திருநெல்வேலி மாவட்டம் பாளையங்கோட்டை பகுதியில், 70 வயது மூதாட்டியின் வீட்டில் புகுந்து 15 சவரன் தங்க நகைகள் மற்றும் பணத்தைத் திருடியதாக தமிழக வெற்றிக் கழகத்தின் மாவட்ட இளைஞரணி நிர்வாகி ஒருவரைப் போலீசார் கைது செய்துள்ளனர்.
வீட்டின் அருகே இருந்த சிசிடிவி கேமரா காட்சிகளை ஆய்வு செய்தபோது அவர் சிக்கியதாகக் கூறப்படுகிறது.
வீட்டில் இல்லாத நேரத்தைப் பயன்படுத்தித் திருட்டு
நெல்லை பாளையங்கோட்டை புதுப்பேட்டை தெருவைச் சேர்ந்தவர் 70 வயதான ஷண்முகவல்லி. இவர் தனது வீட்டில் தனியாக வசித்து வருகிறார். கடந்த 2-ஆம் தேதி தனது வீட்டின் முன்பகுதியில் உறவினர்களுடன் நீண்ட நேரம் அமர்ந்து பேசிக்கொண்டிருந்துள்ளார்.
பின்னர் வீட்டிற்குள் சென்று பார்த்தபோது, பீரோவில் வைத்திருந்த 15 சவரன் தங்க நகைகள் மற்றும் ரூ.5,000 பணம் காணாமல் போயிருப்பதைக் கண்டு அதிர்ச்சியடைந்தார்.
அப்போது வீட்டின் பின்பக்கக் கதவு திறந்திருப்பதையும் கவனித்துள்ளார். அவர் முன்பகுதியில் உறவினர்களுடன் பேசிக்கொண்டிருந்த நேரத்தில், பின்வாசல் வழியாக மர்ம நபர் வீட்டிற்குள் நுழைந்து நகை, பணத்தைத் திருடிச் சென்றிருக்கலாம் எனத் தெரியவந்தது.
சிசிடிவி காட்சியில் சிக்கிய நபர்
இதுகுறித்து ஷண்முகவல்லி பாளையங்கோட்டை காவல் நிலையத்தில் புகார் அளித்தார். புகாரின் அடிப்படையில் வழக்குப்பதிவு செய்த போலீசார், சம்பவம் தொடர்பாக விசாரணை மேற்கொண்டனர்.
அக்கம்பக்கத்தினரிடம் விசாரணை நடத்தியதுடன், வீட்டின் அருகே பொருத்தப்பட்டிருந்த சிசிடிவி கேமரா பதிவுகளையும் ஆய்வு செய்தனர். அப்போது, பாளையங்கோட்டை பகுதியைச் சேர்ந்த இசக்கி ராஜா என்பவர் மூதாட்டியின் வீட்டிற்குள் சென்று திருட்டில் ஈடுபட்டதாகக் கூறப்படும் காட்சிகள் பதிவாகியிருந்ததாகத் தெரிவிக்கப்படுகிறது.
தவெக நிர்வாகி கைது – கட்சியில் இருந்தும் நீக்கம்
இதையடுத்து இசக்கி ராஜாவைப் பிடித்து போலீசார் விசாரணை நடத்தினர். அப்போது அவர் தமிழக வெற்றிக் கழகத்தின் மாவட்ட இளைஞரணி இணை அமைப்பாளர் பொறுப்பில் இருந்தவர் என்பது தெரியவந்ததாகக் கூறப்படுகிறது. இதனைத் தொடர்ந்து அவரைக் கைது செய்த போலீசார், திருட்டு வழக்கில் தொடர்ந்து விசாரணை மேற்கொண்டு வருகின்றனர்.
திருட்டு வழக்கில் கைது செய்யப்பட்டதைத் தொடர்ந்து, இசக்கி ராஜா கட்சிப் பொறுப்பிலிருந்தும் நீக்கப்பட்டுள்ளதாகத் தகவல் வெளியாகியுள்ளது.
70 வயது மூதாட்டியின் வீட்டில் 15 சவரன் நகைகள் மற்றும் பணம் திருடப்பட்ட சம்பவத்தில், அரசியல் கட்சி நிர்வாகி ஒருவர் கைது செய்யப்பட்டிருப்பது நெல்லை பகுதியில் பரபரப்பை ஏற்படுத்தியுள்ளது.