சென்னையில் இன்று ஒரே நாளில் மூன்று இடங்களில் ஏற்பட்ட விபத்தால் பரபரப்பு ஏற்பட்டுள்ளது. விபத்து குறித்து போக்குவரத்து புலனாய்வு துறை போலீசார் விசாரணை மேற்க்கொண்டு வருகின்றனா்.
சென்னை பெரம்பூர் பந்தர் கார்டன் பகுதியைச் சேர்ந்தவர் தீபிகா (22). ஆயிரம் விளக்கில் உள்ள பிரபல தனியார் மருத்துவமனையில் கடந்த ஆறு மாதங்களாக செவிலியராக பணியாற்றி வந்தார். வழக்கம்போல் இன்று காலை இருசக்கர வாகனத்தில் வேலைக்கு புறப்பட்டு சென்றார். ஓட்டேரி திடீர் நகர் அருகே சென்றபோது, இவர் பணியாற்றும் மருத்துவமனைக்கு பணியாளர்களை ஏற்றி வந்த வேன் மோதியது. இதில் முன்பக்க டயரில் சிக்கி தலை நசுங்கி சம்பவ இடத்திலேயே தீபிகா பரிதாபமாக உயிரிழந்தார். விபத்தை ஏற்படுத்திய வேன் ஓட்டுநர் தஞ்சாவூர் மாவட்டம் மேலட்டூரை சேர்ந்த சீனிவாசன் (29) என்பவரை கீழ்பாக்கம் போக்குவரத்து புலனாய்வு போலீசார் கைது செய்து விசாரணை நடத்தி வருகின்றனர். தீபிகா பணியாற்றிய மருத்துவமனையின் வேன்மோதி அவர் உயிரிழந்த சம்பவத்தில் வேற ஏதாவது மர்மம் இருக்கிறதா? என்ற கோணத்தில் போலீசார் விசாரணை நடத்தி வருகின்றனர்.
தரமணி 100 அடி சாலையில் விபத்து
அமேசான் நிறுவன ஊழியர்கள் லோகேஸ்வரன் (25) மணிகண்டன் (24). நண்பர்களான இருவரும் இன்று அதிகாலை வேளச்சேரி விஜய நகரிலிருந்து தரமணி எஸ் ஆர் பி டூல்ஸ் பேருந்து நிறுத்தம் நோக்கி பைக்கில் சென்று கொண்டிருந்தனர். தரமணி 100 அடி சாலையில் சென்றபோது கட்டுப்பாட்டை இழந்த பைக் சென்டர் மீடியனில் மோதியது. இதில் பைக்கின் பின்னால் அமர்ந்திருந்த லோகேஸ்வரன் தலையில் அடிபட்டு சம்பவ இடத்திலேயே பரிதாபமாக உயிரிழந்தார். பைக்கை ஓட்டிய மணிகண்டன் பலத்த காயங்களுடன் ராயப்பேட்டை அரசு மருத்துவமனையில் அனுமதிக்கப்பட்டுள்ளார். இந்த விபத்து தொடர்பாக அடையாறு போக்குவரத்து புலனாய்வு போலீசார் வழக்குப்பதிந்து விசாரணை நடத்தி வருகின்றனர்.
திருவான்மியூர் ஆர்டிஓ ஆபீஸ் அருகே கவன குறைவாக சாலையை கடந்த 35 ஆண் நபர் கார் மோதி உயிரிழந்துள்ளாா். இறந்தவர் யார்? எந்த ஊரைச் சேர்ந்தவர்? என அடையாறு போக்குவரத்து புலனாய்வு போலீசார் விசாரணை நடத்தி வருகின்றனர்.
மனிதாபிமானமே இல்லாமல் எஸ் ஐ ஆர் செயல்படுத்தப்படுகிறது – நாடாளுமன்ற உறுப்பினர் கனிமொழி பேட்டி