‘டியூட்’ படத்திலிருந்து அந்த பாடலை நீக்க சென்னை உயர்நீதிமன்றம் உத்தரவு!

டியூட் படத்திலிருந்து பாடல் ஒன்றை நீக்க சென்னை உயர்நீதிமன்றம் உத்தரவிட்டுள்ளது.

கடந்த அக்டோபர் 17ஆம் தேதி பிரதீப் ரங்கநாதன் நடிப்பில் டியூட் திரைப்படம் வெளியானது. இந்த படத்தை அறிமுக இயக்குனர் கீர்த்தீஸ்வரன் இயக்க மைத்ரி மூவி மேக்கர்ஸ் நிறுவனம் படத்தை தயாரித்திருந்தது. சாய் அபியங்கர் இதற்கு இசையமைத்திருந்தார். காதல், காமெடி, ஆக்சன், எமோஷன் என அனைத்தும் கலந்த கமர்சியல் படமாக வெளியான இந்த படத்தில் மமிதா பைஜு, ரோகினி, சரத்குமார் மற்றும் பலர் நடித்திருந்தனர். இந்த படமும், படத்தில் இடம்பெற்ற பாடல்களும் இளைஞர்களை வெகுவாக கவர்ந்து சூப்பர் டூப்பர் ஹிட் அடித்தது. அதிலும் இந்த படத்தில் இடம் பெற்றிருந்த இளையராஜாவின் ‘கருத்த மச்சான்’ பாடலுக்கு பலரும் ரீல்ஸ் செய்து பாடலை ட்ரெண்டாக்கி வருகின்றனர். இந்நிலையில்தான் இசைஞானி இளையராஜா இந்த படத்தில் இடம்பெற்றிருந்த ‘கருத்த மச்சான்’ பாடலும், 100 வருஷம் இந்த மாப்பிள்ளையும் பாடலும் தனது அனுமதி இல்லாமல் பயன்படுத்தப்பட்டிருப்பதாக கூறி சென்னை உயர் நீதிமன்றத்தில் மனு தாக்கல் செய்திருந்தார். அந்த மனுவில் இந்த 2 பாடல்களையும் நீக்கக்கோரி குறிப்பிடப்பட்டிருந்தது. மேலும் இந்த வழக்கை விசாரித்த நீதிபதி 30 ஆண்டுகளுக்குப் பிறகு ட்ரெண்டாகும் பாடலால் இளையராஜாவிற்கு என்ன பாதிப்பு? என்ற கேள்வி எழுப்பியதுடன் இது தொடர்பான உத்தரவை தேதி குறிப்பிடாமல் ஒத்திவைத்தார்.
இந்நிலையில் இளையராஜா இசையமைத்திருந்த ‘கருத்த மச்சான்’ பாடலை ‘டியூட்’ படத்திலிருந்து நீக்க சென்னை உயர்நீதிமன்றம் உத்தரவு பிறப்பித்துள்ளது. ஏற்கனவே ‘குட் பேட் அக்லி’ படத்தில் தன்னுடைய பாடல்கள் அனுமதியின்றி பயன்படுத்தப்பட்டு இருப்பதாக இளையராஜா தொடர்ந்த வழக்கில் அந்த பாடல்களும் இது போன்று நீக்கப்பட்டது குறிப்பிடத்தக்கது.