வாக்குச்சாவடிகளை பலப்படுத்தும் திமுகவின் என் வாக்குச்சாவடி வெற்றி வாக்குச்சாவடி பரப்புரை நாளை தொடங்குகிறது.
திமுகவின் என் வாக்குச்சாவடி வெற்றி வாக்குச்சாவடி பரப்புரை நாளை தொடங்க உள்ளது. தமிழ்நாடு முழுவதும் வாக்குச்சாவடி அளவில் வியூகம் வகுக்க திட்டமிடப்பட்டுள்ளது. “வாக்குச்சாவடியை வென்றால் தொகுதியை வெல்லலாம்” என நேற்று மாவட்டச் செயலாளர்கள் கூட்டத்தில் முதலமைச்சர் பேசியுள்ளாா்.
மேலும், “ என் வாக்குச்சாவடி – வெற்றி வாக்குச்சாவடி என்பது வெற்றியை உறுதிப்படுத்துவதற்கான திமுகவின் தேர்தல் பணியாகும். ஒவ்வொரு வாக்குச்சாவடியிலும் திமுகவினரை உற்சாகத்துடன் செயல்பட வைக்கும் திட்டம். அந்தந்த வாக்குச்சாவடிக்குட்பட்ட மாநில நிர்வாகி முதல், வார்டு மற்றும் கிளைச் செயலாளர்கள் வரை அனைவரும் கூட்டங்களில் பங்கேற்கவுள்ளனர். அந்த வாக்குச்சாவடியில் மூத்த திமுக முன்னோடிகள் அல்லது ஏதேனும் அதிருப்தியாளர்கள் இருந்தால், அவர்களையும் தவறவிடாமல் அழைக்கப்பட வேண்டும் என அறிவுறுத்தப்பட்டுள்ளது.
தேனாம்பேட்டையில், என் வாக்குச்சாவடியில் பகுதிச்செயலாளர் தலைமையில் நடைபெறும் கூட்டத்தில் முதலமைச்சரும் பங்கேற்கவுள்ளார். வீடு வீடாகச் செல்லும் பூத் கமிட்டி குழுக்களில் மகளிர் கட்டாயம் இடம்பெறவுள்ளனர். ஒவ்வொரு பூத் கமிட்டி உறுப்பினரும் வீடு வீடாகச் செல்லவுள்ளனர். வீடுவீடாக சென்று விடுபட்ட வாக்காளர்களின் விவரங்களை முறையாக சரிபார்ப்பதுடன், ஒவ்வொரு வீட்டிலும், திராவிட மாடல் அரசின் சாதனைகள் அடங்கிய துண்டறிக்கைகள் வழங்கப்படவுள்ளது. ஒரு வாக்குச்சாவடியை வென்றால், ஒரு தொகுதியை வெல்லலாம். எனவே, இந்தத் தேர்தலில் ஒவ்வொரு வாக்குச்சாவடியும் மிக முக்கியமானது என மு.க.ஸ்டாலின் தெரிவித்திருந்தார்.