வேறு சமூகத்தைச் சேர்ந்த இளைஞரைக் காதலித்ததால், உடன்பிறந்த தங்கையைச் சுத்தியலால் அடித்துக் கொடூரமாகக் கொலை செய்துவிட்டு, அது சாலை விபத்து என நாடகமாடிய அண்ணன் மற்றும் அதற்கு உடந்தையாக இருந்த தந்தையை காவல்துறையினர் கைது செய்துள்ளனர்.
காதலுக்கு எதிர்ப்பும் கொடூரக் கொலையும்
குஜராத் மாநிலம் அகமதாபாத்தைச் சேர்ந்தவர் சோஃபியா. இவர் வேறு ஒருவரைக் காதலித்து வந்ததாகக் கூறப்படுகிறது. சோஃபியாவின் காதலுக்கு அவரது குடும்பத்தினர் கடுமையான எதிர்ப்பு தெரிவித்து வந்த நிலையில்,
காதலைக் கைவிடுமாறு உறவினர்கள் அவரை வற்புறுத்தியுள்ளனர். இருப்பினும் சோஃபியா தனது காதலில் உறுதியாக இருந்ததால் ஆத்திரமடைந்த அவரது அண்ணன், தந்தையுடன் இணைந்து அவரைக் கொடூரமாகக் கொலை செய்யத் திட்டமிட்டுள்ளார்.
சம்பவத்தன்று, சோஃபியாவிடம் மீண்டும் தகராறில் ஈடுபட்ட அண்ணன், தான் மறைத்து வைத்திருந்த சுத்தியலால் அவரது தலையில் பலமாக தாக்கியுள்ளார். இதில் பலத்த காயமடைந்த சோஃபியா ரத்த வெள்ளத்தில் சம்பவ இடத்திலேயே பரிதாபமாக உயிரிழந்தார்.
சாலை விபத்து என நாடகம்
தங்கையைக் கொலை செய்த பிறகு, இந்த கொடூர சம்பவத்தை மறைக்க அண்ணனும் தந்தையும் திட்டமிட்டனர். இதற்காகச் சோஃபியாவின் உடலை வெளியில் கொண்டு சென்று, அவர் சாலை விபத்தில் சிக்கி உயிரிழந்தது போலக் காட்சியமைத்து நாடகமாடியுள்ளனர்.
போலீசாரின் தீவிர விசாரணை: அம்பலமான உண்மை
சோஃபியாவின் உயிரிழப்பு குறித்துத் தகவலறிந்து சம்பவ இடத்திற்கு வந்த காவல்துறையினர், அவரது உடலைக் கைப்பற்றி பிரேதப் பரிசோதனைக்கு அனுப்பி வைத்தனர்.
தொடர்ந்து நடத்தப்பட்ட தீவிர விசாரணையில், சோஃபியாவின் தலையில் இருந்த காயங்கள் சாலை விபத்தினால் ஏற்பட்டவை அல்ல என்பதும், அவை சுத்தியலால் கடுமையாகத் தாக்கப்பட்டதால் ஏற்பட்ட காயங்கள் என்பதும் பிரேதப் பரிசோதனை அறிக்கையில் உறுதியானது.
இதனையடுத்து, சந்தேகத்தின் பேரில் சோஃபியாவின் அண்ணன் மற்றும் தந்தையைக் காவல்நிலையம் அழைத்துச் சென்று காவல்துறையினர் பாணியில் தீவிர விசாரணை மேற்கொண்டனர்.
விசாரணையின் இறுதியில், காதலித்ததால் ஆத்திரமடைந்து தங்கையைச் சுத்தியலால் அடித்துக் கொலை செய்துவிட்டு விபத்து என நாடகமாடியதை இருவரும் ஒப்புக்கொண்டனர்.
இதனைத் தொடர்ந்து, ஆணவக் கொலை மற்றும் ஆதாரங்களை மறைக்க முயன்றது ஆகிய பிரிவுகளின் கீழ் வழக்குப்பதிவு செய்த காவல்துறையினர், அண்ணன் மற்றும் தந்தையைக் கைது செய்து சிறையில் அடைத்தனர்.
இச்சம்பவம் அப்பகுதியில் பெரும் சோகத்தையும் பரபரப்பையும் ஏற்படுத்தியுள்ளது.