ஜேசன் சஞ்சயாகவே பார்க்க வேண்டும் என்பதே தனது விருப்பம் என்றும் அவர் கூறியுள்ளார்.

‘Sigma’ திரைப்படம் அக்டோபர் 2, 2026 அன்று உலகம் முழுவதும் திரையரங்குகளில் வெளியாக உள்ளது. இப்படம் U/A சான்றிதழ் பெற்றுள்ளதாகவும் தகவல் வெளியாகியுள்ளது.

அஜித்துடன் கைகோர்க்கும் ‘மார்கோ’ ஹீரோ? ‘டேர் டெவில்’ படத்தில் திடீர் மாற்றம்!