பசுமைப் போக்குவரத்து மற்றும் ‘மேக் இன் இந்தியா’ திட்டத்தின் கீழ், இந்தியாவின் மிக முக்கிய மைல்கல்லாக ஹைட்ரஜன் எரிபொருளில் இயங்கும் முதல் ரயில் வரும் ஜூலை 17ஆம் தேதி தடம் பதிக்கிறது. இந்த அதிநவீன ரயிலைப் பிரதமர் நரேந்திர மோடி ஹரியானாவில் நேரில் வந்து கொடியசைத்துத் தொடங்கி வைக்கவுள்ளார்.
வெற்றிகரமாக முடிந்த சோதனை ஓட்டம்:
தேசிய போக்குவரத்து அமைப்பான இந்திய ரயில்வே, இந்த ரயிலின் பாதுகாப்பு மற்றும் ஸ்திரத்தன்மையை உறுதி செய்வதற்கான இறுதி சோதனை ஓட்டத்தைக் கடந்த மாதம் வெற்றிகரமாக நிறைவு செய்தது. இதில் அவசரகால பிரேக்கிங் தூரம் (Emergency Braking Distance) மற்றும் ரயிலின் ஊசலாட்ட சோதனைகள் (Oscillation trials) உள்ளிட்ட அனைத்து பாதுகாப்பு விதிகளும் தீவிரமாக மதிப்பிடப்பட்டு, ரயில் இயக்கத்திற்குத் தயாராக உள்ளது என அறிவிக்கப்பட்டுள்ளது.
எந்த வழித்தடத்தில் இயங்கும்?
முதல்கட்டமாக, ஹரியானா மாநிலத்தின் ஜிந்த் – சோனிபட் இடையேயான 89 கிலோமீட்டர் நீளமுள்ள வழித்தடத்தில் இந்த ஹைட்ரஜன் ரயில் இயக்கப்பட உள்ளது.
முக்கிய சிறப்பம்சங்கள்:
வேகம்: மணிக்கு 75 கி.மீ வேகத்தில் இந்த ரயில் இயக்கப்படும்.
நிலையங்கள்: இந்த வழித்தடத்தில் மொத்தம் நான்கு முதல் ஐந்து ரயில் நிலையங்கள் இருக்கும் எனத் தெரிவிக்கப்பட்டுள்ளது.
டிக்கெட் விலை: பொதுமக்கள் எளிதாகப் பயணிக்கும் வகையில், இதன் டிக்கெட் கட்டணம் மிகக் குறைவாக ரூ.5 முதல் ரூ.25 வரை மட்டுமே இருக்கும் எனத் தகவல்கள் வெளியாகியுள்ளன.
சுற்றுச்சூழலுக்குப் பாதிப்பில்லாத ‘கிரீன் ட்ரான்ஸ்போர்ட்டேஷன்’ (Green Transportation) நோக்கிய இந்தியாவின் பயணத்தில், இந்த ஹைட்ரஜன் ரயில் ஒரு மிக முக்கியமான புரட்சியாகப் பார்க்கப்படுகிறது.