விஜய் சேதுபதி மகன் சூர்யா நடித்த பீனிக்ஸ் படத்தின் ஓடிடி ரிலீஸ் குறித்த அப்டேட் வெளியாகியுள்ளது.
தமிழ் சினிமாவின் தவிர்க்க முடியாத நடிகர்களில் ஒருவராக வலம் வரும் விஜய் சேதுபதியின் மகன் சூர்யா ஏற்கனவே 2019-ல் வெளியான ‘சிந்துபாத்’ திரைப்படத்தில் விஜய் சேதுபதியுடன் இணைந்து நடித்திருந்தார். அதன் பின்னர் குண்டான தனது தோற்றத்தை குறைத்து ஸ்லிம்மாக மாறி ஹீரோவாக அறிமுகமானார். அந்த வகையில் இவர், அனல் அரசு இயக்கத்தில் வெளியான ‘பீனிக்ஸ்’ திரைப்படத்தில் நடித்திருந்தார். இதில் சூர்யாவுடன் இணைந்து வரலட்சுமி சரத்குமார், தேவதர்ஷினி, ஹரிஷ் உத்தமன் மற்றும் பலர் நடித்திருந்தனர். ஏ.கே. பிரேவ் மேன் பிக்சர்ஸ் நிறுவனம் இந்த படத்தை தயாரிக்க சாம் .சி.எஸ் இதற்கு இசையமைத்திருந்தார். ஆக்ஷன் திரில்லர் ஜானரில் உருவாகியிருந்த இந்த படம் கடந்த ஜூலை 4ஆம் தேதி திரையிடப்பட்டது.
இந்த படத்தில் சூர்யாவின் ஆக்ஷன் காட்சிகள் கவனிக்க கூடியதாக இருந்தாலும் திரைக்கதை ஏமாற்றம் அளித்ததால் இந்த படம் ரசிகர்கள் மத்தியில் கலவையான விமர்சனங்களை பெற்றது. இந்நிலையில் இப்படம் விரைவில் டென்ட் கொட்டா தளத்தில் வெளியாகும் என அறிவிக்கப்பட்டுள்ளது. அதன்படி அடுத்த வாரம் இப்படம் ஓடிடியில் வெளியாகும் என எதிர்பார்க்கப்படுகிறது.