டெல்லியில் நீட் தேர்வுக்கு எதிராக அமைதியான முறையில் போராட்டத்தில் ஈடுபட்ட மாணவர்கள் மீது தாக்குதல் நடத்தப்பட்ட சம்பவத்தைக் கண்டித்து, சேலம் அரசு கலைக்கல்லூரி மாணவர்கள் இன்று திடீர் போராட்டத்தில் ஈடுபட்டதால் கல்லூரி வளாகத்திலும், அதனைச் சுற்றியுள்ள பகுதியிலும் கடும் பரபரப்பு நிலவியது.
நுழைவாயிலில் முற்றுகைப் போராட்டம்
சேலம் அரசு கலைக்கல்லூரியைச் சேர்ந்த 50-க்கும் மேற்பட்ட மாணவர்கள், இன்று வகுப்புகளைப் புறக்கணித்துக் கல்லூரியின் பிரதான நுழைவாயில் முன்பு திரண்டனர். பின்னர், மத்திய அரசின் மாணவர் விரோதப் போக்கைக் கண்டித்து பிரதான சாலையில் அமர்ந்து திடீர் முற்றுகைப் போராட்டத்தில் ஈடுபட்டனர்.
போலீசாருடன் பேச்சுவார்த்தை
தகவலறிந்து சம்பவ இடத்திற்கு விரைந்து வந்த காவல் துறையினர், சாலையில் அமர்ந்து போராட்டத்தில் ஈடுபட்ட மாணவர்களுடன் சமாதான பேச்சுவார்த்தை நடத்தினர். பொதுமக்களுக்கும் போக்குவரத்துக்கும் எவ்வித இடையூறும் ஏற்படாத வகையில், கல்லூரி வளாகத்திற்குள் சென்று ஆர்ப்பாட்டம் செய்யுமாறு போலீசார் கேட்டுக்கொண்டனர். அதிகாரிகளின் வேண்டுகோளை ஏற்றுக்கொண்ட மாணவர்கள், கல்லூரி வளாகத்திற்குள் சென்று தங்களது கண்டனப் போராட்டத்தைத் தொடர்ந்தனர்.
மாணவர்களின் முதன்மைக் கோரிக்கைகள்
போராட்டத்தில் ஈடுபட்ட மாணவர்கள் தங்களது கோரிக்கைகளை முன்வைத்து பேசுகையில், நீட் தேர்வு வினாத்தாள் கசிவுக்குக் காரணமான நபர்கள் மீது உடனடியாகக் கடுமையான சட்ட நடவடிக்கை எடுக்க வேண்டும் என்றும், தொடர்ந்து நடைபெற்று வரும் வினாத்தாள் முறைகேடுகளுக்குப் பொறுப்பேற்று மத்திய கல்வி அமைச்சர் தர்மேந்திர பிரதான் உடனடியாக தனது பதவியை ராஜினாமா செய்ய வேண்டும் என்றும் வலியுறுத்தினர்.
மேலும், டெல்லியில் ஜனநாயக முறையில் போராட்டத்தில் ஈடுபட்ட மாணவர்கள் மீது தாக்குதல் நடத்திய காவல்துறையினர் மற்றும் தொடர்புடைய நபர்களை உடனடியாகக் கைது செய்ய வேண்டும் என்றும் அவர்கள் கோரிக்கை விடுத்தனர். இதனிடையே, மாணவர்களின் தொடர் போராட்டத்தை முன்னிட்டு எந்தவித அசம்பாவிதங்களும் ஏற்படாத வகையில், சேலம் அரசு கலைக்கல்லூரி மற்றும் அதன் சுற்றுவட்டாரப் பகுதிகளில் போலீஸ் பாதுகாப்பு பலப்படுத்தப்பட்டுள்ளதாக தகவல்கள் தெரிவிக்கின்றன.