சென்னை திருவல்லிக்கேணியில் உள்ள ஒரு தங்கும் விடுதியில் (லாட்ஜ்) மெத்தைக்கு அடியில் ரகசியமாக மறைத்து வைக்கப்பட்டிருந்த ரூ.11 லட்சம் மதிப்புள்ள கள்ளநோட்டுகளைப் போலீசார் அதிரடியாகப் பறிமுதல் செய்துள்ளனர். இதுதொடர்பாக இரண்டு பேரை கைது செய்துள்ள போலீசார், அவர்களுக்குப் பின்னணியில் செயல்பட்ட பெண் சப்ளையரையும் பிடித்துத் தீவிர விசாரணை நடத்தி வருகின்றனர். கைதானவர்களுக்குச் சர்வதேச கள்ளநோட்டு கும்பலுடன் தொடர்பு இருப்பது விசாரணையில் அம்பலமாகியுள்ளது.
விடுதியில் நடந்த நள்ளிரவு ரெய்டு
சென்னை திருவல்லிக்கேணி பகுதியில் உள்ள தங்கும் விடுதி ஒன்றில் கள்ளநோட்டுகள் புழக்கத்தில் விடப்படுவதற்காகப் பதுக்கி வைக்கப்பட்டுள்ளதாக போலீசாருக்கு ரகசியத் தகவல் கிடைத்தது. இதனடிப்படையில், தனிப்படை போலீசார் நேற்று நள்ளிரவு அந்த விடுதியில் அதிரடிச் சோதனை நடத்தினர். அங்கு தங்கியிருந்த சந்தேகத்திற்குரிய நபர்களின் அறையைச் சோதனையிட்டபோது, அவர்கள் படுத்திருந்த மெத்தைக்கு அடியில் கட்டுக் கட்டாக ரூ.11 லட்சம் மதிப்புள்ள கள்ளநோட்டுகள் மறைத்து வைக்கப்பட்டிருந்தது கண்டுபிடிக்கப்பட்டது. அவற்றை உடனடியாகப் பறிமுதல் செய்த போலீசார், அறையிலிருந்த சபீக் ரஹ்மான் மற்றும் ரவிச்சந்திரன் ஆகிய இருவரையும் கைது செய்தனர்.
மலேசியாவில் விழுந்த கள்ளநோட்டு விதை
கைது செய்யப்பட்ட இருவரிடமும் போலீசார் தங்களது பாணியில் நடத்திய விசாரணையில் அதிர்ச்சியூட்டும் தகவல்கள் வெளியாகின. கைதான ரவிச்சந்திரன் சில ஆண்டுகளுக்கு முன்பு மலேசியாவில் வேலை செய்துள்ளார். அப்போது அங்குள்ள ஒரு சர்வதேச கள்ளநோட்டு கடத்தல் கும்பலுடன் இவருக்குப் பழக்கம் ஏற்பட்டுள்ளது. மலேசியா நெட்வொர்க் மூலம் இந்தியாவிற்குள் கள்ளநோட்டுகளைக் கொண்டு வந்து புழக்கத்தில் விட இவர்கள் திட்டம் தீட்டியது அம்பலமானது.
சிக்கிய பெண் சப்ளையர் புவனேஸ்வரி
சர்வதேச கும்பலானது நேரடியாக இவர்களிடம் கள்ளநோட்டுகளைக் கொடுக்காமல், சென்னையில் உள்ள ஒரு பெண் ஏஜென்ட் மூலம் சப்ளை செய்து வந்துள்ளது. கைதான ரவிச்சந்திரன் கொடுத்த வாக்குமூலத்தின் அடிப்படையில், சென்னைக்குக் கள்ளநோட்டுகளைக் கடத்தி வந்து விநியோகம் செய்த ‘புவனேஸ்வரி’ என்ற பெண்ணைப் போலீசார் அதிரடியாக மடக்கிப் பிடித்துக் கைது செய்தனர். “தற்போது பிடிபட்டுள்ள புவனேஸ்வரி என்ற பெண்ணை முக்கியப் புள்ளியாக வைத்து, இந்த சர்வதேச கள்ளநோட்டு கும்பலின் பின்னணியில் இருக்கும் பிற முக்கியக் குற்றவாளிகள் யார்? மலேசியாவில் இருந்து கள்ளநோட்டுகள் சென்னைக்கு எப்படி கொண்டு வரப்படுகிறது? இதன் பின்னணியில் உள்ள பெரிய நெட்வொர்க்கை உடைக்கத் தீவிர விசாரணை நடத்தி வருகிறோம்” என்று காவல்துறை தரப்பில் தெரிவிக்கப்பட்டுள்ளது. சென்னையின் மையப்பகுதியான திருவல்லிக்கேணியில், சர்வதேச கும்பலோடு தொடர்புடைய கள்ளநோட்டு நெட்வொர்க் முறியடிக்கப்பட்ட சம்பவம் பெரும் பரபரப்பை ஏற்படுத்தியுள்ளது.