கேரளாவில் தவெக காலூன்ற திட்டம்.. அமித் ஷா கொடுத்த அசைன்மென்ட் இதுதானா? உடைக்கும் பத்திரிகையாளர்!

தமிழக வெற்றி கழகத்தின் தலைவரும் தமிழக முதல்வருமான விஜய் தொடர்பாக எழுந்துள்ள பல்வேறு அரசியல் சர்ச்சைகள் குறித்தும், கேரளா உள்ளிட்ட தென்மாநிலங்களில் அக்கட்சி மேற்கொள்ளும் நடவடிக்கைகள் குறித்தும் மூத்த பத்திரிகையாளர் மற்றும் அரசியல் திறனாய்வாளர் ஐயநாதன் தனது கருத்துக்களைப் பகிர்ந்துள்ளார்.

கேரளாவில் தவெக காலூன்ற முயற்சி
பாஜகவில் இருந்து விலகி சமீபத்தில் தமிழக வெற்றி கழகத்தில் இணைந்த மூத்த நடிகர் தேவன், கேரள மாநில தவெக தலைவர் பதவி தொடர்பாக பேச்சுவார்த்தை நடத்தி வருவதாகவும், அடுத்த மாதத்தில் விஜய் அவர்களைச் சந்திக்கவுள்ளதாகவும் தெரிவித்துள்ளார். இது குறித்துப் பேசிய ஐயநாதன், பாஜக தனது நேரடி பலம் இல்லாத கேரளா போன்ற மாநிலங்களில், விஜய் என்ற பிம்பத்தைப் பயன்படுத்தி காங்கிரஸையும் இடதுசாரி கட்சிகளையும் பலவீனப்படுத்த முயல்கிறது என்று சுட்டிக்காட்டினார்.

பாஜக–வின் உத்தி மற்றும் கூட்டணி சாத்தியக்கூறுகள்
விஜய் மற்றும் அண்ணாமலை ஆகியோரின் அரசியல் நகர்வுகள் தொடர்பாக விமர்சித்த ஐயநாதன், தமிழக அரசியலில் பாஜக தங்களுக்குச் சாதகமான சூழலை உருவாக்க விஜய் போன்றவர்களின் பிம்பத்தைப் பயன்படுத்துவதாகத் தெரிவித்தார். ஒருகட்டத்தில் விஜயின் பின்னடைவுகள் அண்ணாமலைக்கு சாதகமாக மாற்றப்பட்டு, எதிர்காலத்தில் இரு தரப்பும் இணைந்து மகாராஷ்டிரா பாணியில் கூட்டணி ஆட்சியை உருவாக்கினாலும் ஆச்சரியப்படுவதற்கில்லை என்றும் அவர் குறிப்பிட்டாராம்.

பிரதமர் வேட்பாளர் சர்ச்சை மற்றும் காங்கிரஸ் எதிர்வினை
விஜய்யை 2029-ஆம் ஆண்டுக்கான பிரதமர் வேட்பாளராக தவெக நிர்வாகிகள் மற்றும் அமைச்சர்கள் முன்னிறுத்துவது தொடர்பான போஸ்டர்கள் மற்றும் பிரச்சாரங்கள் குறித்துப் பேசிய அவர், இது மக்களிடையே ஒருவிதமான பரபரப்பையும் குழப்பத்தையும் ஏற்படுத்தி, உண்மையான அரசியல் சிந்தனையை திசைதிருப்பச் செய்யப்படும் ஒரு திட்டமிடப்பட்ட பிரசாரம் என்று சாடினார்.

காங்கிரஸ் எம்பி மாணிக்கம் தாகூரின் எதிர்வினை குறித்துக் குறிப்பிடுகையில், “காங்கிரஸ் கட்சி பாஜக மற்றும் விஜய்யின் உண்மையான அரசியல் திட்டங்களை இன்னமும் சரியாக உணர்ந்து செயல்படவில்லை” என்றும், காங்கிரஸ் கட்சி தனது பழைய பெருமைகளை மட்டும் எண்ணிக்கொண்டிராமல் தெளிவான அரசியல் பார்வையை முன்னெடுக்க வேண்டும் என்றும் தெரிவித்தார். மக்களை மயக்கும் வாக்குறுதிகளையும், போலியான பிம்பங்களையும் நம்பாமல் தெளிவான அரசியல் புரிதலோடு மக்கள் செயல்பட வேண்டும் என்பதே தற்போதைய தேவை என்று அவர் வலியுறுத்தியுள்ளார்.

சட்டமன்றம் ஒரு டிராமா மன்றமாக மாறிவிடக்கூடாது – அண்ணாமலை காட்டமான விமர்சனம்!