தீபாவளி பண்டிகையை முன்னிட்டு கோவையில் ஜவுளி மற்றும் ஜவுளி சார்ந்த பொருட்களின் இறுதிக்கட்ட விற்பனை களைகட்டியுள்ளது. புத்தாடைகள் வாங்குவதற்காக நகரின் முக்கிய கடைவீதிகளில் பொதுமக்கள் கூட்டம் அலைமோதுவதால் கோவை மாநகரமே விழாக்கோலம் பூண்டுள்ளது.
கடைவீதிகளில் குவியும் பொதுமக்கள்
தீபாவளி பண்டிகை நாளை கொண்டாடப்பட உள்ள நிலையில், கோவை டவுன்ஹால், ஒப்பணக்கார வீதி, கிராஸ்கட் சாலை உள்ளிட்ட முக்கிய வணிகப் பகுதிகளில் காலை முதலே ஏராளமான பொதுமக்கள் குவிந்து வருகின்றனர். குறிப்பாக குடும்பம் குடும்பமாக கடைகளுக்கு வருகை தரும் மக்கள், தங்களுக்குத் தேவையான புத்தாடைகள், குழந்தைகளுக்கான ஆடைகள், பட்டாசுகள், இனிப்புகள், அணிகலன்கள் உள்ளிட்ட பொருட்களை ஆர்வத்துடன் வாங்கிச் செல்கின்றனர்.
இறுதிக்கட்ட விற்பனை தீவிரம்
கடந்த ஒரு வாரமாகவே கோவையின் முக்கிய கடைவீதிகளில் மக்கள் கூட்டம் அதிகரித்துக் காணப்பட்டது. குறிப்பாக வார இறுதி நாட்களில் விற்பனை விறுவிறுப்படைந்த நிலையில், தீபாவளி பண்டிகைக்கு இன்னும் ஒருநாள் மட்டுமே உள்ளதால் தற்போது இறுதிக்கட்ட விற்பனை உச்சத்தை எட்டியுள்ளது.
ஜவுளிக் கடைகளில் பல்வேறு ரகங்கள் மற்றும் வண்ணங்களில் ஆடைகள் விற்பனைக்கு வைக்கப்பட்டுள்ளதால் பொதுமக்கள் தங்களுக்குப் பிடித்தமான ஆடைகளைத் தேர்வு செய்து வாங்கிச் செல்கின்றனர்.
பண்டிகைக்கான கடைசி நேரக் கொள்முதல் என்பதால் கடைகளில் வாடிக்கையாளர்களின் வருகை தொடர்ந்து அதிகரித்து வருகிறது. இதனால் முக்கிய வணிக வீதிகளில் மக்கள் நடமாட்டம் அதிகரித்து, கடைகள் அனைத்தும் பரபரப்பாகக் காணப்படுகின்றன.
பாதுகாப்புப் பணியில் ஆயிரத்திற்கும் மேற்பட்ட போலீஸார்
இதற்கிடையே, தீபாவளி பண்டிகையையொட்டி கடைவீதிகளில் பொதுமக்களின் பாதுகாப்பை உறுதி செய்யும் வகையில் கோவை மாநகர காவல்துறை சார்பில் விரிவான பாதுகாப்பு ஏற்பாடுகள் செய்யப்பட்டுள்ளன.
டவுன்ஹால், ஒப்பணக்கார வீதி, கிராஸ்கட் சாலை உள்ளிட்ட மக்கள் அதிகம் கூடும் பகுதிகளில் ஏற்கெனவே ஆயிரத்திற்கும் மேற்பட்ட போலீஸார் பாதுகாப்புப் பணியில் ஈடுபடுத்தப்பட்டுள்ளனர்.
மேலும், குற்றச் சம்பவங்களைத் தடுக்கவும், பொதுமக்களின் உடைமைகளைப் பாதுகாக்கவும் போலீஸார் தீவிர கண்காணிப்பில் ஈடுபட்டு வருகின்றனர்.
போக்குவரத்து நெரிசலைக் கட்டுப்படுத்த நடவடிக்கை
கடைவீதிகளில் அதிகரித்து வரும் வாகனப் போக்குவரத்து மற்றும் மக்கள் கூட்டத்தைக் கருத்தில் கொண்டு போக்குவரத்து நெரிசலைக் கட்டுப்படுத்த கூடுதல் போக்குவரத்து போலீஸார் பணியில் ஈடுபடுத்தப்பட்டுள்ளனர்.
இவர்களுடன் தன்னார்வலர்களும் இணைந்து போக்குவரத்தை ஒழுங்குபடுத்தும் பணியில் ஈடுபட்டு வருகின்றனர்.
தீபாவளி பண்டிகையை மகிழ்ச்சியுடன் கொண்டாடுவதற்காக பொதுமக்கள் இறுதிக்கட்டப் பொருட்கள் வாங்குவதில் ஆர்வம் காட்டி வருவதால் கோவையின் முக்கிய வணிக வீதிகள் மக்கள் வெள்ளத்தில் காட்சியளிக்கின்றன. இதனால் கோவை மாநகரம் முழுவதும் தீபாவளிப் பண்டிகை உற்சாகம் களைகட்டியுள்ளது.