கன்னியாகுமரி மாவட்டம் நாகர்கோவில் கிளைச்சிறையில் அடைக்கப்பட்டிருந்த மாற்றுத்திறனாளி சபரிநாதன், சிறைக்காவலர்களால் கொடூரமான முறையில் சித்திரவதை செய்யப்பட்டு படுகொலை செய்யப்பட்டுள்ளதாக வெளியாகியுள்ள செய்திகள் பெரும் அதிர்ச்சியளிக்கின்றன என்று பாட்டாளி மக்கள் கட்சியின் தலைவர் மருத்துவர் அன்புமணி இராமதாஸ் கண்டனம் தெரிவித்துள்ளார். இந்த வழக்கை உடனடியாக சிபிஐ விசாரணைக்கு மாற்ற வேண்டும் என்றும் அவர் வலியுறுத்தியுள்ளார்.
இது தொடர்பாக அவர் வெளியிட்டுள்ள விரிவான அறிக்கையின் விவரம்,
19 இடங்களில் காயங்கள்; கைகள் உடைப்பு
கன்னியாகுமரி மாவட்டம் சுசீந்திரத்தை அடுத்த ஈத்தங்காடு கிராமத்தைச் சேர்ந்த உடற்திறன் மாற்றுத்திறனாளியான சபரிநாதன், தனது பெட்டிக்கடையில் 200 கிராம் குட்கா போதைப்பாக்கு வைத்திருந்ததாகக் கூறி கடந்த 9-ஆம் தேதி கைது செய்யப்பட்டு சிறையில் அடைக்கப்பட்டார். அவர் மாரடைப்பால் உயிரிழந்து விட்டதாகக் கூறி இந்த மரணத்தை மூடி மறைக்க காவல்துறையினர் முதலில் முயன்றனர். ஆனால், உறவினர்கள் மற்றும் பொதுமக்களின் தொடர் போராட்டத்தைத் தொடர்ந்து, நீதிபதி முன்னிலையில் நடத்தப்பட்ட உடற்கூராய்வில் (Post-mortem) சபரிநாதனின் உடலில் 19 கொடூரமான காயங்கள் இருந்தது வெளிச்சத்திற்கு வந்துள்ளது. அவரது குறைபாடுள்ள வலது கை 3 இடங்களில் உடைக்கப்பட்டிருப்பதும்; இடது கை, இரு கால்கள், தலை, மார்பு ஆகிய உறுப்புகள் கொடூரமாகத் தாக்கப்பட்டு சிதைக்கப்பட்டிருப்பதும் உறுதியாகியுள்ளது. இதன் பின்னரே, நாகர்கோவில் தலைமை சிறைக்காவலர் உட்பட மூன்று சிறைக்காவலர்கள் கைது செய்யப்பட்டுள்ளனர்.
தவெக ஆட்சியில் நடந்த படுகொலை
”ஒரு தவறும் செய்யாத என்னை எதற்காக சிறையில் அடைத்து வைத்திருக்கிறீர்கள்?” என்று கேட்டு ஓலமிட்ட மாற்றுத்திறனாளியைக் கைகால்களைக் கட்டி படுக்க வைத்துச் சிறைக்காவலர்கள் கொடூரமாகத் தாக்கியுள்ளனர். ஞாயிற்றுக்கிழமை இரவே அவர் உயிரிழந்த நிலையில், திங்கள்கிழமை காலையில்தான் மருத்துவமனைக்கு அழைத்துச் சென்றதாகச் சிறைத்துறையினர் நாடகம் ஆடியுள்ளனர். கடந்த அதிமுக ஆட்சியில் சாத்தான்குளம் பெனிக்ஸ் – ஜெயராஜ், திமுக ஆட்சியில் மடப்புரம் அஜித்குமார் வரிசையில், தற்போது தவெக ஆட்சியில் இந்த சபரிநாதனின் படுகொலை நிகழ்த்தப்பட்டுள்ளது. தொடக்கத்திலிருந்தே இந்தக் கொலையை மூடி மறைக்க உயர் மட்ட அளவில் முயற்சிகள் நடந்துள்ளன.
சிபிஐ விசாரணை தேவை – அன்புமணி இராமதாஸ் கோரிக்கை
தமிழகக் காவல்துறையினர் இந்த வழக்கை விசாரித்தால் கண்டிப்பாகப் பாதிக்கப்பட்ட குடும்பத்திற்கு முழுமையான நீதி கிடைக்காது என்று குறிப்பிட்டுள்ள அன்புமணி இராமதாஸ், பின்வரும் முக்கிய கோரிக்கைகளைத் தமிழ்நாடு அரசுக்கு முன்வைத்துள்ளார், சாத்தான்குளம் மற்றும் மடப்புரம் படுகொலை வழக்குகள் எவ்வாறு சிபிஐக்கு மாற்றப்பட்டனவோ, அதேபோல் சபரிநாதன் கொலை வழக்கையும் உடனடியாக சிபிஐ விசாரணைக்கு மாற்ற வேண்டும். மாற்றுத்திறனாளியைக் கொடூரமாகக் கொன்ற குற்றத்திற்காகக் கைது செய்யப்பட்டுள்ள சிறைக் காவலர்களுக்கு வழக்கின் விசாரணை முடியும் வரை எக்காரணம் கொண்டும் ஜாமீன் வழங்கக் கூடாது என்பதை அரசு உறுதி செய்ய வேண்டும். படுகொலை செய்யப்பட்ட சபரிநாதனின் குடும்பத்தினருக்கு அரசு உடனடியாக ரூ.50 லட்சம் இழப்பீடும், அவரது மனைவிக்கு அரசு வேலையும் வழங்க நடவடிக்கை எடுக்க வேண்டும். மேலும், தமிழ்நாட்டில் ஆட்சி மாற்றம் ஏற்பட்டதற்குப் பிந்தைய இந்த இரண்டு மாதங்களில் மட்டும் காவல்துறையினரின் காவலில் இருந்த 4 பேர் மர்மமான முறையில் உயிரிழந்துள்ளனர் என்பதைச் சுட்டிக்காட்டியுள்ள அவர், காவலில் நடக்கும் மரணங்களுக்கான உண்மையான காரணங்களைக் கண்டறிய உயர் மட்ட விசாரணைக்கு அரசு உடனே ஆணையிட வேண்டும் என்றும் தனது அறிக்கையில் ஆணித்தரமாக வலியுறுத்தியுள்ளார்.
TNRERA தலைவராக ஓய்வு பெற்ற ஐ.ஏ.எஸ். அதிகாரி பணீந்திர ரெட்டி நியமனம்..