2026 தேர்தல் களம் சூடுபிடித்துள்ள நிலையில், தமிழ்நாட்டில் 234 தொகுதிகளிலும் இன்று சட்டமன்றத் தேர்தல் நடைபெறுகிறது.
தமிழக அரசியல் களம் பரபரப்பாக இருக்கும் நிலையில், இன்று (ஏப்ரல் 23) 234 தொகுதிகளிலும் சட்டப்பேரவைத் தேர்தல் வாக்குப்பதிவு நடைபெற்று வருகிறது. மாநிலம் முழுவதும் காலை முதலே வாக்காளர்கள் ஆர்வத்துடன் திரண்டு வந்து தங்களது ஜனநாயக கடமையை நிறைவேற்றி வருகின்றனர்.
இந்தத் தேர்தலில் முக்கியமாக மு.க.ஸ்டாலின் தலைமையிலான திமுக கூட்டணி, எடப்பாடி பழனிசாமி தலைமையிலான அதிமுக கூட்டணி, சீமான் தலைமையிலான நாதக மற்றும் தவெக உள்ளிட்ட கட்சிகள் இடையே நான்கு முனை போட்டி நிலவுகிறது. மொத்தம் 234 தொகுதிகளில் 4,023 வேட்பாளர்கள் களத்தில் உள்ளனர். சுமார் 5.73 கோடி வாக்காளர்கள் வாக்களிக்க தகுதி பெற்றுள்ளனர்.
காலை 11 மணி நிலவரப்படி மாநிலம் முழுவதும் 37.56% வாக்குகள் பதிவாகியுள்ளதாக தேர்தல் ஆணையம் தெரிவித்துள்ளது. முக்கிய தலைவர்கள் போட்டியிடும் தொகுதிகளிலும் வாக்குப்பதிவு சுறுசுறுப்பாக நடைபெற்று வருகிறது. மு.க.ஸ்டாலின் போட்டியிடும் கொளத்தூர் தொகுதியில் 37.06% வாக்குகள் பதிவாகியுள்ளன. எடப்பாடி பழனிசாமி போட்டியிடும் தொகுதியில் 39.04% மற்றும் சீமான் போட்டியிடும் காரைக்குடி தொகுதியில் 33.80% வாக்குகள் பதிவாகியுள்ளது.
மாவட்ட வாரியாகப் பார்க்கும்போது, சில பகுதிகளில் அதிக வாக்குப்பதிவு பதிவாகியுள்ளது. குறிப்பாக நாமக்கல் மாவட்டம் குமாரபாளையம் தொகுதியில் 45.87% மற்றும் திருப்பூர் தெற்கு தொகுதியில் 44.21% வாக்குகள் பதிவாகி, மாநில சராசரியை விட அதிகமாக உள்ளது.
மொத்தத்தில், தமிழகம் முழுவதும் அமைதியான மற்றும் சுறுசுறுப்பான வாக்குப்பதிவு நடைபெற்று வருவது குறிப்பிடத்தக்கது. மாலை நேரத்திற்குள் வாக்குப்பதிவு சதவீதம் மேலும் அதிகரிக்கும் என எதிர்பார்க்கப்படுகிறது.
வாக்குப்பதிவு நேரத்தை 2 மணிநேரம் நீட்டிக்க வேண்டும் – விஜய் கோரிக்கை