சேலத்தில் அரிசி, பருப்பு உள்ளிட்ட அத்தியாவசிய உணவுப் பொருட்களின் விலை தொடர்ந்து அதிகரித்து வருவதால், வழக்கமாக மக்கள் கூட்டம் அதிகமாக காணப்படும் செவ்வாய்பேட்டை மளிகை மார்க்கெட் தற்போது வாடிக்கையாளர்கள் இன்றி வெறிச்சோடி காணப்படுகிறது. விலையேற்றத்தால் குடும்பங்களின் மாதாந்திர உணவு பட்ஜெட் கணிசமாக அதிகரித்துள்ளதாக பொதுமக்கள் வேதனை தெரிவித்துள்ளனர்.
வழக்கமாக பரபரப்பாக காணப்படும் மார்க்கெட்
சேலம் மாநகரின் செவ்வாய்பேட்டை மற்றும் பால் மார்க்கெட் பகுதிகளில் நூற்றுக்கணக்கான மளிகைக் கடைகள் செயல்பட்டு வருகின்றன. இங்கு அரிசி, பருப்பு, மிளகாய், மல்லி உள்ளிட்ட பல்வேறு அத்தியாவசியப் பொருட்கள் மொத்தமாகவும் சில்லறையாகவும் விற்பனை செய்யப்படுகின்றன.
சேலத்தின் பல்வேறு பகுதிகளில் இருந்து பொதுமக்கள் இங்கு வந்து மளிகைப் பொருட்களை வாங்குவது வழக்கம். இதனால் தினமும் பரபரப்பாக காணப்படும் இந்த மார்க்கெட், தற்போது வாடிக்கையாளர்கள் வருகை குறைந்து வெறிச்சோடி காணப்படுவதாக வியாபாரிகள் தெரிவிக்கின்றனர்.
கடந்த சில மாதங்களில் கணிசமான விலை உயர்வு
வியாபாரிகள் கூறுகையில், கடந்த சில மாதங்களில் பல்வேறு அத்தியாவசிய உணவுப் பொருட்களின் விலை கணிசமாக அதிகரித்துள்ளதாக தெரிவித்தனர்.
கடந்த நான்கு மாதங்களுக்கு முன்பு கிலோ ரூ.120-க்கு விற்பனை செய்யப்பட்ட துவரம் பருப்பு தற்போது ரூ.160 ஆக உயர்ந்துள்ளதாகவும், ரூ.110-க்கு விற்பனை செய்யப்பட்ட உளுத்தம் பருப்பு தற்போது ரூ.150-க்கும், ரூ.70-க்கு விற்பனை செய்யப்பட்ட கடலைப்பருப்பு தற்போது ரூ.100-க்கும் விற்பனை செய்யப்படுவதாகவும் தெரிவித்தனர்.
அதேபோல், ரூ.80-க்கு விற்பனை செய்யப்பட்ட பொட்டுக்கடலை தற்போது ரூ.120 வரையும், ரூ.150-க்கு விற்பனை செய்யப்பட்ட வரமல்லி தற்போது ரூ.200-க்கும், ரூ.220-க்கு விற்பனை செய்யப்பட்ட மிளகாய் தற்போது ரூ.260-க்கும் விற்பனை செய்யப்படுவதாக வியாபாரிகள் தெரிவித்தனர்.
சுண்டல் உள்ளிட்ட பொருட்களின் விலையும் அதிகரித்துள்ளதாகவும், ஒட்டுமொத்தமாக அத்தியாவசிய மளிகைப் பொருட்களின் விலை கணிசமாக உயர்ந்திருப்பதாகவும் அவர்கள் கூறினர்.
ரூ.5 ஆயிரத்தில் இருந்து ரூ.10 ஆயிரமாக உயர்ந்த குடும்ப செலவு?
விலையேற்றத்தால் குடும்பங்களின் மாதாந்திர மளிகை செலவு பெருமளவில் அதிகரித்துள்ளதாக பெண்கள் மற்றும் நடுத்தர குடும்பங்களைச் சேர்ந்தவர்கள் தெரிவித்தனர்.
மாதத்திற்கு சராசரியாக ரூ.5 ஆயிரம் வரை மளிகைப் பொருட்களுக்காக செலவிட்டு வந்த நிலையில், தற்போது அதே அளவிலான பொருட்களை வாங்குவதற்கு ரூ.10 ஆயிரம் வரை செலவிட வேண்டியுள்ளதாக சில குடும்பத்தினர் தெரிவித்தனர்.
சம்பளம் பெரிய அளவில் உயராத நிலையில், அத்தியாவசிய உணவுப் பொருட்களின் விலை மட்டும் தொடர்ந்து அதிகரித்து வருவதால் குடும்ப பட்ஜெட்டை சமாளிப்பதில் சிரமம் ஏற்பட்டுள்ளதாக அவர்கள் வேதனை தெரிவித்தனர்.
கிலோ கணக்கில் வாங்கியவர்கள் தற்போது அரை கிலோவுக்கு மாறிய அவலம்
விலையேற்றத்தின் தாக்கம் தங்களது அன்றாட கொள்முதலிலும் வெளிப்படுவதாக பொதுமக்கள் தெரிவித்துள்ளனர்.
இதுவரை ஒரு கிலோ, இரண்டு கிலோ என பருப்பு, கடலை உள்ளிட்ட பொருட்களை வாங்கி வந்த நிலையில், தற்போது விலையை சமாளிக்க முடியாமல் கால் கிலோ, அரை கிலோ என குறைந்த அளவில் மட்டுமே வாங்க வேண்டிய நிலைக்கு தள்ளப்பட்டுள்ளதாக பெண்கள் தெரிவித்தனர்.
“வியாபாரமே இல்லை” என வியாபாரிகள் வேதனை
மார்க்கெட்டில் கடைகள் திறந்து பொருட்களை வைத்திருந்தாலும், அவற்றை வாங்குவதற்கு வரும் வாடிக்கையாளர்களின் எண்ணிக்கை கணிசமாக குறைந்துள்ளதாக மொத்த வியாபாரிகள் தெரிவித்தனர்.
விலையேற்றம் காரணமாக பொதுமக்கள் தங்களது தேவைகளை குறைத்து வாங்குவதால் மளிகை விற்பனையும் பாதிக்கப்பட்டுள்ளதாகவும், இதனால் வியாபாரமும் மந்தமடைந்துள்ளதாகவும் வியாபாரிகள் கூறினர்.
வாழ்வாதாரம் பாதிக்கப்படும் என நடுத்தர மக்கள் கவலை
அத்தியாவசிய உணவுப் பொருட்களின் விலை தொடர்ந்து அதிகரித்தால், நடுத்தர மற்றும் ஏழை குடும்பங்களின் மாதாந்திர செலவுகள் மேலும் அதிகரிக்கும் சூழல் ஏற்படும் என பொதுமக்கள் கவலை தெரிவித்துள்ளனர்.
குடும்ப வருமானத்திற்கும் அத்தியாவசிய செலவுகளுக்கும் இடையிலான இடைவெளி அதிகரித்து வருவதால், எதிர்காலத்தில் குடும்ப பட்ஜெட்டை சமாளிப்பது எப்படி என்ற கவலை ஏற்பட்டுள்ளதாகவும் அவர்கள் தெரிவித்தனர்.
“கடை விரித்தும் வாங்குவோர் இல்லை” என்ற நிலை ஏற்பட்டுள்ளதால், வழக்கமாக பரபரப்பாக காணப்படும் சேலம் செவ்வாய்பேட்டை மற்றும் பால் மார்க்கெட் பகுதிகள் தற்போது வாடிக்கையாளர்கள் வருகை குறைந்து காணப்படுகின்றன.