கிராமப்புற வீடுகளுக்குக் குழாய் மூலம் குடிநீர் வழங்கும் ‘ஜல் ஜீவன் மிஷன் 2.0’ திட்டத்தைச் செயல்படுத்த ஒன்றிய அரசு தனியாக நிதி ஒதுக்கீடு செய்யாததால், தமிழக அரசுக்குக் கூடுதல் நிதிச்சுமை ஏற்பட்டுள்ளது. ஒன்றிய அரசின் பங்களிப்புத் தொகையை, உள்ளாட்சி அமைப்புகளுக்கான நிதிக் குழு மானியத்தில் இருந்து எடுத்துப் பயன்படுத்துமாறு உத்தரவிடப்பட்டுள்ளதால், தமிழக ஊரக உள்ளாட்சி அமைப்புகள் கடுமையான நிதி நெருக்கடியில் சிக்கி, வளர்ச்சிப் பணிகள் முற்றிலும் முடங்கும் அபாயம் உருவாகியுள்ளது.
ஜல் ஜீவன் 2.0 திட்டம் – பின்னணி:
மத்திய மற்றும் மாநில அரசுகளின் கூட்டு நிதிப் பங்களிப்புடன் (50:50 என்ற விகிதத்தில்) ஜல் ஜீவன் திட்டம் செயல்படுத்தப்பட்டு வருகிறது. இதன் முதற்கட்டத் திட்டம் (2019-2024) வெற்றிகரமாக முடிவடைந்த நிலையில், இத்திட்டத்தை 2028-ஆம் ஆண்டு டிசம்பர் மாதம் வரை நீட்டித்து ஒன்றிய அமைச்சரவை ஒப்புதல் அளித்தது.
இதன்படி, தமிழகத்தில் ஜல் ஜீவன் 2.0 திட்டத்தைச் செயல்படுத்துவதற்கான புரிந்துணர்வு ஒப்பந்தம், தமிழக முதல்வர் விஜய் மற்றும் ஒன்றிய ஜல் சக்தித் துறை அமைச்சர் சி.ஆர். பாட்டீல் ஆகியோர் முன்னிலையில், கடந்த ஜூன் 2-ஆம் தேதி கையெழுத்தானது.
நிதிப் பங்கீடு விவரம்:
இத்திட்டத்தின் கீழ் தமிழகத்திற்கு ஒப்புதல் அளிக்கப்பட்ட மொத்த திட்ட மதிப்பீடு ரூ.18,123.05 கோடி ஆகும்.
ஒன்றிய அரசின் பங்கு: ரூ.9,025.68 கோடி
தமிழ்நாடு அரசின் பங்கு: ரூ.9,097.37 கோடி
அதிர்ச்சி தந்த ஒன்றிய அரசின் உத்தரவு:
ஒப்பந்தப்படி ஒன்றிய அரசு வழங்க வேண்டிய தனது பங்கான ரூ.9,025.68 கோடியைத் தனி நிதியாக ஒதுக்கீடு செய்யாமல், தமிழக உள்ளாட்சி அமைப்புகளுக்கு வழங்கப்பட வேண்டிய ‘ஒன்றிய நிதிக் குழு மானியத் தொகையிலிருந்து’ எடுத்துச் செலவிட்டுக் கொள்ளுமாறு ஒன்றிய அரசு அதிரடி அறிவுறுத்தலை வழங்கியுள்ளது. இந்த திடீர் உத்தரவால் இத்திட்டத்தை எப்படி முன்னெடுத்துச் செல்வது என்று தெரியாமல் தமிழக அரசு திணறி வருகிறது.
உள்ளாட்சி அமைப்புகளுக்குப் பேரிடி:
16-ஆவது நிதிக் குழுவின் பரிந்துரையின்படி, தமிழ்நாட்டின் ஊரக உள்ளாட்சி அமைப்புகளுக்கு 2026-2027 முதல் 2030-2031 வரையிலான காலகட்டத்திற்கு மொத்தம் ரூ.16,930 கோடி நிதி ஒதுக்கப்பட்டுள்ளது.
தற்போது ஒன்றிய அரசின் உத்தரவுப்படி, ஜல் ஜீவன் திட்டத்திற்காக மட்டுமே இந்த நிதியிலிருந்து சுமார் ரூ.9,025 கோடி சென்றுவிடும் நிலை ஏற்பட்டுள்ளது. இதனால், ஒட்டுமொத்தத் தமிழக ஊரக உள்ளாட்சி அமைப்புகளுக்கும் வெறும் ரூ.7,905 கோடி மட்டுமே எஞ்சியிருக்கும்.
வளர்ச்சித் திட்டங்கள் பாதிக்கும் அபாயம்:
பொதுவாக, கிராமப் புறங்களில் சாலைகள் அமைப்பது, தெருவிளக்குகள், சுகாதாரப் பணிகள் போன்ற அடிப்படை வளர்ச்சித் திட்டங்கள் அனைத்தும் இந்த நிதிக் குழு மானியத்தை நம்பியே செயல்படுத்தப்படுகின்றன. இதில் பாதியளவு நிதி (சுமார் 9 ஆயிரம் கோடி) ஒரே திட்டத்திற்குத் திருப்பப்படுவதால், உள்ளாட்சி அமைப்புகள் வரலாறு காணாத நிதி நெருக்கடியைச் சந்திக்கும்.
மாநில அரசுக்குக் கூடுதல் நிதிச்சுமை:
ஏற்கனவே, ‘வி பி ஜி ராம்ஜி’ திட்ட அமலாக்கத்தால் தமிழக அரசுக்கு ரூ.5,000 கோடி கூடுதல் நிதிச்சுமை ஏற்பட்டுள்ளது. அதனைத் தொடர்ந்து, தற்போது ஜல் ஜீவன் 2.0 திட்டத்தின் மூலமாக மேலும் ரூ.9,000 கோடி நிதி முடக்கம் ஏற்படும் சூழல் உருவாகியுள்ளது.
ஒட்டுமொத்தமாக இந்த இரு திட்டங்களால் ஏற்பட்டுள்ள நிதி நெருக்கடி, மாநில அரசின் நிதி நிலைமையிலும், கிராமப்புற உள்ளாட்சி நிர்வாகத்திலும் மிகப்பெரிய தாக்கத்தை ஏற்படுத்தும் என்று பொருளாதார வல்லுநர்கள் எச்சரிக்கின்றனர். இதற்கான மாற்று நிதி ஆதாரங்களைத் திரட்டுவது குறித்துத் தமிழக அரசு தீவிர ஆலோசனையில் ஈடுபட்டு வருகிறது.