மருத்துவம் படிக்க ஆசையா? தமிழக மாணவர்களுக்கு காத்திருக்கும் பேராபத்து – அன்புமணி ராமதாஸ் சொன்னது என்ன?

தமிழகத்தில் செயல்பட்டு வரும் 6 தனியார் மருத்துவக் கல்லூரிகள் நிகர்நிலைப் பல்கலைக்கழகங்களாக (Deemed Universities) மாற்றப்படுவதால், ஏழை மற்றும் நடுத்தர மாணவர்களுக்குக் கிடைக்க வேண்டிய 700 அரசு ஒதுக்கீட்டு எம்பிபிஎஸ் (MBBS) இடங்கள் பறிபோகும் நிலை உருவாகியுள்ளது என்று பாட்டாளி மக்கள் கட்சியின் தலைவர் மருத்துவர் அன்புமணி இராமதாஸ் கவலை தெரிவித்துள்ளார். ​பாதிப்புகளை ஈடு செய்யப் புதிய மருத்துவக் கல்லூரிகளைத் தொடங்கத் தவறிய முந்தைய திமுக அரசைச் சாடியுள்ள அவர், தற்போதைய அரசு போர்க்கால அடிப்படையில் புதிய கல்லூரிகளைத் தொடங்க வேண்டும் என அறிக்கை வாயிலாக வலியுறுத்தியுள்ளார்.

இது குறித்து ​அவரின் விரிவான அறிக்கையின் விபரம் வருமாறு,

​700 இடங்கள் பறிபோகும் பின்னணி
​தமிழகத்தில் தற்போது 36 அரசு மருத்துவக் கல்லூரிகள், 22 தனியார் மருத்துவக் கல்லூரிகள் உட்படப் பல்வேறு நிறுவனங்களின் கீழ் மொத்தம் 13,000 எம்பிபிஎஸ் இடங்கள் உள்ளன. இவற்றில் தனியார் மருத்துவக் கல்லூரிகள் மற்றும் தனியார் பல்கலைக்கழகங்களில் உள்ள 4,750 இடங்களில் 50% முதல் 65% வரையிலான இடங்கள் மாநில அரசு ஒதுக்கீட்டுக்கு (Government Quota) வழங்கப்பட்டு, நீட் மதிப்பெண் அடிப்படையில் குறைந்த கட்டணத்தில் நிரப்பப்பட்டு வந்தன. ​ஆனால், தற்போது 22 தனியார் மருத்துவக் கல்லூரிகளில் சென்னை புனித பீட்டர் மருத்துவக் கல்லூரி, தனலட்சுமி சீனிவாசன் மருத்துவக் கல்லூரி, சீனிவாசன் மருத்துவக் கல்லூரி ஆகிய 3 கல்லூரிகள் நிகர்நிலை பல்கலைக்கழகங்களாக மாறிவிட்டன. இதனால் இவற்றிலிருந்து மாநில அரசுக்குக் கிடைத்து வந்த 350 இடங்கள் பறிபோயுள்ளன. இவை தவிர மதுராந்தகம் கற்பக விநாயகா மருத்துவக் கல்லூரி உள்ளிட்ட மேலும் 3 தனியார் கல்லூரிகளும் நிகர்நிலைப் பல்கலைக்கழகங்களாகத் தரம் உயர்த்தப்படவுள்ளதால், கூடுதலாக 350 இடங்கள் என மொத்தம் 700 இடங்களை தமிழக மாணவர்கள் இழக்கும் அவலம் நேரிட்டுள்ளது.

​ரூ.30 லட்சம் வரை உயரும் கட்டணம்
​இந்தக் கல்லூரிகள் நிகர்நிலை பல்கலைக்கழகங்களாக மாற்றப்பட்டால், அவற்றுக்கான மாணவர் சேர்க்கை அதிகாரம் மத்திய அரசுக்குச் சென்றுவிடும். மேலும், தனியார் கல்லூரிகளில் அரசு ஒதுக்கீட்டு இடங்களுக்கு ₹4.35 லட்சம் முதல் ₹5.40 லட்சம் வரை மட்டுமே கட்டணம் வசூலிக்கப்பட்ட நிலையில், அவை நிகர்நிலைப் பல்கலைக்கழகங்களாக மாறும்போது ஆண்டுக் கட்டணம் ₹23 லட்சம் முதல் ₹30 லட்சம் வரை உயரும் அபாயம் உள்ளது. இதனால் ஏழை மற்றும் நடுத்தரக் குடும்பங்களைச் சேர்ந்த மாணவர்களால் இங்குச் சேர்ந்து படிக்க முடியாத நிலை ஏற்படும்.

​”சட்டவிரோத அனுமதி”
தமிழகத்தில் உள்ள தனியார் மருத்துவக் கல்லூரிகளுக்கு நிகர்நிலைப் பல்கலைக்கழக தகுதி வழங்கப்பட வேண்டும் என்றால், அந்தக் கல்லூரி இணைவு பெற்றிருந்த டாக்டர் எம்.ஜி.ஆர் மருத்துவப் பல்கலைக்கழகத்தின் தடையின்மை சான்று (NOC) கட்டாயம் ஆகும். ஆனால், இந்தத் தடையின்மை சான்று இல்லாமலேயே தகுதி வழங்கப்பட்டிருப்பது முற்றிலும் சட்டவிரோதமானது.

​திமுக அரசுக்குக் கண்டனம்
​தனியார் கல்லூரிகள் நிகர்நிலைப் பல்கலைக்கழகங்களாக மாறுவது இயல்பானதுதான் என்றாலும், அதனால் ஏற்படும் இழப்பை ஈடு செய்ய முந்தைய அரசு தவறிவிட்டது. ‘மாவட்டத்திற்கு ஒரு அரசு மருத்துவக் கல்லூரி’ என்ற பாமகவின் கொள்கையை முந்தைய திமுக அரசும் ஏற்றுக் கொண்டது. ஆனால், கடந்த ஐந்தாண்டுகளில் ஒரே ஒரு புதிய மருத்துவக் கல்லூரியைக் கூட திமுக அரசு தொடங்கவில்லை. இதன் மூலம் கடந்த 40 ஆண்டுகளில் மருத்துவக் கல்லூரியே தொடங்காத அரசு என்ற அவப்பெயரை முந்தைய திமுக அரசு பெற்றுள்ளது.

​தமிழக அரசுக்குக் கோரிக்கை
​தற்போது புதிய மருத்துவக் கல்லூரிகளைத் தொடங்குவதற்கு விதிக்கப்பட்டிருந்த தடையைத் தேசிய மருத்துவ ஆணையம் விலக்கிக் கொண்டுள்ளது. இந்த வாய்ப்பைப் பயன்படுத்திக் கொண்டு, இதுவரை அரசு மருத்துவக் கல்லூரிகள் இல்லாத காஞ்சிபுரம், ராணிப்பேட்டை, திருப்பத்தூர், மயிலாடுதுறை, தென்காசி மற்றும் பெரம்பலூர் ஆகிய 6 மாவட்டங்களிலும் தலா 150 இடங்களைக் கொண்ட புதிய அரசு மருத்துவக் கல்லூரிகளைத் தொடங்க வேண்டும். ​அதேபோல், 100 எம்பிபிஎஸ் இடங்களை மட்டுமே கொண்டுள்ள 16 அரசு மருத்துவக் கல்லூரிகளில் தலா 50 இடங்களை கூடுதலாக உருவாக்க மாண்புமிகு தமிழ்நாடு அரசு போர்க்கால அடிப்படையில் நடவடிக்கை எடுக்க வேண்டும் என மருத்துவர் அன்புமணி இராமதாஸ் வலியுறுத்தியுள்ளார்.

கரூர் கூட்ட நெரிசல் மரணம்: அரசு வேலை வழங்குவதை நிறுத்தக் கோரிய மனுவை அவசர வழக்காக விசாரிக்க சென்னை உயர் நீதிமன்றம் மறுப்பு!