Homeசெய்திகள்சட்டம்பள்ளிக்கரணை வழக்கில் உயர்நீதிமன்றத்தின் தீர்ப்பு பா.ம.க.வுக்குக் கிடைத்த வெற்றி – சதுப்பு நிலங்களை உடனடியாக அறிவிக்கை...

பள்ளிக்கரணை வழக்கில் உயர்நீதிமன்றத்தின் தீர்ப்பு பா.ம.க.வுக்குக் கிடைத்த வெற்றி – சதுப்பு நிலங்களை உடனடியாக அறிவிக்கை செய்ய வேண்டும்: அன்புமணி இராமதாஸ் வலியுறுத்தல்!

-

- Advertisement -

பள்ளிக்கரணை சதுப்பு நிலத்தைச் சுற்றி ஒரு கிலோ மீட்டர் தொலைவுக்குள் கட்டுமானப் பணிகளை மேற்கொள்ள விதிக்கப்பட்ட தடையை நீக்கக் கோரி கட்டுமான நிறுவனங்கள் தொடர்ந்த வழக்கில், அவர்களுக்குச் சாதகமாக உத்தரவு பிறப்பிக்க மறுத்த சென்னை உயர்நீதிமன்றத்தின் தீர்ப்பு, சதுப்பு நிலத்தைப் பாதுகாக்கப் போராடி வரும் பாட்டாளி மக்கள் கட்சிக்குக் கிடைத்த வெற்றி என்று அக்கட்சியின் தலைவர் மருத்துவர் அன்புமணி இராமதாஸ் தெரிவித்துள்ளார்.பள்ளிக்கரணை வழக்கில் உயர்நீதிமன்றத்தின் தீர்ப்பு பா.ம.க.வுக்குக் கிடைத்த வெற்றி – சதுப்பு நிலங்களை உடனடியாக அறிவிக்கை செய்ய வேண்டும்: அன்புமணி இராமதாஸ் வலியுறுத்தல்!

இதுதொடர்பாக அவர் வெளியிட்டுள்ள அறிக்கையில் கூறியிருப்பதாவது:

ராம்சார் ஈரநிலமாக அறிவிக்கப்பட்டுள்ள பள்ளிக்கரணை சதுப்பு நிலத்தைப் பாதுகாப்பதற்குப் பதிலாக, கடந்த காலங்களில் அப்பகுதியில் கட்டுமானப் பணிகளை மேற்கொள்ள அனுமதி அளிக்கப்பட்டு வந்ததாகக் குறிப்பிட்டுள்ளார்.

சதுப்பு நில எல்லைக்குள்ளேயே தனியார் கட்டுமான நிறுவனம் சாலை அமைக்கும் பணியில் ஈடுபட்டதைத் தொடர்ந்து, தேசிய பசுமைத் தீர்ப்பாயம் தாமாக முன்வந்து வழக்குப் பதிவு செய்து விசாரித்ததாகவும், பள்ளிக்கரணை சதுப்பு நிலத்தைச் சுற்றி ஒரு கிலோ மீட்டர் தொலைவுக்குள் கட்டுமானப் பணிகளை மேற்கொள்ளத் தடை விதித்து கடந்த ஆண்டு செப்டம்பர் 24-ஆம் தேதி உத்தரவிட்டதாகவும் தெரிவித்துள்ளார்.

இந்தத் தடையை நீக்கக் கோரி கட்டுமான நிறுவனங்கள் தொடர்ந்த வழக்கில்தான், சென்னை உயர்நீதிமன்றம் அவர்களுக்குச் சாதகமாக உத்தரவு பிறப்பிக்க மறுத்து, உச்சநீதிமன்றத்தை அணுகுமாறு அறிவுறுத்தியுள்ளதாகக் குறிப்பிட்டுள்ளார்.

8,397 ஏக்கரை 316 ஏக்கராகக் குறைக்க முயற்சி – அரசுக்கு குற்றச்சாட்டு

பள்ளிக்கரணை சதுப்பு நிலத்தைச் சுற்றியுள்ள கட்டுமானத் தடையை நீக்குவதற்கு தமிழக அரசே தயாராக இருந்ததாக அன்புமணி குற்றம்சாட்டியுள்ளார். இதற்காக, தேசிய பசுமைத் தீர்ப்பாயம் அறிவித்திருந்த 8,397 ஏக்கர் தாக்கப் பகுதியை 316 ஏக்கராகக் குறைக்க முடிவு செய்திருப்பதாக கடந்த மாதம் சென்னை உயர்நீதிமன்றத்தில் தமிழக அரசு தெரிவித்ததாகவும், இந்த முடிவைத் தனியார் கட்டுமான நிறுவனங்களும் ஏற்றுக்கொண்டதாகவும் கூறியுள்ளார்.

ஆனால், சதுப்பு நிலப் பாதுகாப்புக்கு எதிரான இந்தச் சமரசத் திட்டத்தை உயர்நீதிமன்றம் ஏற்காமல், கட்டுமான நிறுவனங்களை உச்சநீதிமன்றத்தை அணுகுமாறு அறிவுறுத்தியிருப்பது வரவேற்கத்தக்கது என்றும், பா.ம.க. தொடர்ந்து வலியுறுத்தி வந்த நிலைப்பாட்டுக்கு இது கிடைத்த வெற்றி என்றும் தெரிவித்துள்ளார்.

முதலமைச்சர் விஜய்க்கு இரண்டு முறை கடிதம்

பள்ளிக்கரணை சதுப்பு நிலத்தைப் பாதுகாக்க வலியுறுத்தி முதலமைச்சர் விஜய்க்கு இரண்டு முறை கடிதம் எழுதியுள்ளதாகவும், மூன்று முறை அறிக்கை வெளியிட்டுள்ளதாகவும் அன்புமணி தெரிவித்துள்ளார்.

பத்திரிகையாளர்களைச் சந்திக்கும் போதெல்லாம் இந்தக் கோரிக்கையை வலியுறுத்தி வருவதாகவும், பள்ளிக்கரணை சதுப்பு நிலத்தை நேரில் பார்வையிட்டு, அதன் ஆக்கிரமிப்புக்கு வழிவகுக்கும் வகையில் அமைக்கப்படும் தடுப்புச் சுவர் மற்றும் நடைபாதையை அகற்ற வேண்டும் என்றும் வலியுறுத்தியதாகக் குறிப்பிட்டுள்ளார்.

இதேபோல், பசுமைத் தாயகம் அமைப்பின் தலைவரும், பா.ம.க. சட்டப்பேரவைக் கட்சித் தலைவருமான மருத்துவர் சௌமியா அன்புமணியும் பள்ளிக்கரணை சதுப்பு நிலத்தை நேரில் பார்வையிட்டு, அதன் பாதுகாப்பை வலியுறுத்தியதாகத் தெரிவித்துள்ளார். இதுதொடர்பாக முதலமைச்சர் விஜய்க்குக் கடிதம் எழுதியதுடன், தமிழ்நாடு மாநில ஈரநிலங்கள் ஆணையத்தின் உறுப்பினர் செயலர் ராகேஷ்குமார் ஜகானியாவை நேரில் சந்தித்து மனு அளித்ததாகவும் கூறியுள்ளார்.

மேலும், சென்னை தியாகராயர் நகர் பாண்டிபஜார் பகுதியில் கையெழுத்து இயக்கம் நடத்தி மக்களிடையே விழிப்புணர்வு ஏற்படுத்தியதாகவும் தெரிவித்துள்ளார்.

சதுப்பு நில எல்லைகளை அறிவிக்கை செய்யாதது ஏன்?

தமிழக அரசு கட்டுமான நிறுவனங்களுக்குச் சாதகமாகச் செயல்பட்டு வருவதாகக் குற்றம்சாட்டியுள்ள அன்புமணி, உச்சநீதிமன்றத்தின் தீர்ப்புக்குப் பிறகும் பள்ளிக்கரணை சதுப்பு நிலத்தை அறிவிக்கை செய்யாததும், அதன் தாக்கப் பகுதியைக் குறைக்க முயற்சிப்பதும் தமிழக மக்களுக்குச் செய்யப்படும் துரோகம் என்று விமர்சித்துள்ளார்.

2017-ஆம் ஆண்டு அறிவிக்கப்பட்ட சதுப்புநிலங்கள் (பாதுகாப்பு மற்றும் மேலாண்மை) விதிகளின்படி, பள்ளிக்கரணை உள்ளிட்ட தமிழகம் முழுவதும் உள்ள 26,883 சதுப்பு நிலங்களின் எல்லைகளை 2024-ஆம் ஆண்டுக்குள் வரையறுத்து அறிவிக்கை செய்திருக்க வேண்டும் என்று அவர் தெரிவித்துள்ளார்.

இதற்காக அமைக்கப்பட்ட தமிழ்நாடு மாநில ஈரநிலங்கள் ஆணையமும் தனது கடமையை நிறைவேற்றவில்லை எனக் குற்றம்சாட்டியுள்ளார்.

பள்ளிக்கரணை உள்ளிட்ட அனைத்து சதுப்பு நிலங்களையும் அறிவிக்கை செய்ய வேண்டும் என்று 2024 டிசம்பர் 11-ஆம் தேதி உச்சநீதிமன்றம் உத்தரவிட்ட பிறகும் தமிழக அரசு நடவடிக்கை எடுக்கவில்லை என்றும் அவர் குறிப்பிட்டுள்ளார்.

பள்ளிக்கரணை சதுப்பு நிலத்தைச் செயற்கைக்கோள் உதவியுடன் துல்லியமாக அளவிடும் பணிகள் 99 சதவீதம் முடிவடைந்துவிட்டதாக கடந்த ஆண்டு டிசம்பர் 3-ஆம் தேதி சென்னை உயர்நீதிமன்றத்தில் தமிழ்நாடு மாநில ஈரநிலங்கள் ஆணையம் தெரிவித்திருந்ததாகவும், ஆனால் ஓராண்டுக்கு மேலாகியும் மீதமுள்ள ஒரு சதவீதப் பணிகள் முடிக்கப்படவில்லை என்றும் அவர் சுட்டிக்காட்டியுள்ளார்.

உச்சநீதிமன்றம் மீண்டும் உத்தரவு

சதுப்பு நிலத்தின் எல்லைகளையும் தாக்கப் பகுதிகளையும் அறிவியல்பூர்வமாக வரையறுத்து தமிழக அரசு அறிவிக்கை செய்திருந்தால், தேசிய பசுமைத் தீர்ப்பாயம் விதித்திருந்த கட்டுமானத் தடை தானாகவே நீங்கியிருக்கும் என்று அன்புமணி தெரிவித்துள்ளார். ஆனால், சதுப்பு நிலத்தைப் பாதுகாப்பதற்கான நடவடிக்கைகளை மேற்கொள்ளாமல், தாக்கப் பகுதியை 8,397 ஏக்கரிலிருந்து 316 ஏக்கராகக் குறைக்க அரசு முயற்சிப்பதாகக் குற்றம்சாட்டியுள்ளார்.

மேலும், பள்ளிக்கரணை உள்ளிட்ட அனைத்து சதுப்பு நிலங்களின் எல்லைகளையும் நான்கு மாதங்களுக்குள், அதாவது 2027 பிப்ரவரி 11-ஆம் தேதிக்குள் அறிவிக்கை செய்ய வேண்டும் என்று 2026 அக்டோபர் 12-ஆம் தேதி உச்சநீதிமன்றம் மீண்டும் உத்தரவிட்டுள்ளதாகவும் அவர் தெரிவித்துள்ளார்.

இந்த விவகாரத்தில் உச்சநீதிமன்றமும் தற்போது உயர்நீதிமன்றமும் அறிவுறுத்தியுள்ளபடி, பள்ளிக்கரணை சதுப்பு நிலத்தை உடனடியாக அறிவிக்கை செய்வதே தீர்வாகும் என்றும், கட்டுமான நிறுவனங்கள் உச்சநீதிமன்றத்தை அணுகினால், சதுப்பு நிலத்தை அறிவிக்கை செய்யத் தவறியதற்காக தமிழக அரசும் கண்டனத்திற்கு உள்ளாக நேரிடும் என்றும் எச்சரித்துள்ளார்.

சட்டப்போராட்டம் நடத்த பா.ம.க. உறுதி

கட்டுமான நிறுவனங்கள் இந்த விவகாரத்தை உச்சநீதிமன்றத்துக்குக் கொண்டு சென்றால், தமிழக அரசு தனது தற்போதைய நிலைப்பாட்டை மாற்றிக்கொண்டு சதுப்பு நிலத்தைப் பாதுகாக்கும் வகையில் செயல்பட வேண்டும் என்று அன்புமணி வலியுறுத்தியுள்ளார்.

பள்ளிக்கரணை சதுப்பு நிலம் சீரழிக்கப்படுவதை பா.ம.க. எந்த வகையிலும் அனுமதிக்காது என்றும், தேவைப்பட்டால் உச்சநீதிமன்றம் வரை சென்று சட்டப்போராட்டம் நடத்தி சதுப்பு நிலத்தைப் பாதுகாக்கும் என்றும் உறுதியளித்துள்ளார்.

எனவே, பள்ளிக்கரணை சதுப்பு நிலம் உள்ளிட்ட தமிழகத்தின் அனைத்து சதுப்பு நிலங்களையும் வரும் ஜனவரி மாதத்திற்குள் அறிவிக்கை செய்ய அரசு நடவடிக்கை எடுக்க வேண்டும்.

பள்ளிக்கரணை சதுப்பு நிலத்தில் மூன்று கிலோ மீட்டர் தொலைவுக்கு ஆறு அடி உயரத்தில் அமைக்கப்படும் தடுப்புச் சுவர் மற்றும் இரண்டு கிலோ மீட்டர் நீளத்தில் அமைக்கப்படும் நடைபாதைப் பணிகளை நிறுத்தி, ஏற்கெனவே அமைக்கப்பட்ட கட்டுமானங்களை அகற்ற வேண்டும் என்றும் தனது அறிக்கையில் அன்புமணி இராமதாஸ் வலியுறுத்தியுள்ளார்.

 

தூய்மைப் பணியாளர்களுக்கு இலவச வீட்டுமனை வழங்கத் திட்டம் உள்ளதா? – 3 வாரங்களில் அறிக்கை தாக்கல் செய்ய தமிழக அரசுக்கு உயர்நீதிமன்றம் உத்தரவு!

MUST READ