மதுரை மாவட்டம் செக்கானூரணி காவல் நிலையக் கழிவறையில் விசாரணைக்காக அழைத்து வரப்பட்ட லாரி ஓட்டுநர் தூக்கிட்டுத் தற்கொலை செய்து கொண்ட சம்பவம் பெரும் பரபரப்பை ஏற்படுத்தியுள்ளது.
லாரி தீப்பிடித்து எரிந்தது தொடர்பாகப் புகார் அளித்திருந்த ஓட்டுநரிடம் ஏற்பட்ட சந்தேகத்தின் அடிப்படையில் போலீசார் விசாரணை மேற்கொண்ட நிலையில், அவர் காவல் நிலையத்திலேயே உயிரிழந்துள்ளார். இதையடுத்து மதுரை மாவட்ட காவல் கண்காணிப்பாளர் தேவநாதன் நேரில் சென்று விசாரணை நடத்தி வருகிறார்.
லாரி தீப்பிடித்தது தொடர்பாகப் புகார்
தேனி மாவட்டம் தேவாரத்தைச் சேர்ந்த பாலகிருஷ்ணன், ஏலக்காய் வியாபாரி ஒருவரிடம் லாரி ஓட்டுநராகப் பணியாற்றி வந்துள்ளார். கடந்த நான்கு நாட்களுக்கு முன்பு ஏலக்காய் மூட்டைகளை லாரியில் ஏற்றிக்கொண்டு உசிலம்பட்டி அருகே உள்ள வாலாந்தூர் பகுதியில் சென்று கொண்டிருந்தபோது, லாரி திடீரென தீப்பிடித்து எரிந்ததாகக் கூறப்படுகிறது. இந்தச் சம்பவம் தொடர்பாக பாலகிருஷ்ணன் வாலாந்தூர் காவல் நிலையத்தில் புகார் அளித்திருந்தார்.
விசாரணைக்காக காவல் நிலையத்திற்கு அழைப்பு
பாலகிருஷ்ணன் அளித்த புகாரில் சில சந்தேகங்களும் முரண்பாடுகளும் இருப்பதாகக் கருதிய செக்கானூரணி காவல்துறையினர், அவரை விசாரணைக்காக நேற்று இரவு காவல் நிலையத்திற்கு அழைத்து வந்துள்ளனர். அங்கு காவல் ஆய்வாளர் அறையில் அவர் அமர வைக்கப்பட்டிருந்ததாகக் கூறப்படுகிறது.
இதற்கிடையே, பாலகிருஷ்ணன் தெரிவித்த தகவல்களின் அடிப்படையில் லாரி தீப்பிடித்த சம்பவம் நடைபெற்ற இடத்தில் உள்ள கண்காணிப்பு கேமரா காட்சிகளை ஆய்வு செய்வதற்காக இன்று அதிகாலை போலீசார் காவல் நிலையத்திலிருந்து வெளியே சென்றுள்ளனர்.
காவல் நிலையக் கழிவறையில் தூக்கிட்டு உயிரிழப்பு
பின்னர் போலீசார் மீண்டும் காவல் நிலையத்திற்குத் திரும்பி வந்து பார்த்தபோது, பாலகிருஷ்ணன் அங்குள்ள கழிவறையில் தூக்கிட்ட நிலையில் உயிரிழந்து கிடந்தது தெரியவந்ததாகக் கூறப்படுகிறது. காவல் நிலையத்திற்குள் விசாரணைக்காக அழைத்து வரப்பட்ட நபர் அங்கேயே உயிரிழந்த சம்பவம் காவல்துறையினர் மத்தியில் அதிர்ச்சியை ஏற்படுத்தியுள்ளது.
மாவட்ட காவல் கண்காணிப்பாளர் நேரில் விசாரணை
முதற்கட்ட விசாரணையில், லாரி தீப்பிடித்த சம்பவம் தொடர்பாகத் தான் அளித்த புகாரில் முரண்பாடுகள் ஏற்பட்டதால் போலீசாரிடம் சிக்கிக்கொண்டதாகக் கருதி ஏற்பட்ட அச்சத்தில் பாலகிருஷ்ணன் தற்கொலை செய்திருக்கலாம் எனக் காவல்துறை தரப்பில் தெரிவிக்கப்பட்டுள்ளதாகக் கூறப்படுகிறது. இருப்பினும், அவரது உயிரிழப்புக்கான உண்மையான காரணம் குறித்து உரிய விசாரணைக்குப் பிறகே உறுதிப்படுத்த முடியும்.
இந்தச் சம்பவத்தைத் தொடர்ந்து மதுரை மாவட்ட காவல் கண்காணிப்பாளர் தேவநாதன் செக்கானூரணி காவல் நிலையத்திற்கு நேரில் சென்று விசாரணை மேற்கொண்டு வருகிறார். காவல் நிலைய வளாகத்தில் பலத்த போலீஸ் பாதுகாப்பும் போடப்பட்டுள்ளது. காவல் நிலையத்திற்குள் விசாரணைக்கு அழைத்து வரப்பட்ட நபர் உயிரி
ழந்துள்ள சம்பவம் அப்பகுதியில் பெரும் பரபரப்பை ஏற்படுத்தியுள்ளதுடன், இந்த மரணம் தொடர்பாக வெளிப்படையான விசாரணை நடத்தப்பட வேண்டும் என்ற எதிர்பார்ப்பும் எழுந்துள்ளது.