இந்தியா முழுவதும் பால் உற்பத்தி கடுமையான பாதிப்பைச் சந்தித்து வரும் நிலையில், தமிழ்நாட்டிலும் வரும் மாதங்களில் வரலாறு காணாத வகையில் பால் தட்டுப்பாடு ஏற்படும் அபாயம் உருவாகியுள்ளது. இதன் நேரடி விளைவாக, நடப்பாண்டில் இரண்டாவது முறையாகத் தனியார் நிறுவனப் பால் மற்றும் தயிர் விற்பனை விலை லிட்டருக்கு ரூ.4.00 வரை உயர்த்தப்பட்டுள்ளது. இந்த அதிரடி விலை உயர்வு நாளை (வியாழக்கிழமை, 09.07.2026) முதல் மாநிலம் முழுவதும் அமலுக்கு வருகிறது.
இது குறித்துத் தமிழ்நாடு பால் முகவர்கள் தொழிலாளர்கள் நலச் சங்கம் வெளியிட்டுள்ள செய்தி அறிக்கை விபரம் வருமாறு,
பருவமழை பொய்ப்பும் விநியோகச் சங்கிலி பாதிப்பும்
தமிழகத்தில் நடப்பாண்டு பெய்ய வேண்டிய கோடைகால பருவமழை போதிய அளவு பெய்யாமல் பொய்த்துப் போனதாலும், கடந்த 2025ஆம் ஆண்டு இறுதியிலிருந்தே பால் உற்பத்தி கடுமையாகப் பாதிக்கப்பட்டதாலும் தட்டுப்பாடு தீவிரமடைந்துள்ளது. தமிழ்நாட்டில் மட்டுமின்றி ஆந்திரா, தெலுங்கானா, கர்நாடகா, கேரளா மற்றும் புதுச்சேரி உள்ளிட்ட அண்டை மாநிலங்களிலும் கடந்த ஓராண்டுக்கும் மேலாகப் பால் உற்பத்தி சரிந்துள்ளது. இதனால் தங்களின் பால் வணிகத்தைத் தக்கவைத்துக் கொள்ள முன்னணி மற்றும் சிறு, குறு, நடுத்தர தனியார் பால் நிறுவனங்களுக்கிடையே பால் கொள்முதல் செய்வதில் கடும் போட்டி நிலவி வருகிறது.
தனியார் நிறுவனங்கள் போட்டி போட்டுக் கொண்டு விவசாயிகளுக்குக் கொள்முதல் விலையையும், ஊக்கத்தொகையையும் உயர்த்தி வழங்குவதால், அரசு நிறுவனமான ஆவினுக்குப் பால் வழங்கும் உற்பத்தியாளர்கள் தனியாருக்குப் பால் வழங்கத் தொடங்கியுள்ளனர். இதன் காரணமாக, கடந்த திமுக ஆட்சிக் காலம் முதலே ஆவினின் தினசரி பால் கொள்முதல் சுமார் 25 லட்சம் லிட்டராகச் சரிந்தது, தற்போது வரை உயரவே இல்லை. மேலும், மேற்காசியப் போர்ச் சூழலால் சர்வதேச அளவில் கச்சா எண்ணெய் விலை அதிகரித்து, வாகன எரிபொருள் விலை உயர்ந்ததால், விநியோக வாகனங்களுக்கான வாடகையும், மூலப்பொருட்களின் விலையும் கடுமையாக உயர்ந்துள்ளது. இந்த வருவாய் இழப்பை ஈடு செய்யவே, கடந்த பிப்ரவரி மாத உயர்வைத் தொடர்ந்து, தற்போது 2-வது முறையாகத் தனியார் நிறுவனங்கள் விலையை உயர்த்தியுள்ளன.
நாளை முதல் மாறும் புதிய விலை நிலவரம்
நாட்டின் முன்னணி தனியார் பால் நிறுவனமான ஆரோக்யா, நாளை முதல் பால் மற்றும் தயிர் விலையை உயர்த்துவதோடு, முகவர்களுக்கான கமிஷன் தொகையையும் உயர்த்துவதாகச் சுற்றறிக்கை அனுப்பியுள்ளது. இதன்படி, புதிய விலை நிலவரம் பின்வருமாறு மாற்றியமைக்கப்பட்டுள்ளது.
அரை லிட்டர் (500மிலி) சமன்படுத்தப்பட்ட பால் (Toned Milk) ரூ.29-லிருந்து ரூ.31 ஆகவும், நிலைப்படுத்தப்பட்ட பால் (Standardized Milk) ரூ.35-லிருந்து ரூ.37 ஆகவும், கொழுப்பு சத்து செரிவூட்டப்பட்ட பால் (Full Cream Milk) ரூ.39-லிருந்து ரூ.41 ஆகவும் உயர்த்தப்பட்டுள்ளது. ஒரு லிட்டர் (1000மிலி) சமன்படுத்தப்பட்ட பால் ரூ.54-லிருந்து ரூ.57 ஆகவும், நிலைப்படுத்தப்பட்ட பால் ரூ.66-லிருந்து ரூ.69 ஆகவும், கொழுப்பு சத்து செரிவூட்டப்பட்ட பால் ரூ.73-லிருந்து ரூ.76 ஆகவும் விலை அதிகரித்துள்ளது. இதேபோல், 500 கிராம் ஹட்சன் தயிர் ரூ.44 ஆகவும், ஆரோக்யா தயிர் ரூ.42 ஆகவும் நாளை முதல் விற்பனை செய்யப்படவுள்ளது. இந்த முன்னணி நிறுவனத்தின் விலை உயர்வைத் தொடர்ந்து, பிற தனியார் நிறுவனங்களும் அடுத்தடுத்து விலையை உயர்த்தத் திட்டமிட்டு வருகின்றன. இந்தத் திடீர் விலை உயர்வு ஏழை, எளிய நடுத்தர மக்களைக் கடுமையாகப் பாதிக்கும் என்பதால், ஆரோக்யா நிறுவனம் இதனை மறுபரிசீலனை செய்ய வேண்டும் எனச் சங்கம் கோரிக்கை விடுத்துள்ளது.
முதலமைச்சர் ஜோசப் விஜய் அவர்களுக்குப் போர்க்கால கோரிக்கை
வரும் மழைக்காலத்திலும் மழைப்பொழிவு குறைவாகவே இருக்கும் என வல்லுநர்கள் எச்சரித்துள்ளதால், தமிழ்நாட்டில் நிலவும் பால் தட்டுப்பாட்டைப் போக்கத் தமிழக அரசு போர்க்கால அடிப்படையில் தீவிர நடவடிக்கை எடுக்க வேண்டும் எனச் சங்கம் வலியுறுத்தியுள்ளது. கடந்த 2011-2016 அதிமுக ஆட்சியில் கொண்டுவரப்பட்ட “விலையில்லா கறவை மாடுகள் திட்டம்” தமிழகத்தில் பால் உற்பத்தியை அதிகரித்து, 2020-2021 நிதியாண்டில் ஆவினின் தினசரி கொள்முதலை 43 லட்சம் லிட்டர் வரை உயர்த்தியது. ஆனால், 2021ல் ஆட்சிக்கு வந்த திமுக அரசு இத்திட்டத்தைக் கைவிட்டதால் உற்பத்தி கடுமையாகப் பாதிக்கப்பட்டது. எனவே, தமிழ்நாட்டில் பால் தட்டுப்பாடு ஏற்படுவதைத் தடுக்கவும், உற்பத்தியை அதிகரிக்கவும் உடனடியாக விவசாயிகளுக்கு “விலையில்லா கறவை மாடுகள் வழங்கும் திட்டத்தை” மீண்டும் செயல்படுத்த வேண்டும். மேலும் கால்நடைத் தீவனம், மருத்துவப் பராமரிப்புச் செலவினங்களைக் கருத்தில் கொண்டு உற்பத்தியாளர்களுக்கான கொள்முதல் விலையை உயர்த்தி, அதற்கேற்ற வகையில் ஆவின் பால் விற்பனை விலை மற்றும் பால் முகவர்களுக்கான கமிஷன் தொகையை உயர்த்தி வழங்கிட வேண்டும் என மாண்புமிகு தமிழ்நாடு முதலமைச்சர் திரு. ஜோசப் விஜய் அவர்களுக்குத் தமிழ்நாடு பால் முகவர்கள் தொழிலாளர்கள் நலச் சங்கம் கோரிக்கை விடுத்துள்ளது.