நேபாளத்தில் அதிரடி: முன்னாள் பிரதமர் கே.பி. சர்மா ஒலி மற்றும் முன்னாள் உள்துறை அமைச்சர் கைது!

நேபாள அரசியலில் பெரும் பரபரப்பை ஏற்படுத்தும் வகையில், அந்நாட்டின் முன்னாள் பிரதமர் கே.பி. சர்மா ஒலி (K.P. Sharma Oli) மற்றும் முன்னாள் உள்துறை அமைச்சர் ரமேஷ் லேக்கக் (Ramesh Lekhak) ஆகியோரை காவல்துறையினர் இன்று காலை அதிரடியாகக் கைது செய்தனர்.கடந்த 2025-ஆம் ஆண்டு செப்டம்பர் மாதம் நேபாளத்தில் ஊழலுக்கு எதிராக இளைஞர்களால் நடத்தப்பட்ட ‘GenZ’ போராட்டத்தில் ஏற்பட்ட வன்முறை மற்றும் உயிரிழப்புகள் தொடர்பாக இந்த நடவடிக்கை எடுக்கப்பட்டுள்ளது. அந்தப் போராட்டத்தின் போது காவல்துறையினர் நடத்திய துப்பாக்கிச் சூடு மற்றும் அடக்குமுறையில் சுமார் 70-க்கும் மேற்பட்டோர் உயிரிழந்தனர்.

​இந்தச் சம்பவங்கள் குறித்து விசாரணை நடத்த அமைக்கப்பட்ட கௌரி பகதூர் கார்க்கி (Gauri Bahadur Karki) ஆணையம், அப்போதைய பிரதமர் கே.பி. சர்மா ஒலி மற்றும் உள்துறை அமைச்சர் ரமேஷ் லேக்கக் ஆகியோர் “குற்றவியல் அலட்சியத்துடன்” செயல்பட்டதாகக் குற்றம் சாட்டியது. அவர்களின் அலட்சியமே இத்தனை உயிரிழப்புகளுக்குக் காரணம் என அந்த அறிக்கை பரிந்துரைத்திருந்தது.

​நேபாளத்தின் புதிய பிரதமராக பாலேந்திர ஷா (Balendra Shah) பதவியேற்ற சில மணி நேரங்களிலேயே இந்த அதிரடி உத்தரவு பிறப்பிக்கப்பட்டுள்ளது.

​நேபாளத்தில் நிலவி வரும் அரசியல் பரபரப்புகளுக்கு இடையே, அந்நாட்டின் முன்னாள் பிரதமர் கே.பி. சர்மா ஒலி பக்தபூரில் உள்ள அவரது இல்லத்தில் வைத்து இன்று காலை காவல்துறையினரால் அதிரடியாகக் கைது செய்யப்பட்டார். அதேபோல், முன்னாள் உள்துறை அமைச்சர் ரமேஷ் லேக்கக் சூரிய விநாயக் பகுதியில் உள்ள அவரது இல்லத்தில் வைத்து அதிகாலையிலேயே கைது செய்யப்பட்டார். கடந்த காலப் போராட்டங்களின் போது நடைபெற்ற வன்முறை மற்றும் உயிரிழப்புகள் தொடர்பான விரிவான விசாரணைக்காக இந்த நடவடிக்கைகள் மேற்கொள்ளப்பட்டுள்ளதாகத் தெரிவிக்கப்பட்டுள்ளது.

தற்போதைய உள்துறை அமைச்சர் சுதன் குருங் (Sudan Gurung) இது குறித்துக் கூறுகையில், “சட்டத்திற்கு முன் அனைவரும் சமம். இது பழிவாங்கும் நடவடிக்கை அல்ல; பாதிக்கப்பட்ட மக்களுக்கு நீதி வழங்குவதற்கான தொடக்கம்” என்று தெரிவித்துள்ளார்.

இந்தக் கைதைக் கண்டித்து கே.பி. சர்மா ஒலியின் ஆதரவாளர்கள் மற்றும் சிபிஎன்-யுஎம்எல் (CPN-UML) கட்சியினர் ஆங்காங்கே போராட்டங்களில் ஈடுபட்டு வருகின்றனர். இதனால் காத்மாண்டு பள்ளத்தாக்கு முழுவதும் பலத்த பாதுகாப்பு போடப்பட்டுள்ளது.

மீண்டும் மாஸ்க்கா? ‘சிக்காடா’ – உலக நாடுகளை அச்சுறுத்தும் புதிய COVID உருமாற்றம்!