சேலம் மாவட்டம் ஆட்டையாம்பட்டி பகுதியில் 11 வயது சிறுமிக்கு கடந்த ஒரு மாதமாகப் பாலியல் தொல்லை கொடுத்ததாக எழுந்த புகாரில், 45 வயது நபரை அனைத்து மகளிர் காவல்துறையினர் போக்சோ சட்டத்தின் கீழ் கைது செய்துள்ளனர்.
கைது செய்யப்பட்டவர் தமிழக வெற்றிக் கழகத்தைச் சேர்ந்தவர் என்றும், கடந்த சட்டமன்றத் தேர்தலின்போது வீரபாண்டி தொகுதியில் அக்கட்சியின் வேட்பாளருக்கு ஆதரவாக வாக்கு சேகரித்தவர் என்றும் கூறப்படுகிறது. மேலும், பாதிக்கப்பட்ட சிறுமியைத் தவிர மூன்று பள்ளி மாணவிகளிடமும் அவர் பாலியல் அத்துமீறலில் ஈடுபட்டதாகத் தகவல் வெளியாகியுள்ளதால், இந்த விவகாரம் பரபரப்பை ஏற்படுத்தியுள்ளது.
1098 எண்ணில் அளிக்கப்பட்ட புகார்
சேலம் மாவட்டம் ஆட்டையாம்பட்டி பகுதியைச் சேர்ந்த கூலித் தொழிலாளி தம்பதியரின் 11 வயது மகள், அப்பகுதியில் உள்ள அரசு பள்ளியில் ஆறாம் வகுப்பு படித்து வருகிறார். இந்தச் சிறுமிக்கு அதே பகுதியைச் சேர்ந்த அய்யனார் (45) என்பவர் பாலியல் தொல்லை கொடுத்து வந்ததாகக் கூறப்படுகிறது. இதையடுத்து, சிறுமியின் பெற்றோர் குழந்தைகளுக்கான உதவி எண்ணான 1098-ல் புகார் அளித்துள்ளனர்.
குழந்தைகள் நல அலுவலர் ரகசிய விசாரணை
புகாரின் அடிப்படையில், சேலம் மாவட்ட ஆட்சியர் அலுவலகத்தில் செயல்பட்டு வரும் மாவட்ட குழந்தைகள் பாதுகாப்பு அலுவலர், சிறுமி மற்றும் அவரது பெற்றோரை அழைத்து ரகசிய விசாரணை மேற்கொண்டார். இந்த விசாரணையில், சிறுமிக்கு கடந்த ஒரு மாத காலமாக அய்யனார் பாலியல் தொல்லை கொடுத்து வந்ததாகத் தெரியவந்துள்ளது. இதனைத் தொடர்ந்து, குழந்தைகள் பாதுகாப்பு அலுவலர் அளித்த அறிக்கையின் அடிப்படையில் சேலம் டவுன் அனைத்து மகளிர் காவல் நிலைய போலீசார் நடவடிக்கை மேற்கொண்டனர்.
தவெகவைச் சேர்ந்தவர் கைது
இதையடுத்து, சிறுமிக்கு பாலியல் தொல்லை கொடுத்ததாகக் கூறப்படும் அய்யனாரை போலீசார் கைது செய்து, அவர் மீது போக்சோ சட்டத்தின் கீழ் வழக்குப் பதிவு செய்துள்ளனர். கைது செய்யப்பட்ட அய்யனார் தமிழக வெற்றிக் கழகத்தைச் சேர்ந்தவர் என்றும், கடந்த சட்டமன்றத் தேர்தலில் வீரபாண்டி தொகுதியில் தவெக வேட்பாளருக்கு ஆதரவாக வாக்கு சேகரித்தவர் என்றும் தகவல் வெளியாகியுள்ளது.
மேலும் 3 மாணவிகளிடமும் அத்துமீறியதாகத் தகவல்
இதற்கிடையே, புகார் அளித்த 11 வயது சிறுமி மட்டுமின்றி, மேலும் மூன்று பள்ளி மாணவிகளிடமும் அய்யனார் பாலியல் தொல்லை கொடுத்து வந்ததாகக் கூறப்படும் தகவல் வெளியாகியுள்ளது.
இதன் உண்மைத் தன்மை குறித்து போலீசார் விசாரணை நடத்த வேண்டிய அவசியம் எழுந்துள்ளது. இதுதொடர்பாக கூடுதல் புகார்கள் ஏதேனும் உள்ளனவா, வேறு சிறுமிகளும் பாதிக்கப்பட்டுள்ளனரா என்ற கோணத்திலும் விசாரணை விரிவுபடுத்தப்பட வேண்டும் எனக் கோரிக்கை எழுந்துள்ளது.
கைது செய்யப்பட்ட அய்யானாரை போலீசார் நீதிமன்றத்தில் ஆஜர்படுத்தி சேலம் சிறையில் அடைத்துள்ளனர். மேலும், இந்த வழக்கில் தொடர்புடையதாகக் கூறப்படும் பிற நபர்கள் குறித்தும், மற்ற மாணவிகள் பாதிக்கப்பட்டதாக வெளியாகியுள்ள தகவல்கள் குறித்தும் காவல்துறையினர் தீவிர விசாரணை மேற்கொண்டு வருகின்றனர்.
சிறுமிகளின் பாதுகாப்பை உறுதிப்படுத்தி, புகாரில் கூறப்பட்டுள்ள அனைத்து அம்சங்களையும் முழுமையாக விசாரித்து உரிய சட்ட நடவடிக்கை எடுக்க வேண்டும் எனப் பொதுமக்கள் வலியுறுத்தி வருகின்றனர்.