கேங்கர்ஸ் படத்தின் டிரைலர் வெளியாகி உள்ளது.
தமிழ் சினிமாவில் நகைச்சுவை என்றாலே நம் நினைவுக்கு வருவது வடிவேலு தான். அந்த அளவிற்கு இவருடைய நகைச்சுவைகள் குழந்தைகள் முதல் பெரியவர்கள் வரை அனைவருக்கும் ஃபேவரைட். இருப்பினும் ஒரு சில காரணங்களால் நடிகர் வடிவேலுவுக்கு பட வாய்ப்புகள் குறைய தொடங்கிய நிலையில் இவரது நடிப்பில் வெளியான நாய் சேகர் ரிட்டன்ஸ் போன்ற படங்களும் தோல்வியை சந்தித்தது. அதேசமயம் கடந்த 2023 இல் மாரி செல்வராஜ் இயக்கத்தில் வெளியான மாமன்னன் திரைப்படத்தில் நடித்து பெயரையும் புகழையும் பெற்றார்.
இந்த படத்தில் முழுக்க முழுக்க சீரியஸான கதாபாத்திரத்தில் நடித்திருந்தார் வடிவேலு. மேலும் மாரீசன் என்ற திரைப்படத்தையும் கைவசம் வைத்துள்ளார். இந்த படம் 2025 ஜூலை மாதத்தில் திரைக்கு வர தயாராகி வருகிறது. இதற்கிடையில் இவர் சுந்தர்.சி இயக்கத்தில் கேங்கர்ஸ் எனும் திரைப்படத்தில் நடித்துள்ளார். காமெடி கலந்த கதைக்களத்தில் ஆகியுள்ள இந்த படத்தில் சுந்தர். சி முன்னணி கதாபாத்திரத்தில் நடிக்க கேத்தரின் தெரசா, வாணி போஜன், முனீஸ்காந்த் ஆகியோரும் இப்படத்தில் நடித்திருக்கின்றனர்.
இந்த படத்தை அவ்னி சினிமாக்ஸ் நிறுவனம் தயாரிக்க சத்யா. சி இசையமைத்துள்ளார். வெங்கட் ராகவன் இதன் ஒளிப்பதிவு பணிகளை மேற்கொண்டுள்ளார். ஏற்கனவே இந்த படத்தின் படப்பிடிப்புகள் நிறைவடைந்த நிலையில் படமானது வருகின்ற ஏப்ரல் 24ஆம் தேதி திரைக்கு வர இருக்கிறது.
இந்நிலையில் இந்த படத்தின் டிரைலரை படக்குழு வெளியிட்டுள்ளது. இந்த ட்ரெய்லரை பார்க்கும்போது இந்த படம் சுந்தர்.சி- யின் மற்ற படங்களை போல் காமெடி கலந்த கதைக்களத்தில் உருவாகி இருப்பது உறுதி செய்யப்பட்டுள்ளது. மேலும் இந்த படம் கொள்ளையடித்தல் சம்பந்தமான கதைக்களம் போல் தெரிகிறது. ஏற்கனவே வெளியான தகவலின் படி இந்த படத்தில் நடிகர் வடிவேலு லேடி கெட்டப் உள்ளட்ட பல கெட்டப்புகளில் நடித்திருக்கிறார். இந்த ட்ரெய்லர் தற்போது ரசிகர்களின் கவனம் ஈர்த்து இணையத்தில் வைரலாகி வருகிறது.