சென்னை மாநகராட்சியின் 75-வது புதிய ஆணையராக ஜி.எஸ்.சமீரன் பொறுப்பேற்றுள்ளார். மழைக்காலத்திற்கு முன்னதாக வெள்ளத் தடுப்பு மற்றும் முன்னெச்சரிக்கை நடவடிக்கைகளுக்கு முன்னுரிமை அளிக்கப்படும் என்றும், அரசு நில ஆக்கிரமிப்புகள் மீது கடும் நடவடிக்கை எடுக்கப்படும் என்றும் அவர் உறுதியளித்துள்ளார்.
ஜி.எஸ்.சமீரன் சென்னை மாநகராட்சியின் புதிய ஆணையராக பொறுப்பேற்ற முதல் நாளிலேயே, வெள்ளத் தடுப்பு நடவடிக்கைகளுக்கு முன்னுரிமை அளிக்கப்படும் என்று தெரிவித்துள்ளார். மேலும், மாநகராட்சியின் அதிகரித்து வரும் நிதிப் பற்றாக்குறையை சமாளிக்க சொந்த வருவாய் ஆதாரங்களை பெருக்குவதில் கவனம் செலுத்தப்படும் என்றும் அவர் கூறியுள்ளார்.
2012-ஆம் ஆண்டு ஐ.ஏ.எஸ் அதிகாரியான ஜி.எஸ்.சமீரன், இதற்கு முன்பு சென்னை மாநகராட்சியின் இணை ஆணையராக பணியாற்றிய அனுபவம் கொண்டவர். கேரளா பல்கலைக்கழகத்தில் எம்.பி.பி.எஸ். பட்டம் பெற்றுள்ள அவர், நகர்ப்புற சுற்றுச்சூழல் மேலாண்மை மற்றும் சட்டத்தில் முதுகலை டிப்ளமோவும் பெற்றுள்ளார். தூத்துக்குடியில் உதவி ஆட்சியராக பணியைத் தொடங்கிய அவர், பின்னர் பரமக்குடி சார் ஆட்சியர், மீன்வளத்துறை இயக்குநர், தென்காசி மற்றும் கோயம்புத்தூர் மாவட்ட ஆட்சியர் உள்ளிட்ட பல்வேறு பொறுப்புகளை வகித்துள்ளார்.
பதவியேற்ற பின்னர் அவர் அளித்த பேட்டியில், பருவமழைக்கு முன் வடிகால் தூர்வாருதல், கால்வாய்களின் கரைகளை பலப்படுத்துதல் மற்றும் தாழ்வான பாலங்களின் உயரத்தை அதிகரித்தல் போன்ற பணிகள் விரைந்து மேற்கொள்ளப்படும் என அவர் தெரிவித்தார். குறிப்பாக ஓட்டேரி நல்லா, ஜாபர்கான்பேட்டை கால்வாய், கேப்டன் காட்டன் கால்வாய் உள்ளிட்ட பகுதிகளில் வெள்ளத் தடுப்பு பணிகள் தீவிரப்படுத்தப்படும் என்றார்.
மேலும், ராமாபுரம் மற்றும் படவேட்டம்மன் கோவில் அருகிலுள்ள குளங்கள், கடப்பாக்கம் மற்றும் கொரட்டூர் ஏரிகள் உள்ளிட்ட நீர்நிலைகளில் தொடங்கப்பட்ட பணிகள் விரைவில் நிறைவு செய்யப்படும் என்றும் அவர் கூறினார். இதன் அடுத்த கட்டமாக, கூவம் மற்றும் அடையாறு ஆறுகளை மேம்படுத்தி அழகுபடுத்தும் திட்டங்களும் செயல்படுத்தப்படும் என்று தெரிவித்தார். பூங்காக்கள், நடைபாதைகள் போன்ற பொதுப் பயன்பாட்டு வசதிகளும் உருவாக்கப்படும் என கூறினார். மழைநீர் வடிகால், கட்டட அனுமதிகள் மற்றும் பருவமழை ஆயத்தப் பணிகள் தொடர்பாக அனைத்து உள் துறைகளுடனும் முதற்கட்ட ஆய்வுக் கூட்டம் நடைபெறும் என்றும், தொடர்ந்து துறை வாரியான விரிவான ஆய்வுகள் மேற்கொள்ளப்படும் என்றும் அவர் தெரிவித்தார்.
சென்னை மாநகராட்சியின் நிதிநிலை குறித்து பேசுகையில், 2025-26ஆம் ஆண்டில் ₹378 கோடியாக இருந்த நிதிப் பற்றாக்குறை, 2026-27ஆம் ஆண்டில் ₹1,602 கோடியாக உயர்ந்திருப்பதை அவர் சுட்டிக்காட்டினார். இதனை சமாளிக்க விளம்பரங்கள், பொது-தனியார் பங்களிப்பு (PPP) திட்டங்கள், பேருந்து நிறுத்தங்களின் ஒப்பந்த நிர்வாகம் மற்றும் வரி விதிக்கப்படாத சொத்துக்களை கண்டறிந்து வரிவசூல் செய்வது போன்ற புதிய வருவாய் வழிகள் கவனத்தில் கொள்ளப்படும் என்றார்.
அரசு நில ஆக்கிரமிப்புகள் குறித்து கேள்வி எழுப்பப்பட்டபோது, நிரந்தர கட்டடங்கள் மூலம் அரசு சொத்துகளை ஆக்கிரமிப்பவர்கள் மீது கடுமையான சட்ட நடவடிக்கை எடுக்கப்படும் என்று அவர் எச்சரித்தார். அதேநேரத்தில், சாலையோர வியாபாரிகள் விவகாரத்தில் மனிதநேயமான மற்றும் சமநிலையான அணுகுமுறை பின்பற்றப்படும் என்றும் அவர் குறிப்பிட்டார். வாழ்வாதாரம் பாதிக்கப்படாமல் மறுவாழ்வு நடவடிக்கைகள் மேற்கொள்ளப்படும் வகையில் சம்பந்தப்பட்ட தரப்புகளுடன் கலந்தாலோசித்து முடிவுகள் எடுக்கப்படும் என்றும் ஜி.எஸ்.சமீரன் தெரிவித்துள்ளார்.
சென்னை உயர்நீதிமன்றத்திற்கு 19 புதிய நீதிபதிகள் – உச்சநீதிமன்ற கொலிஜியம் ஒப்புதல்…