“அச்சுறுத்தல்களுக்கு திமுக அஞ்சாது”: தவெக அரசு மற்றும் காவல்துறை நடவடிக்கை குறித்து ஆர்.எஸ்.பாரதி காரசாரம்!

திமுக நிர்வாகிகளையும், அரசுக்கு எதிராகக் குரல் கொடுப்பவர்களையும் கைது செய்வதன் மூலம் திமுகவை அச்சுறுத்த முடியாது என்றும், இதுபோன்ற நடவடிக்கைகளை சட்டரீதியாகச் சந்திப்போம் என்றும் திமுக அமைப்புச் செயலாளர் ஆர்.எஸ்.பாரதி தெரிவித்துள்ளார். சன் நியூஸ் ஊடகத்திற்கு அவர் அளித்தப் பேட்டியில் தெரிவித்துள்ள முக்கியத் தகவல்கள்:

அச்சுறுத்தல்களுக்கு அஞ்சாத வரலாறு:

“திராவிட முன்னேற்றக் கழகம் எமர்ஜென்சி காலத்தையும், சிறைச்சாலையையும் பார்த்த கட்சி. நாட்டுக்காகவும் மொழிக்காகவும் எண்ணற்ற போராட்டங்களை நடத்திச் சிறை சென்ற வரலாறு திமுகவுக்கு உண்டு. புதியதாக ஆட்சிக்கு வந்துள்ளவர்கள் தங்கள் பக்கத்தில் இருப்பவர்களிடம் இந்த வரலாறைக் கேட்டுத் தெரிந்துகொள்ள வேண்டும். ஜனநாயகத்தில் விமர்சனங்களை எதிர்கொள்ளும் மனப்பக்குவம் வேண்டும். எம்.ஜி.ஆர் காலத்தில் கே.ஏ.கிருஷ்ணசாமி மேடையில் பகிரங்கமாகப் பேசியபோது கூடத் கலைஞர் வழக்குப்பதிவு செய்யவில்லை. ஆனால், தற்போதைய தவெக ஆட்சியில் திமுக எம்.எல்.ஏ அனிதா ராதாகிருஷ்ணனைத் தொடர்ந்து, இரண்டாவதாக மற்றொரு எம்.எல்.ஏ-வும் கைது செய்யப்பட்டுள்ளார்.”

திமுக-வை அச்சுறுத்த முயற்சி:

“மற்ற கட்சிகளில் இருந்து எம்.எல்.ஏ-க்களைத் தங்கள் பக்கம் இழுத்த இந்த அரசு, திமுக எம்.எல்.ஏ-க்கள் மற்றும் தொண்டர்கள் கொள்கைப் பிடிப்புடன் இருப்பதால் அவர்களை மாற்ற முடியாது என்ற காரணத்தால் கைது போன்ற நடவடிக்கைகளில் ஈடுபடுகிறதோ என்ற சந்தேகம் பொதுமக்கள் மத்தியில் எழுந்துள்ளது. யாரும் ஓடிப் போகப் போவதில்லை. சாட்சிகளைக் கலைக்க வாய்ப்பில்லை. அங்ஙனம் இருக்க, கைது நடவடிக்கை என்பது வெறும் மன உளைச்சலையும் அச்சுறுத்தலையும் தருவதற்காக மட்டுமே செய்யப்படுகிறது. இதையெல்லாம் எதிர்கொள்ள நீதிமன்றத்தின் மீது நம்பிக்கை வைத்துச் சட்டரீதியாகச் சந்திப்போம்.”

சமூக வலைத்தளங்கள் மற்றும் ஊடகங்கள் மீது அடக்குமுறை:

“காவல்துறை மாநிலத்தில் நடக்கும் குற்றங்களையும் கொலைகளையும் தடுக்க நேரம் ஒதுக்காமல், சமூக வலைத்தளங்களான வாட்ஸ்அப் (WhatsApp), இன்ஸ்டாகிராம் (Instagram) போன்றவற்றில் அரசுக்கு எதிராகப் பதிவிடும் இளைஞர்களையும் கல்லூரி மாணவர்களையும் மிரட்டும் வேலையில் ஈடுபட்டு வருகிறது. அவர்களின் வீடுகளுக்குச் சென்று பெற்றோர்களை அச்சுறுத்துவதும், பதிவுகளை நீக்க வற்புறுத்துவதும் தொடர்கிறது. அதேபோல ஊடக விமர்சகர்களையும் அச்சுறுத்தும் நடவடிக்கைகள் அரங்கேறி வருகின்றன.

முன்னாள் முதல்வர்கள் எம்.ஜி.ஆர், ஜெயலலிதா போன்றோர் ஆட்சிக் காலத்தில் கூட நூற்றுக்கணக்கான வழக்குகள் போடப்பட்டனவே தவிர, இதுபோன்று கைது நடவடிக்கைகள் மேற்கொள்ளப்படவில்லை. விமர்சனங்களை ஏற்றுத் தன்னைத் திருத்திக் கொள்ளும் மனப்பான்மையை இந்த அரசு வளர்த்துக் கொள்ள வேண்டும்” என ஆர்.எஸ்.பாரதி வலியுறுத்தியுள்ளார்.