சட்டமன்றத் தேர்தலில் 35% வாக்குகள் பெற்றதைத் தொடர்ந்து நடவடிக்கை – முதலமைச்சர் விஜய் வரவேற்பு.
தமிழக வெற்றிக் கழகத்தை (த.வெ.க.) அங்கீகரிக்கப்பட்ட மாநில அரசியல் கட்சியாகப் பதிவு செய்து, அக்கட்சியின் ‘விசில்’ சின்னத்தையும் நிரந்தரத் தேர்தல் சின்னமாக இந்தியத் தேர்தல் ஆணையம் அதிகாரப்பூர்வமாக அறிவித்துள்ளது.
மாநிலக் கட்சி அங்கீகாரம்:
நடந்து முடிந்த தமிழகச் சட்டமன்றத் தேர்தலில் 108 தொகுதிகளில் வெற்றி பெற்று தனிப்பெரும் கட்சியாக உருவெடுத்த தவெக, தேர்தலில் 34.92 சதவீத வாக்குகளைப் பெற்றது.
தேர்தல் ஆணைய விதிகளின்படி, ஒரு கட்சி மாநிலக் கட்சி அங்கீகாரம் பெறக் குறைந்தபட்சம் 6% வாக்குகளும் 2 சட்டமன்ற இடங்களும் அல்லது 8% வாக்குகளும் பெற வேண்டும் என்ற நிலையில், தவெக இந்த இலக்கை வெகுவாகத் தாண்டி சாதனை படைத்தது.
இதனைத் தொடர்ந்து, இந்தியத் தேர்தல் ஆணையம் தவெகவை அங்கீகரிக்கப்பட்ட மாநில அரசியல் கட்சியாக முறைப்படி அறிவித்து, ‘விசில்’ சின்னத்தையும் அக்கட்சிக்கே பிரத்யேகமாக ஒதுக்கீடு செய்துள்ளது. இதன் மூலம் தமிழகத்தின் 7-வது அங்கீகரிக்கப்பட்ட மாநிலக் கட்சியாகத் தவெக உருவெடுத்துள்ளது.
முதலமைச்சர் விஜய் மகிழ்ச்சி:
தேர்தல் ஆணையத்தின் இந்த அறிவிப்பு குறித்துத் தவெக தலைவரும், முதலமைச்சருமான விஜய் வெளியிட்டுள்ள செய்தியில்:
“தமிழக வெற்றிக் கழகத்தை அங்கீகரிக்கப்பட்ட மாநில அரசியல் கட்சியாகப் பதிவு செய்து, நமது வெற்றிச் சின்னமான ‘விசில்’ சின்னத்தை நிரந்தரமாக ஒதுக்கியுள்ள இந்தியத் தேர்தல் ஆணையத்திற்கு மனமார்ந்த நன்றிகள்!
லட்சக்கணக்கான தொண்டர்களின் உழைப்பிற்கும், தமிழ்நாட்டு மக்களின் பேராதரவிற்கும் கிடைத்த மகத்தான வெற்றி இது” எனக் குறிப்பிட்டுள்ளார்.