வெல்கம் மச்சி… கூலி பட ஒளிப்பதிவாளரை அறிமுகப்படுத்திய லோகி…

மாநகரம் படத்தின் மூலம் தமிழ் திரையுலகில் அறிமுகமாகி இன்று, இளம் இயக்குநர்களுக்கு முன்னோடியாக விளங்கும் டாப் இயக்குநர் லோகேஷ் கனகராஜ். மாநகரம் படத்தின் வெற்றியைத் தொடந்து கார்த்தியை வைத்து கைதி, அடுத்து விஜய்யை வைத்து மாஸ்டர் தொடர்ந்து கமல்ஹாசனை வைத்து விக்ரம் ஆகிய படங்களை இயக்கினார். இதில் ஒன்று, இரண்டு என இல்லாமல் ஒட்டுமொத்த திரைப்படங்களுமே ரசிகர்கள் மத்தியில் பெரும் வரவேற்பை பெற்றது. மூன்று படங்களின் வெற்றிக்கு பிறகு லோகி இயக்கிய இறுதி திரைப்படம் லியோ.

 இதில் விஜய், த்ரிஷா, கௌதம் மேனன் உள்பட நட்சத்திர பட்டாளமே நடித்திருந்தது. படத்திற்கு அனிருத் இசை அமைத்திருந்தார். இத்திரைப்படம் கடந்த ஆண்டு திரையரங்குகளில் வெளியாகி ரசிகர்கள் மத்தியில் நல்ல வரவேற்பை பெற்றது. தற்போது ரஜினிகாந்த் நடிக்கும் கூலி திரைப்படத்தை லோகேஷ் கனகராஜ் இயக்குகிறார். படத்திற்கு அனிருத் இசை அமைக்கிறார். சன் பிக்சர்ஸ் நிறுவனம் இப்படத்தை தயாரிக்கிறது.

இப்படத்தின் படப்பிடிப்பு ஐதராபாத்தில் ஓரிரு நாட்களில் தொடங்கவுள்ளது. இதற்காக படக்குழுவினர் ஐதராபாத் பறந்தனர். இந்நிலையில், கூலி படத்தின் ஒளிப்பதிவாளரை லோகேஷ் கனகராஜ் அறிமுகப்படுத்தி இருக்கிறார். அதன்படி, இத்திரைப்படத்தில் கிரிஷ் கங்காதரன் ஒளிப்பதிவாளராக இணைந்துள்ளார். இவர் ஏற்கனவே விஜய் சேதுபதி நடித்த ஏஸ் உள்பட பல படங்களில் ஒளிப்பதிவாளராக பணியாற்றியவர் என்பது குறிப்பிடத்தக்கது.