‘D54’ படத்தின் படப்பிடிப்பு இறுதி கட்டத்தில் இருப்பதாக தகவல் வெளியாகி இருக்கிறது.
தனுஷ் நடிப்பில் கடைசியாக ‘இட்லி கடை’ திரைப்படம் வெளியானது. இதைத்தொடர்ந்து இந்த மாதம் 28ஆம் தேதி தனுஷின் ‘தேரே இஷ்க் மெய்ன்’ திரைப்படம் வெளியாக இருக்கிறது. இதற்கிடையில் தனுஷ் பல படங்களில் கமிட்டாகி வருகிறார். அந்த வகையில் ‘போர் தொழில்’ படத்தின் இயக்குனர் விக்னேஷ் ராஜா இயக்கத்தில் தனது 54வது திரைப்படத்தில் நடித்து வருகிறார். தற்காலிகமாக D54 என்று தலைப்பு வைக்கப்பட்டிருக்கும் இந்த படத்தை வேல்ஸ் ஃபிலிம் இன்டர்நேஷனல் நிறுவனம் தயாரிக்கிறது. ஜி.வி. பிரகாஷ் இதன் இசையமைக்கும் பணிகளை கவனிக்கிறார். இந்த படமானது விறுவிறுப்பான திரைக்கதையில் எமோஷனல் திரில்லர் படமாக உருவாகி வருகிறது. 
அதாவது அப்பா – மகன் உறவை மையமாக வைத்து இப்படம் எடுக்கப்படுவதாக சொல்லப்படுகிறது. இந்த படத்தில் மமிதா பைஜூ, கே.எஸ். ரவிக்குமார், ஜெயராம், சுராஜ் வெஞ்சரமூடு ஆகியோர் முக்கிய கதாபாத்திரங்களில் நடித்து வருகின்றனர். இந்த படத்தின் படப்பிடிப்பு ஏற்கனவே தொடங்கி விறுவிறுப்பாக நடைபெற்று வந்த நிலையில் தற்போது இதன் இறுதி கட்ட படப்படிப்பு ராமநாதபுரத்தில் தொடங்கி இருப்பதாக தற்போதைய தகவல்கள் தெரிவிக்கின்றன. இந்த படப்பிடிப்பு ஒரு மாதம் முழுவதும் நடைபெற இருப்பதாகவும் இனிவரும் நாட்களில் இந்த படத்தின் டைட்டில் குறித்த அறிவிப்பு வெளியாகும் எனவும் சொல்லப்படுகிறது. 
இதற்கிடையில் இந்த படம் 2026 பிப்ரவரி மாதத்தில் திரைக்கு வரும் என சொல்லப்பட்ட நிலையில் தற்போது இப்படம் 2026 கோடை விடுமுறையில் வெளியாக வாய்ப்புள்ளதாகவும் நம்பத் தகுந்த வட்டாரங்கள் தெரிவிக்கின்றன.