1241. நினைத்தொன்று சொல்லாயோ நெஞ்சே எனைத்தொன்றும்
எவ்வநோய் தீர்க்கு மருந்து
கலைஞர் குறல் விளக்கம் – எந்த மருந்தினாலும் தீராத என் காதல் நோய் தீர்ந்திட எதாவது ஒரு மருந்தை நினைத்துப் பார்த்து. நெஞ்சே! உன்னால் சொல்ல முடியுமா?
1242. காத லவரிலர் ஆகநீ நோவது
பேதமை வாழியேன் நெஞ்சு
கலைஞர் குறல் விளக்கம் – அவர் நமது காதலை மதித்து நம்மிடம் வராத போது, நெஞ்சே! நீ மட்டும் அவரை நினைத்து வருந்துவது அறியாமையாகும். நீ வாழ்க.
1243. இருந்துள்ளி என்பரிதல் நெஞ்சே பிரிந்துள்ளல்
பைதல்நோய் செய்தார்கண் இல்.
கலைஞர் குறல் விளக்கம் – பிரிவுத் துன்பம் தந்த காதலருக்கு நம்மிடம் இரக்கமில்லாத போது, நெஞ்சே! நீ மட்டும் இங்கிருந்து கொண்டு அவரை எண்ணிக் கலங்குவதால் என்ன பயன்?
1244. கண்ணும் கொளச்சேறி நெஞ்சே இவையென்னைத்
தின்னும் அவர்க்காணல் உற்று
கலைஞர் குறல் விளக்கம் – நெஞ்சே! நீ காதலரிடம் செல்லும்போது கண்களையும்கூட அழைத்துக்கொண்டு போ; இல்லையேல் அவரைக் காண வேண்டுமென்று என்னையே அவை தின்றுவிடுவது போல் இருக்கின்றன.
1245. செற்றார் எனக்கை விடலுண்டோ நெஞசேயம்
உற்றால் உறாஅ தவர்.
கலைஞர் குறல் விளக்கம் – நெஞ்சே! நாம் விரும்பினாலும் நம்மை விரும்பி வராத அவர், நம்மை வெறுத்து விட்டார் என நினைத்து அவர் மீது கொண்ட காதலைக் கை விட்டு விட முடியுமா?
1246. கலந்துணர்த்தும் காதலர்க் கண்டாற் புதலந்தணராய்
பொய்க்காய்வு காய்தியென் நெஞ்சு
கலைஞர் குறல் விளக்கம் – நெஞ்சே! கூடிக் கலந்து ஊடலை நீக்கும் காதலரைக் கண்டால் ஒரு தடவைகூடப் பிணங்கியறியாத நீ இப்போது அவர் மீது கொள்ளுகிற கோபம் பொய்யானது தானே?
1247. காமம் விடுவொன்றோ நாண்விடு நன்னெஞ்சே
யானோ பொறேனிவ் விரண்டு
கலைஞர் குறல் விளக்கம் – நல்ல நெஞ்சமே! ஒன்று காதலால் துடிப்பதையாவது விட்டு விடு; அல்லது அதனைத் துணிந்து சொல்ல முடியாமல் தடுக்கும் நாணத்தையாவது விட்டு விடு. இந்த இரண்டு செயல்களையும் ஒரே நேரத்தில் தாங்கிக் கொள்ள என்னால் முடியாது.
1248. பிரிந்தவர் நல்காரென் றெங்கிப் பிரிந்தவர்
பின்செல்வாய் பேதையென் நெஞ்சு
கலைஞர் குறல் விளக்கம் – நம்மீது இரக்கமின்றிப் பிரிந்து விட்டாரேயேன்று ஏங்கிடும் அதே வேளையில் பிரிந்தவர் பின்னாலேயே சென்று கொண்டிருக்கும் என்நெஞ்சம் ஓர் அறிவற்ற பேதை போன்றதாகும்.
1249. உள்ளத்தார் காத வலராக உள்ளிநீ
யாருழைச் சேறியென் நெஞ்சு
கலைஞர் குறல் விளக்கம் – உள்ளத்திலேயே காதலர் குடி கொண்டிருக்கும்போது, நெஞ்சமே! நீ அவரை நினைத்து, வெளியே எவரிடம் தேடி அலைகிறாய்?
1250. துன்னாத் துறந்தாரை நெஞ்சத் துடையேமா
இன்னும் இழத்தும் கவின்
கலைஞர் குறல் விளக்கம் – சேராமல் பிரிந்து சென்ற காதலரைச் சிந்தையில் வைத்திருப்பதால் மேலும் மேனியெழில் இழந்து மெலிந்து அழிய வேண்டியுள்ளது.