சென்னை மாதவரத்தில் நடத்தப்பட்ட வாகனச் சோதனையின்போது, ரூ.140 கோடி மதிப்புள்ள 70 கிலோ ஹெராயின் போதைப்பொருள் பறிமுதல் செய்யப்பட்டுள்ளது. இது தொடர்பாக இரண்டு பேரை கைது செய்துள்ள மத்திய வருவாய் புலனாய்வுத்துறை அதிகாரிகள், அவர்களிடம் தொடர்ந்து விசாரணை நடத்தி வருகின்றனர்.
வாகனச் சோதனையில் சிக்கிய போதைப்பொருள்
மாதவரம் பகுதியில் மத்திய வருவாய் புலனாய்வுத்துறை அதிகாரிகள் வாகனச் சோதனையில் ஈடுபட்டிருந்தனர். அப்போது சந்தேகத்திற்கிடமான வாகனத்தை நிறுத்தி சோதனை செய்தபோது, அதில் ஹெராயின் போதைப்பொருள் மறைத்து வைக்கப்பட்டிருந்தது தெரியவந்தது.
இதையடுத்து, சுமார் 70 கிலோ எடையுள்ள ஹெராயினை அதிகாரிகள் பறிமுதல் செய்தனர். சர்வதேச சந்தையில் இதன் மதிப்பு ரூ.140 கோடி எனக் கணக்கிடப்பட்டுள்ளது.
2 பேர் கைது – தீவிர விசாரணை
போதைப்பொருள் கடத்தல் தொடர்பாக இரண்டு பேரை கைது செய்துள்ள அதிகாரிகள், அவர்களிடம் விசாரணை மேற்கொண்டு வருகின்றனர். இந்த போதைப்பொருள் எங்கிருந்து கொண்டு வரப்பட்டது, யாருக்காகக் கடத்தப்பட்டது, இதன் பின்னணியில் வேறு யாருக்காவது தொடர்பு உள்ளதா என்பது குறித்து விசாரணை நடைபெற்று வருகிறது.
