நடந்து முடிந்த 2026 சட்டமன்ற தேர்தலில் திமுக கூட்டணி 42–45% பிடித்து வெற்றி பெறும் என்றும் அதிமுக: 28–31% என்றும், விஜய் அணி: 12–16% வரை பெறும் என்றும் ‘X’ தளத்தில் பரவிவருகிறது.
இந்தத் தேர்தல் திருவிழா முடிந்திருக்கலாம்; ஆனால் அதன் அரசியல் அர்த்தம் இன்னும் முழுமையாக வெளிப்பட வேண்டியுள்ளது. 85.15% என்ற உயர்ந்த வாக்குப் பதிவு… பார்க்கும்போது ஒரு பெரும் அரசியல் அலை போல் தோன்றினாலும், அதன் உட்புற கணக்கை ஆராய்ந்தால் அது அவ்வளவு அபூர்வமானதல்ல.
முதலில் ஒரு முக்கியமான உண்மையை நேராகச் சொல்லிவிடலாம்:
வாக்காளர் பட்டியல் திருத்த நடவடிக்கைகள் (SIR) மூலம் கணிசமான அளவில் வாக்காளர்கள் நீக்கப்பட்ட பின், பழைய 70–73% வாக்குப் பதிவு இன்று இயல்பாகவே 82–83% ஆக மாறும். அதனால் இப்போது பதிவான 85% என்பது “அசாதாரண அரசியல் வெடிப்பு” அல்ல; ஒரு கணித ரீதியான சரிசெய்தல் மட்டுமே.
ஆனால், இதை மறைத்து, “விஜய் வந்ததால் தான் மக்கள் வெள்ளம்” என்ற கதையை உருவாக்க முயற்சிப்பது அரசியல் கற்பனைக்கு உட்பட்டது—யதார்த்தத்திற்கு அல்ல. அடுத்ததாக, இந்தத் தேர்தலின் முடிவைப் பற்றிய கணிப்பு. தற்போதைய தரவுகள், தரையில் கிடைக்கும் தகவல்கள்—இவை அனைத்தும் ஒன்றையே சுட்டிக்காட்டுகின்றன.
மு.க. ஸ்டாலின் தலைமையிலான திமுக கூட்டணி மீண்டும் ஆட்சியைத் தக்கவைக்கும் வாய்ப்பு மிக அதிகம். இது ஒரு ‘போட்டி’ அல்ல; பல இடங்களில் ‘நேரடி நடைபயணம்’ போல மாறியிருக்கிறது.
கேள்வி “யார் வெல்வார்?” என்பதல்ல,“எவ்வளவு பெரிதாக வெல்வார்?” என்பதே.
இந்தச் சூழலில் மிகப் பெரிய பாதிப்பைச் சந்தித்தவர் யார்?
பதில் நேரடி: எடப்பாடி கே. பழனிசாமி மட்டுமே. விஜய் அரசியலுக்கு வந்தது திமுகவின் வாக்கு வங்கியை குறிவைத்து அல்ல, அதிமுகவின் அடித்தளத்தையே குலைத்திருப்பது தெளிவாக தெரிகிறது. குறிப்பாக, பாரதிய ஜனதா கட்சி உடன் கூட்டணி அமைத்தது,அதிமுகவுக்கு அரசியல் ரீதியாக “சுய பரிசோதனை செய்ய வேண்டிய தேவை ஏற்பட்டுள்ளது.
தமிழ்நாட்டின் மனநிலையைப் புரியாமல் அதிமுக எடுத்த முடிவுகள், இப்போது தேர்தல் பெட்டிகளில் எதிரொலித்திருக்கிறது. மேலும், தொகுதி மறுவரையறை (Delimitation) விவகாரத்தில் ஏற்பட்ட அரசியல் குழப்பம், “யார் தமிழ்நாட்டின் உரிமைக்காக நிற்கிறார்கள்” என்ற கேள்வி நேரடியாக மக்களிடம் எழுந்தது. அந்த கேள்விக்கு, மு.க. ஸ்டாலின் ஒருபுறம் நிற்கிறார். எடப்பாடி கே. பழனிசாமி மறுபுறம் எதிரணியில் நிற்கிறாா் என்பது தெளிவாகிறது. மக்களிடம் ஏற்பட்ட இந்த மனப்பதிவு, வாக்கு சாவடிகளில் அதிமுகவிற்கு பாதகமான நிலையை ஏற்படுத்தியிருக்கிறது.
கூட்டணி கணக்குகள் இதை மேலும் உறுதிப்படுத்துகின்றன. அதிமுக அணியில் இருந்த வாக்குகள் ஒரு பகுதியாக வி.கே. சசிகலா, ஓ. பன்னீர்செல்வம் வழியாகச் சிதறி, மற்றொரு பகுதி “X factor” ஆக விஜய் பக்கம் சென்றுள்ளது. அதேபோல், அன்புமணி ராமதாஸ் தலைமையிலான பாமக வாக்குகளும் முழுமையாக ஒரே திசையில் நகரவில்லை. ஆனால் திமுக கூட்டணியில் வாக்கு பரிமாற்றம் கணிசமாக ஒழுங்காக நடந்துள்ளது.
இது ஒரு சாதாரண விஷயம் அல்ல, ஒரு அரசியல் இயந்திரம் சரியாகச் செயல்படுகிறது என்பதற்கான சான்று.
இப்போது முக்கியமான எண் கணக்கு: திமுக கூட்டணி: 42–45% அதிமுக: 28–31% விஜய் அணி: 12–16% நாம் தமிழர்: 4–6% இந்த எண்ணிக்கைகள் ஒரு முக்கிய உண்மையைச் சொல்கின்றன: எதிர்க்கட்சிகளின் வாக்குகள் “ஒன்றிணையவில்லை” அவை “சிதறின”. அந்தச் சிதறல்தான் இந்தத் தேர்தலின் முடிவை முன்கூட்டியே தீர்மானித்து விட்டது.
விஜய் இந்தத் தேர்தலில் 10–15% வாக்குகளைப் பெறுவது சாத்தியம். அது ஒரு ஆரம்ப வெற்றி தான். ஆனால் அதே நேரத்தில், அந்த வாக்குகள் பெரும்பாலும் அதிமுகவிலிருந்து பிரிந்தவை என்பதால், அதன் அரசியல் விளைவு. அதிமுகவின் சரிவு, திமுகவின் உயர்வு.
இறுதியாக, இந்தத் தேர்தலை ஒரு வரியில் சுருக்க வேண்டுமெனில்: “ஒரு வலுவான ஆளுங்கட்சியும், பலவீனமான மற்றும் பிளவுபட்ட எதிர்க்கட்சிகளும் சந்தித்த தேர்தல்.” அதன் விளைவாக, “200 இலக்கு, 180 நிச்சயம்” என்பது ஒரு அரசியல் கோஷம் மட்டும் அல்ல; நிலவரத்தின் கணிதப் பொருள். தமிழ்நாட்டில் வாக்காளர்கள் எப்போதும் ஒரு விஷயத்தில் தெளிவாக இருப்பார்கள்: யார் ஆட்சி செய்ய வேண்டும் என்பதை விட யாரை ஆட்சி செய்ய விடக்கூடாது என்பதில் தெளிவுபெற்றவர்கள். இந்தத் தேர்தலும் அதை நோக்கியே செல்கிறது.
2026 தேர்தல் – SIRக்கு பின்பு நடந்த தேர்தலில் 85.06% வாக்குகள் பதிவு…