தமிழகத்தில் அரசு வழக்கறிஞர்கள் நியமனம் முழுமையாக, வெளிப்படைத் தன்மையுடன் நடைபெறும் என்றும், இது தொடர்பாக பரப்பப்படும் தவறான தகவல்கள் எதுவும் உண்மையல்ல என்றும் அமைச்சர் நிர்மல்குமார் தெளிவுபடுத்தியுள்ளார். சென்னையில் இன்று செய்தியாளர்களைச் சந்தித்த அமைச்சர் நிர்மல்குமார், இந்த விவகாரம் மற்றும் தற்போதைய அரசியல் சூழல் குறித்துப் பேசியதாவது:
பணம் கேட்டால் புகார் அளிக்கலாம்:
“அரசு வக்கீல்கள் நியமனம் 100 விழுக்காடு நியாயமான முறையில் நடைபெறும். இதுவரை பெரும்பாலான மாவட்டங்களில் யாரும் அரசு வக்கீலாக நியமிக்கப்படவில்லை. தற்போதைக்கு 3 மாவட்டங்களுக்கு மட்டுமே அரசு வக்கீல்கள் நியமனம் செய்யப்பட்டுள்ளனர். இந்த நியமனமும் 6 மாத காலத்திற்கு தற்காலிகமானதுதான்.
அரசு வக்கீல் நியமனத்திற்கு யாராவது பணம் கேட்டால் தாராளமாக புகார் அளிக்கலாம். இந்த நியமன விவகாரத்தில் யாராவது பணம் பெற்றிருப்பது தெரியவந்தால், அவர்கள் மீது மிகக் கடுமையான நடவடிக்கை எடுக்கப்படும்.”
தேவையற்ற ஆய்வுகள் வேண்டாம் – முதல்வர் விஜய் அறிவுறுத்தல்:
“அரசு ஊழியர்களைக் குறை சொல்வதை விடுத்து, அனைத்துத் துறைகளையும் முதலில் சீரமைக்க வேண்டியுள்ளது. துறைகளை முழுமையாகச் சீரமைத்த பிறகு ஆய்வு செய்வதே சரியாக இருக்கும். எனவே, அரசு ஊழியர்களுக்குத் தொந்தரவு தரும் வகையில் தேவையற்ற ஆய்வுகளைச் செய்யக் கூடாது என முதல்வர் விஜய் எங்களுக்கு அறிவுறுத்தியுள்ளார்.
அமைச்சர் கீர்த்தனா தனது சொந்த ஊரின் முன்னேற்றத்திற்காக ஏதேனும் செய்ய வேண்டும் என்ற நோக்கத்தில் சென்றிருக்கலாம். அவர் எந்த நோக்கத்தில் சென்றார் என்பது குறித்து முழுமையாகத் தெரியவில்லை.”
திமுகவுக்கு என்ன பயம்? கரூருக்கு முதல்வர் விஜய் நிச்சயம் செல்வார்:
“திமுக ஆட்சிக் காலத்திலேயே கரூருக்குச் செல்ல முதல்வர் விஜய் திட்டமிட்டிருந்தார். அவர் முதல்வராக இருக்கும் போதே, கரூருக்குச் செல்ல முடியாதபடி திமுகவினர் முட்டுக்கட்டை போட முயல்கிறார்கள். இப்போதே இப்படி ஒரு நடவடிக்கை எடுக்கிறார்கள் என்றால், அவர்கள் ஆட்சியில் இருந்தபோது எப்படிச் செயல்பட்டிருப்பார்கள் என்று யோசித்துப் பாருங்கள்.
திமுக ஆட்சியில் இருந்தபோது முதல்வர் விஜய்யின் வீடு மிகப்பெரிய அளவில் கண்காணிப்பு வளையத்தில் வைக்கப்பட்டிருந்தது. முதல்வர் விஜய் எப்போதும் மக்களைச் சந்திக்க ஆரவாரம் இன்றி, எளிமையாகச் செல்லவே விரும்புவார். அவர் திட்டமிட்டபடி கரூருக்குச் சென்று மக்களை நிச்சயம் சந்திப்பார். முதல்வர் கரூருக்குச் செல்வதால் திமுகவுக்கு ஏன் இவ்வளவு பயம்? எதற்காக மனு போடுகிறார்கள்?” என்று அமைச்சர் நிர்மல்குமார் கேள்வி எழுப்பியுள்ளார்.