Homeசெய்திகள்தமிழ்நாடுதிருப்பரங்குன்றம் தீபத்தூண் விவகாரம்: மதநல்லிணக்கத்தைக் காக்க வேண்டும் - முன்னாள் நீதிபதி ஹரிபரந்தாமன் வலியுறுத்தல்

திருப்பரங்குன்றம் தீபத்தூண் விவகாரம்: மதநல்லிணக்கத்தைக் காக்க வேண்டும் – முன்னாள் நீதிபதி ஹரிபரந்தாமன் வலியுறுத்தல்

-

- Advertisement -

திருப்பரங்குன்றம் தீபத்தூண் விவகாரம்: மதநல்லிணக்கத்தைக் காக்க வேண்டும் — முன்னாள் நீதிபதி ஹரிபரந்தாமன் வலியுறுத்தல்

​திருப்பரங்குன்றம் தீபத்தூண் விவகாரம் தொடர்பாக உச்ச நீதிமன்றத்தில் நடைபெற்று வரும் வழக்கு, மதநல்லிணக்கம் மற்றும் தமிழ்நாட்டின் அமைதியைக் கருத்தில் கொண்டு அணுகப்பட வேண்டும் என முன்னாள் நீதிபதி கே. ஹரிபரந்தாமன் தெரிவித்துள்ளார்.

பத்திரிகையாளர் சந்திப்பில் அவர் பேசிய முக்கியக் கருத்துகளின் தொகுப்பு வருமாறு:

​இடைக்கால மனு விசாரணையும் சிதம்பரம் வழக்கும்

உச்ச நீதிமன்றத்தில் தற்போது முழுமையான வழக்கு அல்லாமல், இடைக்கால மனு மீதான விசாரணையே நடைபெற்று வருகிறது. தனி நீதிபதி ஜி.ஆர். சுவாமிநாதன் மற்றும் அதனை உறுதி செய்த இரு நீதிபதிகள் அமர்வு (நீதிபதி ஜெயச்சந்திரன் அமர்வு) ஆகியோரின் உத்தரவுக்குத் தடை விதிக்கலாமா வேண்டாமா என்பதே விவாதிக்கப்படுகிறது. இதே அமர்வு பல நாட்களாக இம்மனுவை விசாரித்து வரும் நிலையில், சிதம்பரம் கோயில் விவகாரத்தில் நீதிபதி பாரதிதாசன் தலைமையிலான இடைக்காலக் குழு தொடர்பான தீர்ப்புக்கு நீதிபதி அரவிந்த் குமார் அமர்வு உடனடியாகத் தடை விதித்தது குறிப்பிடத்தக்கது. அமர்வுகளைத் தீர்மானிக்கும் அதிகாரம் உச்ச நீதிமன்றத் தலைமை நீதிபதியிடம் உள்ளது என்றும் அவர் சுட்டிக்காட்டினார்.

திருப்பரங்குன்றம் - உச்சநீதிமன்றம்

​தீபம் ஏற்றும் இடம் மற்றும் சர்வே கல் விவகாரம்

தீபம் ஏற்றுவதற்கு யாரும் எதிரானவர்கள் அல்ல; திருப்பரங்குன்றம் முருகன் கோயில் நிர்வாகத்தின் நிலைப்பாட்டையே தாங்கள் முன்வைப்பதாக ஹரிபரந்தாமன் தெரிவித்தார். சுமார் 150 ஆண்டுகளாக உச்சிப் பிள்ளையார் கோயில் பகுதியில்‌ தீபம் ஏற்றப்பட்டு வரும் நிலையில், அதனைத் தொடர்ந்து அங்கேயே ஏற்ற வேண்டும் என்பதே கோயிலின் கோரிக்கையாக உள்ளது.
​மலையின் மொத்த பரப்பளவான 172 ஏக்கரில், மலை உச்சியில் உள்ள தர்கா மற்றும் மசூதிப் பகுதிகள் 1923-ஆம் ஆண்டு வழக்கு மற்றும் பிரிவி கவுன்சில் தீர்ப்புகளில் குறிப்பிடப்பட்டுள்ளதை அவர் சுட்டிக்காட்டினார். சர்ச்சைக்குரிய தூண் எனக் கூறப்படுவது ‘சர்வே கல்’ (Survey stone) என்றும், அதற்கான ஆவணங்களை வழக்கறிஞர் வாஞ்சிநாதன் முன்னதாக உயர் நீதிமன்றத்தில் சமர்ப்பித்ததாகவும், தற்போது உச்ச நீதிமன்றத்தில் அரசும் அதைச் சர்வே கல் எனக் குறிப்பிட்டுள்ளதாகவும் அவர் கூறினார்.

​அமைதி காக்க வேண்டுகோள்

தூரத்தை அளவிடுவதில் பல்வேறு தரப்புகளிலும் மாறுபட்ட கருத்துகள் நிலவும் சூழலில், உண்மை வெளிவர வேண்டும். திருப்பரங்குன்றத்தை மற்றொரு ‘அயோத்தி’யாக மாற்றும் முயற்சிகளைத் தடுத்து, தமிழ்நாட்டில் மதநல்லிணக்கமும் சமூக அமைதியும் கெடாமல் பாதுகாக்க வேண்டும் என ஹரிபரந்தாமன் வலியுறுத்தினார். இந்த விவகாரத்தில் உச்ச நீதிமன்றம் எடுக்கும் எந்த முடிவாக இருந்தாலும், மாநிலத்தின் வளர்ச்சிக்கும் அமைதிக்கும் ஊடகங்களும் பொதுமக்களும் துணை நிற்க வேண்டும் என்றும் அவர் கேட்டுக்கொண்டார் .

திருப்பரங்குன்றம் மலை உச்சியில் தீபம் ஏற்ற இடைக்காலத் தடை: உச்சநீதிமன்றம் அதிரடி..!

MUST READ