உத்தரப்பிரதேசம் மாநிலம் அயோத்தியில் அமைந்துள்ள புகழ்பெற்ற ராமர் கோவிலில் பெரும் நிதி முறைகேடுகள் நடந்துள்ளதாகக் கூறப்படும் விவகாரத்தில், சிறப்பு விசாரணை நடத்தக் கோரிய மனுக்களை விசாரிக்க அலகாபாத் உயர்நீதிமன்றம் மறுப்பு தெரிவித்துள்ளது.
அயோத்தி ராமர் கோவிலுக்கு நாடு முழுவதிலும் இருந்து பக்தர்கள் வழங்கிய தங்கம், வெள்ளி மற்றும் ரொக்கப் பணம் உள்ளிட்ட காணிக்கைகளில் முறைகேடுகள் செய்யப்பட்டுள்ளதாக அண்மையில் புகார்கள் எழுந்தன. இந்த நிதி முறைகேட்டின் மதிப்பு ₹200 கோடிக்கும் அதிகமாக இருக்கும் என்று ஊடகங்களில் செய்திகள் வெளியாகி பெரும் பரபரப்பை ஏற்படுத்தின. இதனைத் தொடர்ந்து, இந்த முறைகேடு விவகாரம் குறித்து ஓய்வுபெற்ற நீதிபதி தலைமையிலான நீதித்துறை ஆணையம் அல்லது சிறப்புப் புலனாய்வுக் குழு (SIT) அமைத்து விரிவான விசாரணை நடத்த உத்தரவிட வேண்டும் என்று அலகாபாத் உயர்நீதிமன்றத்தில் இரண்டு பொதுநல மனுக்கள் தாக்கல் செய்யப்பட்டன.
இந்த மனுக்கள் இன்று அலகாபாத் உயர்நீதிமன்ற நீதிபதிகள் அமர்வு முன்பாக விசாரணைக்கு பட்டியலிடப்பட்டிருந்தன. அப்போது வழக்கை விசாரித்த நீதிபதிகள், இந்த மனுக்கள் மீதான விசாரணையை மேற்கொள்ள முடியாது என்று கூறி அவற்றை தள்ளுபடி செய்து உத்தரவிட்டனர். இதே கோரிக்கைகள் மற்றும் குற்றச்சாட்டுகளை உள்ளடக்கிய ரிட் மனுக்கள், இந்திய அரசியலமைப்பின் 32-ஆவது பிரிவின் கீழ் ஏற்கனவே உச்ச நீதிமன்றத்தில் தாக்கல் செய்யப்பட்டு நிலுவையில் உள்ளதை நீதிபதிகள் சுட்டிக்காட்டினர். ஒரே விவகாரம் தொடர்பாக உச்ச நீதிமன்றத்தில் வழக்கு நிலுவையில் இருக்கும்போது, உயர்நீதிமன்றம் இதில் தலையிட்டு விசாரணை நடத்த முடியாது என்று நீதிபதிகள் தங்களது உத்தரவில் தெளிவுபடுத்தியுள்ளனர். முன்னதாக, கடந்த ஜூலை 7-ஆம் தேதியும் இதே போன்ற கருத்துக்களுடன் தாக்கல் செய்யப்பட்டிருந்த மற்றொரு பொதுநல மனுவையும் அலகாபாத் உயர்நீதிமன்றம் தள்ளுபடி செய்திருந்தது குறிப்பிடத்தக்கது. உயர்நீதிமன்றத்தின் இந்த உத்தரவைத் தொடர்ந்து, இந்த விவகாரத்தில் உச்ச நீதிமன்றத்தின் அடுத்தகட்ட நடவடிக்கைகள் என்னவாக இருக்கும் என்ற எதிர்பார்ப்பு எழுந்துள்ளது.
“ராமர் கோவில் ஊழலுக்கு பிரதமரே பொறுப்பேற்க வேண்டும்!” – காங்கிரஸ் மூத்த தலைவர் ராஜீவ் கவுடா சாடல்
