சூப்பர் ஸ்டார் ரஜினிகாந்த் நடிப்பில், நெல்சன் திலீப்குமார் இயக்கத்தில் உருவான ‘ஜெயிலர் 2’ திரைப்படத்தின் ஓடிடி வெளியீட்டுத் தேதி அதிகாரப்பூர்வமாக அறிவிக்கப்பட்டுள்ளது. அதன்படி, வரும் நவம்பர் 12-ஆம் தேதி முதல் அமேசான் பிரைம் வீடியோவில் இப்படம் ஸ்ட்ரீமிங் செய்யப்பட உள்ளது.
கடந்த 2023-ஆம் ஆண்டு வெளியான ‘ஜெயிலர்’ திரைப்படத்தின் வெற்றியைத் தொடர்ந்து அதன் இரண்டாம் பாகமாக ‘ஜெயிலர் 2’ உருவானது. சன் பிக்சர்ஸ் நிறுவனம் சார்பில் கலாநிதி மாறன் தயாரித்துள்ள இப்படத்தில், ரஜினிகாந்த் மீண்டும் டைகர் முத்துவேல் பாண்டியன் கதாபாத்திரத்தில் நடித்துள்ளார்.
திரையரங்குகளில் வெளியாகி ரசிகர்களிடம் வரவேற்பைப் பெற்ற இப்படம், உலகளாவிய வசூலில் சுமார் ரூ.821 கோடியை ஈட்டியுள்ளதாக சாக்னில்க் (Sacnilk) பாக்ஸ் ஆபீஸ் தரவுகள் தெரிவிக்கின்றன. இதன் மூலம் அதிக வசூல் செய்த தமிழ் திரைப்படங்களில் முதலிடத்தைப் பிடித்துள்ளதாகக் கூறப்படுகிறது.
ஐந்து மொழிகளில் வெளியாகிறது!
அமேசான் பிரைம் வீடியோவில் ‘ஜெயிலர் 2’ திரைப்படம் தமிழ், தெலுங்கு, இந்தி, மலையாளம், கன்னடம் ஆகிய ஐந்து மொழிகளில் வெளியாகிறது. இந்தியா மட்டுமின்றி உலகம் முழுவதும் 240-க்கும் மேற்பட்ட நாடுகள் மற்றும் பிராந்தியங்களில் இப்படத்தைப் பார்க்க முடியும்.
நட்சத்திரப் பட்டாளம்
இப்படத்தில் ரஜினிகாந்துடன் ரம்யா கிருஷ்ணன், யோகி பாபு, சிவராஜ்குமார், மோகன்லால், எஸ்.ஜே. சூர்யா, விஜய் சேதுபதி, ஹிருத்திக் ரோஷன், மிதுன் சக்ரவர்த்தி, வித்யா பாலன், சுராஜ் வெஞ்சாரமூடு உள்ளிட்ட பலர் நடித்துள்ளனர். அனிருத் ரவிச்சந்தர் இசையமைத்துள்ளார்.
இயக்குநர் நெல்சன் மகிழ்ச்சி
ஓடிடி வெளியீடு குறித்து இயக்குநர் நெல்சன் திலீப்குமார் கூறுகையில், முத்துவேல் பாண்டியன் கதாபாத்திரத்திற்கு ரசிகர்கள் அளித்த அன்பு மிகுந்த மகிழ்ச்சியைத் தருவதாகவும், இரண்டாம் பாகத்தில் கதை, ஆக்ஷன் காட்சிகள் மற்றும் உணர்வுப்பூர்வமான அம்சங்களை அடுத்த கட்டத்திற்கு எடுத்துச் செல்ல முயன்றதாகவும் தெரிவித்துள்ளார்.
மேலும், ரஜினிகாந்துடன் மிகப்பெரிய நட்சத்திரக் கூட்டணி இணைந்ததும், அனிருத்தின் இசையும் படத்திற்கு வலு சேர்த்ததாகக் குறிப்பிட்டுள்ளார். திரையரங்குகளில் கிடைத்த வரவேற்பைத் தொடர்ந்து, உலகம் முழுவதும் உள்ள ரசிகர்கள் அமேசான் பிரைம் வீடியோ வழியாக இப்படத்தைப் பார்க்க இருப்பது மகிழ்ச்சி அளிப்பதாகவும் தெரிவித்துள்ளார்.
திரையரங்குகளில் படத்தைப் பார்க்கத் தவறிய ரசிகர்கள், வரும் நவம்பர் 12-ஆம் தேதி முதல் வீட்டிலிருந்தபடியே ‘ஜெயிலர் 2’ திரைப்படத்தை ஓடிடியில் கண்டு ரசிக்கலாம்.