திருப்பூர் மாவட்டம் பல்லடம் அடுத்த சுக்கம்பாளையம் ஊராட்சியில் கடந்த 6 மாதங்களுக்கும் மேலாகக் குடிநீர் விநியோகம் சீராக நடைபெறவில்லை எனக் கூறி, அப்பகுதி பொதுமக்கள் காலி குடங்களுடன் கோவை – திருச்சி தேசிய நெடுஞ்சாலையில் அமர்ந்து திடீர் சாலை மறியல் போராட்டத்தில் ஈடுபட்டனர். இப்போராட்டத்தால் அப்பகுதியில் சுமார் ஒரு மணி நேரத்திற்கும் மேலாகப் போக்குவரத்து கடுமையாகப் பாதிக்கப்பட்டது.
6 மாதங்களாக நீடிக்கும் குடிநீர் தசனம்!
சுக்கம்பாளையம் ஊராட்சிக்கு உட்பட்ட பகுதிகளில் 500-க்கும் மேற்பட்ட குடும்பங்கள் வசித்து வருகின்றன. இப்பகுதிக்கு கடந்த 6 மாதங்களுக்கும் மேலாகச் சீரான முறையில் குடிநீர் விநியோகம் செய்யப்படவில்லை எனக் கூறப்படுகிறது.
குடிநீர் விநியோகத்தை உடனடியாகச் சீரமைக்கக் கோரி அப்பகுதி மக்கள் ஊராட்சி மன்ற நிர்வாகத்திற்கும், சம்மந்தப்பட்ட துறை அதிகாரிகளுக்கும் பலமுறை கோரிக்கை மனுக்கள் அளித்துள்ளனர். இருப்பினும், எந்தவித நடவடிக்கையும் எடுக்கப்படவில்லை என்று பொதுமக்கள் குற்றம்சாட்டுகின்றனர்.
காலி குடங்களுடன் திரண்ட மக்கள்:
அதிகாரிகளின் தொடர்ச்சியான அலட்சியப் போக்கைக் கண்டித்து, ஆத்திரமடைந்த சுக்கம்பாளையம் கிராமத்தைச் சேர்ந்த பெண்கள், முதியவர்கள் மற்றும் இளைஞர்கள் உள்ளிட்ட 100-க்கும் மேற்பட்டோர் காலி குடங்களுடன் திடீரெனத் திரண்டு வந்து கோவை – திருச்சி தேசிய நெடுஞ்சாலையில் அமர்ந்து போராட்டத்தில் குதித்தனர்.
“பஞ்சாயத்து சார்பில் குடிநீர் வழங்கப்படாததால், அன்றாடத் தேவைகளுக்கும் சமையலுக்கும் கூட காசு கொடுத்து விலைக்குத் தண்ணீர் வாங்கும் அவல நிலைக்குத் தள்ளப்பட்டுள்ளோம்” என்று கிராம மக்கள் கண்ணீருடன் வேதனை தெரிவித்தனர்.
குடிநீர் இன்றி பள்ளிச் செல்லும் குழந்தைகள், பணிக்குச் செல்லும் நபர்கள் மற்றும் முதியவர்கள் படும் அவதி எல்லையற்றது எனவும் அவர்கள் தெரிவித்தனர்.
பஞ்சாயத்து நிர்வாகத்தின் அலட்சியப் போக்கைக் கண்டித்து சாலை நடுவே அமர்ந்து கண்டனக் கோஷங்களை எழுப்பினர்.
போக்குவரத்து ஸ்தம்பித்தது!
கோவை – திருச்சி தேசிய நெடுஞ்சாலை எப்போதும் பிஸியான முக்கியப் போக்குவரத்துப் பாதையாகும். இந்த திடீர் மறியல் போராட்டத்தால் சாலையின் இருபுறமும் நூற்றுக்கணக்கான வாகனங்கள் நீண்ட வரிசையில் அணிவகுத்து நின்றன; இதனால் அப்பகுதியில் கடுமையான போக்குவரத்து நெரிசல் ஏற்பட்டு வாகன ஓட்டிகள் பெரும் அவதிக்குள்ளாகினர்.
போலீசாரின் சமரசத் பேச்சுவார்த்தை:
சம்பவம் குறித்துத் தகவல் அறிந்ததும், பல்லடம் துணைக் காவல் கண்காணிப்பாளர் (DSP) பார்த்திபன் தலைமையிலான காவல் துறையினர் உடனடியாக விரைந்து சென்று போராட்டத்தில் ஈடுபட்ட பொதுமக்களிடம் பேச்சுவார்த்தை நடத்தினர்.
அதிகாரிகளிடம் பேசி லாரிகள் மூலமாகவும், குழாய்கள் மூலமாகவும் தடையின்றி உடனடியாகக் குடிநீர் விநியோகம் செய்யத் தேவையான நடவடிக்கை எடுக்கப்படும் என காவல் துறை அதிகாரிகள் உறுதியளித்தனர்.
இதனை ஏற்றுக்கொண்ட பொதுமக்கள் தங்கள் சாலை மறியல் போராட்டத்தைக் கைவிட்டு அமைதியாகக் கலைந்து சென்றனர்.தைத் தொடர்ந்து அப்பகுதியில் போக்குவரத்து சீரமைக்கப்பட்டது.
இருப்பினும், உடனடியாகக் குடிநீர் விநியோகம் வழங்கப்படவில்லை என்றால் மீண்டும் மிகப்பெரிய அளவில் போராட்டம் வெடிக்கும் என அப்பகுதி மக்கள் எச்சரிக்கை விடுத்துள்ளதால் அப்பகுதியில் தொடர்ந்து பரபரப்பு நிலவுகிறது.
கேரளத்தில் தொடர் மழை; பலி எண்ணிக்கை 20 ஆக உயர்வு – 12 மாவட்டங்களுக்கு ஆரஞ்சு எச்சரிக்கை!