குடும்பத்தினர் குறித்து யூடியூபில் அவதூறு… நடிகர் அருண் விஜய் புகார்…

தமிழ் திரையுலகில் வில்லனாக பயணத்தை தொடங்கி பின் கதாநாயகனாகவும், குணச்சித்திர வேடத்திலும் கலக்கிய நடிகர் விஜயகுமார். சுமார் 400 திரைப்படங்களில் நடித்துள்ள இவருக்கு அருண்விஜய், கவிதா, அனிதா, வனிதா, பிரிதா, ஸ்ரீதேவி ஆகிய குழந்தைகள் உள்ளனர். கோலிவுட்டை கலக்கிய அவர் கடந்த சில ஆண்டுகளுக்கு முன்பாகவே வெள்ளித்திரையிலிருந்து சின்னத்திரைக்கு வந்துவிட்டார். சன் தொலைக்காட்சியில் ஒளிபரப்பான தங்கம் தொடரில், ரம்யா கிருஷ்ணனுக்கு அப்பாவாக நடித்திருப்பார்.

இவரது மூத்த மகன் அருண் விஜய் தமிழ் சினிமாவில் முன்னணி நடிகராக வலம் வருகிறார். இவரும் விஜயகுமாரும் இணைந்து, பாண்டவர் பூமி , மலாய் மலாய் , மஞ்சா வேலு, குற்றம் 23 மற்றும் ஓ மை டாக் உள்பட பல படங்களில் நடித்திருக்கின்றனர். அஜித் நடிப்பில் வெளியான என்னை அறிந்தால் திரைப்படத்தில் அருண் விஜய் முதன்முதலாக வில்லன் வேடத்தில் நடித்திருப்பார். இப்படத்தில் நடிகர் அருண் விஜயின் நடிப்பு பெரிதளவில் பாராட்டப்பட்டது

அருண் விஜய் நடிப்பில் இறுதியாக திரைக்கு வந்த திரைப்படம் மிஷன் சேப்டர் 1. இப்படத்தை விஜய் இயக்கி இருந்தார். இத்திரைப்படம் ரசிகர்கள் மத்தியில் நல்ல வரவேற்பை பெற்றது. மேலும், அண்மையில் விஜயகுமாரின் மகளும், அருண் விஜய்யின் அக்காவுமான அனிதாவின் மகள் தியாவிற்கு கோலாகலமாக சென்னையில் திருமணம் நடைபெற்று முடிந்தது. இந்நிலையில், நடிகர் அருண் விஜய், தன்னைப் பற்றியும், தனது குடும்பத்தினர் குறித்தும் யூ டியூப்பில் அவதூறாக சர்ச்சைகளை பதிவிடும் நபர்கள் மீது நடவடிக்கை எடுக்கக்கோரி, சென்னை காவல் ஆணையர் அலுவலகத்தில் புகார் அளித்துள்ளார். இச்சம்பவம் பரபரப்பை ஏற்படுத்தி இருக்கிறது.