ராணிப்பேட்டை மாவட்டம் ஆற்காடு அருகே, பிரசவ வலியால் அவதிப்பட்ட கர்ப்பிணிப் பெண்ணுக்கு 108 ஆம்புலன்சிலேயே அழகான பெண் குழந்தை பிறந்த சம்பவம் நெகிழ்ச்சியை ஏற்படுத்தியுள்ளது. இக்கட்டான சூழலில் துரிதமாகச் செயல்பட்டு தாயையும் குழந்தையையும் பாதுகாப்பாகக் கவனித்த 108 ஆம்புலன்ஸ் ஊழியர்களுக்குப் பாராட்டுகள் குவிந்து வருகின்றன.

திடீரென ஏற்பட்ட பிரசவ வலி
ராணிப்பேட்டை மாவட்டம் பரதராமி கிராமத்தைச் சேர்ந்த கூலித் தொழிலாளி ஐயப்பனின் மனைவி மாரி (30). நிறைமாத கர்ப்பிணியான இவருக்குத் திடீரென பிரசவ வலி ஏற்பட்டுள்ளது. இதையடுத்து, அவரது குடும்பத்தினர் உடனடியாக 108 ஆம்புலன்ஸ் சேவையைத் தொடர்புகொண்டனர்.
தகவலறிந்து சம்பவ இடத்திற்கு விரைந்து சென்ற ஆம்புலன்ஸ் ஊழியர்கள், மாரியை மீட்டு அருகிலுள்ள மருத்துவமனைக்கு அழைத்துச் சென்றனர். ஆம்புலன்ஸை பைலட் சிலம்பரசன் ஓட்டிச் சென்ற நிலையில், வழியிலேயே மாரிக்கு பிரசவ வலி அதிகரித்ததாகக் கூறப்படுகிறது.
ஆம்புலன்சிலேயே பிறந்த பெண் குழந்தை
இதையடுத்து, 108 ஆம்புலன்ஸ் மருத்துவ உதவியாளர் சந்திரசேகரன் உடனடியாகச் செயல்பட்டு, கர்ப்பிணிப் பெண்ணுக்குத் தேவையான முதலுதவி மற்றும் பிரசவத்திற்கான உதவிகளை மேற்கொண்டார்.
அப்போது ஆம்புலன்சிலேயே மாரிக்கு அழகான பெண் குழந்தை பிறந்தது. தொடர்ந்து தாய் மற்றும் குழந்தையின் உடல்நிலையைப் பரிசோதித்த மருத்துவ உதவியாளர், இருவரும் நலமுடன் இருப்பதை உறுதி செய்தார்.
பின்னர் தாயும் பிறந்த குழந்தையும் வாலாஜாபேட்டை அரசு மாவட்ட தலைமை மருத்துவமனைக்கு அழைத்துச் செல்லப்பட்டு சிகிச்சைக்காக அனுமதிக்கப்பட்டனர்.
108 ஆம்புலன்ஸ் ஊழியர்களுக்குப் பாராட்டுகள்
நடுவழியில் பிரசவ வலி ஏற்பட்டு, 108 ஆம்புலன்சிலேயே குழந்தை பிறந்த சம்பவம் அப்பகுதி மக்களிடையே நெகிழ்ச்சியை ஏற்படுத்தியுள்ளது.
இக்கட்டான நேரத்தில் துரிதமாகச் செயல்பட்டு தாயையும் குழந்தையையும் பாதுகாப்பாக மருத்துவமனைக்குக் கொண்டு சென்ற ஆம்புலன்ஸ் பைலட் சிலம்பரசன் மற்றும் மருத்துவ உதவியாளர் சந்திரசேகரன் ஆகியோருக்கு பொதுமக்களும் சமூக ஆர்வலர்களும் பாராட்டுகளைத் தெரிவித்து வருகின்றனர்.
