தமிழ்த்தாய் வாழ்த்து புறக்கணிப்பா? மதுரையில் ஆளுநர் பங்கேற்ற விழாவில் ‘வந்தே மாதரம்’ முதலில் பாடப்பட்டதால் சர்ச்சை

மதுரையில் தமிழக ஆளுநர் ராஜேந்திர விஸ்வநாத் அர்லேகர் கலந்து கொண்ட கல்லூரி விழாவில், வழக்கமாக முதலில் பாடப்பட வேண்டிய ‘தமிழ்த்தாய் வாழ்த்து’ மூன்றாவது பாடலாகப் பாடப்பட்ட சம்பவம் பெரும் ஏமாற்றத்தையும் சர்ச்சையையும் ஏற்படுத்தியுள்ளது.
​

வேர்களைத் தேடி விருது வழங்கும் விழா:
​தென்னிந்திய கல்வி மையம் சார்பில், நேதாஜி சுபாஷ் சந்திர போஸின் (INA) படையில் இடம்பெற்ற தமிழகத்தைச் சேர்ந்த சுதந்திரப் போராட்ட வீரர்களின் வாழ்க்கை வரலாறு குறித்த கட்டுரை மற்றும் குறும்படப் போட்டிகள் நடத்தப்பட்டன. இதில் வெற்றி பெற்றவர்களுக்கு ‘வேர்களைத் தேடி’ என்ற தலைப்பில் விருதுகள் வழங்கும் விழா மதுரை சௌராஷ்ட்ரா கல்லூரியில் நடைபெற்றது.
​இந்த விழாவில் தமிழக ஆளுநர் ராஜேந்திர விஸ்வநாத் அர்லேகர் சிறப்பு விருந்தினராகக் கலந்து கொண்டு மாணவ-மாணவிகளுக்குப் பரிசுகளை வழங்கினார். சிறப்பு அழைப்பாளராக ‘கீர்த்தி சக்ரா’ விருது பெற்ற லான்ஸ் நாயக் மீனாட்சிசுந்தரம், சௌராஷ்ட்ரா கல்லூரி தாளாளர் சந்தீப் குமார், செயலாளர் குமரேஷ் மற்றும் கல்லூரி நிர்வாக உறுப்பினர்கள் பலர் கலந்து கொண்டனர்.
​

திடீரென மாற்றப்பட்ட நெறிமுறை – அதிர்ச்சி:
​தமிழக அரசு நெறிமுறைகளின்படி, தமிழ்நாட்டில் நடைபெறும் அனைத்து அரசு மற்றும் கல்வி நிறுவன விழாக்களின் தொடக்கத்தில் ‘தமிழ்த்தாய் வாழ்த்து’ பாடப்பட வேண்டும் என்பது கட்டாய விதியாகும்.
​ஆனால், இந்த விழாவில் தமிழ்த்தாய் வாழ்த்துக்குப் பதிலாக, முதலாவதாக ‘வந்தே மாதரம்’ பாடல் பாடப்பட்டது. அதனைத் தொடர்ந்து இரண்டாவதாக ‘தேசிய கீதம்’ பாடப்பட்டது. இறுதியாக, விழாத் தொடக்கத்தில் பாடப்பட வேண்டிய ‘தமிழ்த்தாய் வாழ்த்து’ மூன்றாவதாகப் பாடப்பட்டது. இந்த வரிசை மாற்றம், ஒன்றிய அரசின் இந்தி/சமஸ்கிருத திணிப்பு மற்றும் மாநில மரபுகளை எதிர்ப்பதன் வெளிப்பாடாகவே இருப்பதாக சமூக ஆர்வலர்களிடையே ஏமாற்றத்தையும் அதிருப்தியையும் ஏற்படுத்தியுள்ளது.

​வெற்றி பெற்ற மாணவர்களுக்கு ஆளுநர் பரிசு:
​சர்ச்சைக்குரிய இந்தத் தொடக்கத்திற்குப் பின் போட்டிகளில் வெற்றி பெற்ற மாணவர்களுக்கு ஆளுநர் பரிசுகளை வழங்கினார்.
​

கட்டுரைப் போட்டி:
​முதல் பரிசு: யுவ விக்ரம் (சென்னை திறந்தவெளி பல்கலைக்கழகம்)
​இரண்டாம் பரிசு: அஷ்மதி ஜெருஷா (செட்டிநாடு வேளாண்மை கல்லூரி ஆராய்ச்சி மையம்)
​மூன்றாம் பரிசு: வேத க்ஷயா (சென்னை சர்வதேச இதய மையம்)
​

குறும்படப் போட்டி:
​முதல் பரிசு: அவ்வதிகா ஹரிணி (செட்டிநாடு வேளாண்மை கல்லூரி)
​இரண்டாம் பரிசு: யுவராஜ் குமார் (கள்ளக்குறிச்சி அரசு மருத்துவக் கல்லூரி)
​மூன்றாம் பரிசு: ஜெகதீஸ்வரன் (சென்னை ராமகிருஷ்ணா பாலிடெக்னிக் கல்லூரி)
​ஆளுநர் பங்கேற்ற விழாவில் மாநில அரசின் வழிகாட்டு நெறிமுறைகள் மீறப்பட்டு, தமிழ்த்தாய் வாழ்த்து பின்னுக்குத் தள்ளப்பட்ட விவகாரம் தற்பொழுது அரசியல் மற்றும் சமூக வலைதள வட்டாரங்களில் புதிய விவாதத்தைக் கிளப்பியுள்ளது.